EBELEO 8

1KU malo aa lolo atudi mu kutôya, dicina dia bwalo didi ene, Twapwangata bokanda bunene bwa noku, bwamaxikama ku kidyo kia lukwasa lwa Bunene mu melu kulu, 2musadi a bidi bia babala, yi a ncibo a bixeba amapika Fumu, kumoni muntu.

3Bwalo bwamalungikibwa bokanda bwoso bunene ndo kulongola yi malongi yi bixipilu ; mbwôso bokanda bobu noku kabidi bwakadi yi dibambu dia dilongi kulongola. 4Kaninga ndo yei uxeakala ku loboko, kaxeakala bokanda pô, bwalo budiko bantu bamalongola malongi bea biamatôya bwadi ; 5bamasala mudimo ă ncibo you udi kifwanisa yi mudingidingi ă bintu bia diulu ; luna biakadimuxibwa Mosese kudi Ncembi pakalandayi kukisa ncibo a bixeba ; bwalo bwakatôyayi ene, Mona, upangi bintu bioso luna mwocindu ou ăkakwebexebwa owe ku lupongo. 6Mo nkyekyu apwangata busadi bwamadika bunengela, bwalo budiyi kabidi musambodi a disambi diamadika dinengela, diamasambikibwa bwalo bwa bilaka biamadika binengela.

7Bwalo ndo disambi dia buxi dixeakala kadina mwosaku, kidi kakixedidixibwa kia disambi diamubidi. 8Mo bwalo bwakamonayi mwosaku ndo bwakatôyayi ene, Fumu ene, Mona, matuku alolwa anasubisa disambi dipyadipya yi ncibo a Isalele yi ncibo a Yuda ; 9kumoni luna disambi dinakasambikanana yi bateteabo ku dituku dinakabakwata ku kianca ndo kubaxiya kunci kwa mbata a Ecipito ; bwalo butasalabo mu disambi diamene, yi nakadi kisobadingila ; Fumu ndo atôya nako. 10Kunu pako kudi disambi ; dinasambikanana yi ncibo a Isalele kunyuma kwa matuku yia, (Fumu ndo atôya nako) ; nakuteka madi amene mu lukanyi lwabo yi nakwafunda kabidi ku mucima ăbo ; yi nakwakala yinabo Ncembi, yi bobo banakala yinami bantu ; 11yi kabanakweyesa muntu mwoso muna bula bwanci muntu mwoso muna bula bwanci, ndo muntu mwoso muna kwanci muntu mwoso muna kwanci ene, Lubukwa Fumu ; bwalo bunangulubukwa bungi bwabo pôi muntu mubende pôi muntu munene yinabo. 12Bwalo bunakwombwela mona abo mwengo amakwonabo, yi kinakwela mabi abo lukanyi kabidi nyô. 13Pa kutôya ene, Disambi dipyadipya, amateka dia buxi kinunu. Mo kintu kioso kiamatekyebwa kinunu yi kiamadika kunyenga kidi pepe yi kuncimina.

Currently Selected:

EBELEO 8: Luna_NT

Highlight

Copy

Compare