NGALATIA 4

1KANINGA ngwatôya ene, Pakala muna mwokito ukidi mwamuki, kasoxiyañana yi musadi pô, isanga udi fumu a bintu bioso ; 2kate udi muxi mwa babungudi yi bankôngôlo pôi kikondo kiamalungikibwa kudi tete. 3Mo nako coco, patwakadi babaki, twakabambibwa ku bupika muxi mwa bikoma bia loboko. 4Kaninga pakakuka lwedi lwa kikondo, Ncembi akabatusa Mwananci amalelebwa kudi mwamukaxi, amalelebwa muxi mwa bwadi ; 5bixepikulayi bobo badi muxi mwa bwadi, bituxeakala yi bwana. 6Yi bwalo bunudi bana, ndo bwakabatusa Ncembi Mwoxixi a Mwananci akali munda mwa micima yecu, udi mu kwamena ene, ABA, TETE. 7Mbwôso kuna kabidi musadi nyô, kate mwana ; mo ndo mwana, mbwôso muna mwokito kabidi kudi Ncembi.

8Kate ku kikondo yikia kinwakadi kanubiyi Ncembi, nwakadi yi bupika ku bwalo bwabo batena bancembi ku butonga bwabo pô. 9Mo nkyekyu, binwamalubukwa Ncembi,—ndo pako binwamalubukibwa kudi Ncembi,—nwapinana kabidi beci ku bikoma bia bubombu yi bia bokombi binwakyeba kabidi kwakala yi bupika bwabio ? 10Nonu nwanama matuku, yi ngondo, yi bikondo yi mbula. 11Ngwacina ku bwalo bwenu, ximbi ambeci namakamba nkambi kanana ku bwalo bwenu.

12Meme nwaxengula bakunyi, nwakali bea bindi, bwalo bundi meme kabidi bea binudi. Kanwangukixila bubi pô. 13Mo nwalubukwa ene, ku bubombu bwa munyu ndo kunakanwambila losangu lunengela ku buxi ; 14yi kielekyexelu kiamene kiakadi mu munyu ămene, nonu nwakadi kanusokixeka yi kanusokiombwa xepete ; kate nwakangwangata bea mwangele a Ncembi, bea Kalistu Yisu. 15Ape kulwangwasanibwa kwenu kwamaya kupai ? Bwalo bungwatôbôla ku mucwe ěnu ene, ximbi nwamalubukwa noku, nuxedipokola meso enu yi nuxempa meme. 16Mbwôso namatulowa mutandanani yinenu bwalo bunamanwambila sôsôlwo ? 17Banwapalala yi mulukutu, kate kumoni ă nkwami ; kanana, bakyeba kununcibika kunci binuxebapalala. 18Mo kudi loko bwalo bunengela kupaladibwa yi mulukutu matuku moso ; kumoni ku kikondo kintani yinenu kutupu.

19Bana bamene, bantani kabidi yi loenu ku micwe yenu binakala Kalistu amapebwa mumbidi munda mwenu ; 20ya, nxekyeba kwakala yinenu ku mpala nkyekyu, yi kukulumuna diyi diamene, bwalo bunamantunka ntunka ku bwalo bwenu. 21Nungwambili, nonu bakyeba kwakala muxi mwa bwadi, nonu kanusokwombwa bwadi ? 22Bwalo bwakafundibwa ene, Abalami akadi yi bana babidi ; munga kudi mupika a babakaxi yi munga kudi mwamukaxi, mwana a bula. 23Kate you a mupika a babakaxi akalelebwa muna munyu ; yi you a mwamukaxi, mwana a bula, ndo muna kilaka. 24Aa malo adi yi mwele munda, bwalo budi babakaxi baba luna masambi abidi. Dimodimwe dia lupongo lwa Sinai, dialelafiana bana ba bupika ; dedi ndo Angala. 25Bwalo budi Angala luna lupongo lwa Sinai mu Alabia, yi amalelekyela yi Yelusaleme a nkyekyu ; bwalo budiyi mu bupika yi bana banci. 26Mo Yelusaleme a kulu udi mwana a bula ; you ndo mamecu. 27Bwalo bwakafundibwa ene, Xekyelela owe kikuta kitasolela ; amena yi tôya, owe utasolubukwa loenu ; bwalo bwa bana ba you amakyenga bamadika bana bungi ba you udi yi bayenci.

28Mo coco bakunyi tudi bana ba kilaka luna biakadi Isaka. 29Kate bea biakakolomona you akalelebwa muna munyu you akalelebwa muna Mwoxixi, ndo bidiko nkyekyu. 30Mo mukanda ă Ncembi ămatoya beci ? Tenyeka mupika a babakaxi yi mwananci ; bwalo mwana a mupika kanakitafiana mwokito pô yi mwana a mwamukaxi, mwana a bula. 31Mbwôso bakunyi, coco katuna bana ba mwamukaxi a bupika, kate ba mwamukaxi mwana a bula.

Currently Selected:

NGALATIA 4: Luna_NT

Highlight

Copy

Compare