NGALATIA 3

1BENA Ngalatia batasokwela nkanyi, ñani akanulowa, bakakwebexebwa Yisu Kalistu ku meso enu, muxipibwi ku nkulusu ? 2Ngwakyeba mo kwombwa kunudi ; Nonu nwakangata Mwoxixi ku makisa a bwadi, sungu ku kwombwa kwa kwetabusa ? 3Nonu nwasaka nkanyi nako ? Binwamabanga mu Mwoxixi, nutanasudeyebwa mu munyu ? 4Nonu nwakatata matata mangi noku kanana ? ndo kwakadi kanana sôsôlwo kabidi ? 5Mbwôso you amanulongola Mwoxixi yi amakisa kisa makisa a ngulu kunudi, kudi lolo ku makisa a bwadi kwakisayi noku ? sungu ku kwombwa kwa kwetabusa ? 6Bea biakakwetabusa Abalami Ncembi, yi kwakamubadidibwa nkwami. 7Mbwôso nulubukwi ene, bobo bakala bena kwetabusa, ka baba badi bana ba Abalami. 8Yi mukanda ă Ncembi ăkalubukwa buxi ene, Ncembi uxesuwisa bena mabila ku kwetabusa, ăkakwambila Abalami losangu lunengela buxi ; ene, Munda mwebe munalwangwasanibwa mabila moso. 9Mbwôso bobo badi bena kwetabusa bamalwangwasanibwa yi mwetabuxi Abalami. 10Bwalo bantu boso badi bena makisa a bwadi badi muxi mwa difingu ; bwalo bwakafundibwa ene, Muntu mwoso afingibwi utasoxina mu bintu bioso biamafundibwa mu mukanda ă bwadi ndo kubikisa. 11Mo ku bwalo bwa bwadi, kumoni muntu umoumwe kusuwixibwa yinabu ku meso a Ncembi kwamonebwa mangwoso ; ene, Muna nkwami unakala yi môyo ku kwetabusa. 12Mo bwadi kabuna muna kwetabusa ; kate ene, Mukisañani a bintu bebi unakala yi môyo kudibio. 13Kalistu akatupikula bwalo bwa difingu dia bwadi, bwalo bwakafingibwayi difingu ku micwe yecu ; bwalo bwakafundibwa ene, Muntu mwoso afingibwi difingu amakopekyebwa ku muci ; 14bixefika kulwangwasanibwa kwa Abalami mu Kalistu Yisu kudi mabila ; bituxeangata kilaka kia Mwoxixi ku kwetabusa.

15Bakunyi, ngwatôya yi mutôyelu ă muntu ; isanga ku bwalo bwa disambi dia muntu, kaninga panakala diamasubixibwa, kakuna muntu unadilengola, ndo muntu unabodeya manga malo munda kumoni. 16Mo kudi Abalami pdo kwakaxiyidibwa bilaka yi kudi mwananci. Kasotôya ene, Kudi bana, luna kutôya dia bantu bangi ; kate kudi umoumwe ene, Kudi mwanebe ; you lolo ndo Kalistu. 17Mbwôso ngwatôya ene, Bwalo bwa disambi diakasubixibwa kudi Ncembi, bwadi bwakalwa kunyuma lwedi lwa mbula nkama inai yi mbula masangi asatu kabusodilengola, ndo kuteka kilaka kanana. 18Ndo mwokito udi bwalo bwa bwadi, kausoakala bwalo bwa kilaka nyô ; mo Ncembi akaupela Abalami ku kilaka.

19Ape bwadi lolo kukai ? Bwakabodeyebwa ku mucwe ă mabi pôi kikondo kixelwa mwana akixiyidibwa kilaka, bwamalungikibwa kudi bangele, ku kianca kia musambodi. 20Mo musambodi kiena bwalo bwa muntu umoumwe ; mo Ncembi udi umoumwe.

21Bwadi lolo bwamatanda yi bilaka bia Ncembi ? Ai, kumoni. Ximbi bwadi bwamapebwa bubili kupañana môyo, nako nkwami kabidi yixeakala kudi bwadi. 22Kate mukanda ă Ncembi ămabukila bintu bioso muxi mwa bubi, bixepebwa bantu kilaka bamakwetabusa, kilolwa ku kwetabusa kwa Yisu Kalistu.

23Mo buxi butaluli kwetabusa, coco twakanamibwa kudi bwadi, twamancibikibwa munda, tudi mu kudingidila kwetabusa kuxekwebexebwa kunyuma. 24Mbwôso bwadi bwakadi mubungudi ecu pôi Kalistu, bituxesuwixibwa ku kwetabusa. 25Mo, biamalwa kwetabusa, coco katuna kabidi muxi mwa mubungudi. 26Bwalo bunudi bana ba Ncembi ku mucwe ă kwetabusa, bungi bwenu, munda mwa Kalistu Yisu. 27Bwalo nonu bamanumeyebwa bwalo bwa Kalistu bamalata Kalistu. 28Koku kakuna muna Yuda ndo muna Ngiliki ; koku kakuna mupika ndo mwana a bula ; koku kakuna mwamulumi yi mwamukaxi ; bwalô bunudi bungi bwenu umoumwe mu Kalistu Yisu. 29Kaninga ndo nudi bena Kalistu, nudi lolo bana ba Abalami, bena mwokito bea biamatôya kilaka.

Currently Selected:

NGALATIA 3: Luna_NT

Highlight

Copy

Compare