MAKISA 7

1YI bokanda bunene bwakatôya ene, Bintu bebi biapwakala noku ? 2Yei akatôya ene, Bena kwecu yi batete, nwombwi. Ncembi a dikai akamoneka kudi tetecu Abalami pakakalayi mu Mesopotamia, buxi bwakakalayi mu Alana, 3yi akamutôyela ene, Batuka mu mbata ebe, kudi bulungu bwebe ; lwaka ku mbata unakwebesa. 4Yei lolo akabatuka mu mbata a bena Kaladia, yi akasala mu Alana ; yi Ncembi akamuncula koku, pakadi tetenci amafwa, kulwa ku mbata you kunwakala nonu nkyekyu. 5Yi akadi kasomupa mwokito momu, kumoni isa kinyacilu kia dikasa dienci ; yi akamuxiyila kilaka kia kumupayi, mbata anci yi a bana banci kunyuma kwanci, pakadi ukidi kiena yi mwana. 6Yi Ncembi akatôya noku, ene, Bana banci baxeakala benyambango mu mbata a babene, baxebapwesaku bupika, baxebafina mbula nkama inai ; 7yi Ncembi akatôya ene, Nakubela bubila bunabapwesa ku bupika ; yi kunyuma kwa bintu bebi, banabatuka kulwa ngusadila mu kidi kieki.

8Yi akasambika yinanci disambi dia bwadi kwelebwa ; nako akalela Isaka yi akamwela bwadi ku dituku dia yenana ; yi Isaka akalela Yakobo, yi Yakobo akalela batete becu disangi yi babidi. 9Batete lolo, bakakwombwela Yosefe mwokunyo, bakamwodisa kuya ku Ecipito. Yi Ncembi akakala yinanci, 10yi akamupaula mu maxitu anci moso, akamupa dikasa dinengela yi bwinu ku meso a Falowa, fumu a Ecipito ; yei lolo akamudikisa kulu kwa Ecipito yi kwa bungi bwa ncibo anci.

11Kaninga lukombo lwa ncala lwakalwa mu bungi bwa mbata a Ecipito yi a Kyenene, yi buxitu bungi, yi batetecu bakadi kabasosañana bidya. 12Mo pakakwombwa Yakobo ene, miebele idiko mu Ecipito, akatuma batetecu buxi ; 13yi ku diya diamubidi kwakakwebexebwa Yosefe kudi bena kwanci, yi Yosefe bulungu bwanci bwakalubukibwa kudi Falowa. 14Yosefe lolo akatuma kuya bikila tetenci Yakobo kudiyi, yi bungi bwa bulungu bwanci, mpala masangi sambwali yi mpala itano. 15Yi Yakobo akapweka ku Ecipito yi akafwa, yei yi batetecu, 16yi bakacwadibwa ku Xekyeme, bakatekyebwa lolo mu lukita lwakakwola Abalami ku diso dia mpalata kudi bana ba Amolo ku Xekyeme.

17Kaninga pakalwa kikondo kia kilaka pepe kiakatôyela Ncembi Abalami, bantu bakalunda yi bakalelañana bungi mu Ecipito, 18biakakwemana munga fumu kulu kwa Ecipito utalubukili Yosefe. 19You akakwencela bubila bwecu yi mancanga, akafina fina batetecu, becikisi bana babo kabakadi yi môyo. 20Ku kikondo kieki kwakalelebwa Mosese, akadi yi lwoxixi ku mesô a Ncembi, akanamibwa ngondo isatu mu ncibo a tetenci. 21Pakakwecikixibwayi lolo, mwana a Falowa a babakaxi akamwangata yi akamubungula akali mwananci. 22Yi Mosese akakweyexebwa bwinu bwoso bwa bena Ecipito, yi akadi yi ngulu mingi ku meyi anci yi ku makisa anci. 23Yi pakakalayi yi mbula yenci masangi anai, mu mucima ănci mwakalwa lukanyi lwa kuya mona bena kwanci, bana ba Isalele ; 24yi pakamonayi muntu utanakolomonebwa, akamusamunina, akasombola you akafinibwa, yi akaxipa muna Ecipito. 25Bwalo bwakakisayi ene, bena kwanci bamalubukwa ene, Ncembi utanabapandisa ku kianca kienci. Mo bakadi kabasolubukwa.

26Ku diba diamubidi lolo kwakadiebesayi mikyenci kudibo pakatandañanabo, yi uxebaxikika polo ene, Babalumi, nonu badi bana ba tete, kukai nwafinañana ? 27Kaninga you akadi mu kufina muna kwanci akamwatola ene, Ñani apukuteka fumwecu ndo musambodi ecu ? 28Owe wakyeba kunguxipa bea biakaxipa muna Ecipito mankyelo ? 29Yi Mosese akacina pa diyi dedi, akaya akala mwenyambango mu mbata a Midiana, mwakalelayi bana babidi.

30Pakadi lolo mbula yamadika masangi anai, mwangele akamoneka kudiyi mu mbata a kisobe a ku lupongo lwa Sinai, mu mwanga ă mudilu mu dibunca. 31Yi pakamona Mosese, akakama pa kumona ; yi pakakokyelayi pepe kuya tebela pakalwa diyi dia Fumu 32ene, Meme ndi Ncembi a batetebe, Ncembi a Abalami, yi a Isaka, yi a Yakobo. Yi Mosese akalukuta, akacina kutebela. 33Fumu lolo akamwambila ene, Sula sabato ku makasa ebe, bwalo budi kidi kiapwemana loboko lwa babala. 34Namamona sôsôlwo kufinibwa kwa bantu bamene badi mu Ecipito, namakwombwa mukabanu ăbo, namapweka lolo kulwa bapaula ; nkyekyu, lwaka, nakukutuma ku Ecipito.

35Mosese you akanyañanabo ene, Ñani amakuteka fumu yi musambodi ? Ncembi akamutuma, yei akali fumu yi mupaudi kudi mwangele akamoneka kudiyi ku dibunca. 36You akababatusa, pakadi amakwenca bikamakama yi bilayixilu mu mbata a Ecipito, yi ku Mai a Kakula, yi ku mbata a kisobe mbula masangi anai. 37Yei ndo Mosese you akatôyela bana ba Isalele, ene, Ncembi unanubandixila mudimuxi kudi bena kwenu bea mikyemi. 38You ndo yei akadi mu kikokye mu mbata a kisobe, yi mwangele akatôya yinanci ku lupongo lwa Sinai, yi batetecu ; akangata mambi a môyo a kutupa coco ; 39utakwedeyela batetecu, kate bakamwatola kudibo, yi bakapinana ku Ecipito ku micima yabo, 40bakatôyela Alono ene, Utupangili ngixi yinakwenda ku buxi bwecu ; bwalo bwa Mosese you, akatubatusa mu mbata a Ecipito, katusolubukwa kinani kiamamuponena. 41Yi bakapanga ñombi ku matuku yia, yi bakalongolela ngixi dilongi, yi bakaxekyelela makisa a makaci abo.

42Mo Ncembi akakulumuka, akabakadeya basadili kibumbu kia diulu ; bea biakafundibwa mu mukanda ă badimuxi ene, Ki nwamangulongola meme nyama mixipa yi malongi mosa mbula masangi anai mu mbata a kisobe, nkumbu a Isalele ? 43Ape nwakakwombulula ncibo a mbuxa a Moloko, yi mutoto ă ngixi Lefana, bifwanisa binwakapanga ndo kubixingila ; yi nakunututula pôi ku buxi bwa Babelono.

44Batetecu bakadi yi ncibo a bixeba a ntôbo mu mbata a kisobe, bea biakatôya you akakwambila Mosese ene, amupangi luna kifwanisa kiakamonayi ; 45ncibo akabwesa batetecu biabo kabidi yi Yoxua, pakakitabo mabila mwokito akakwapata Ncembi ku mpala ya batetecu pôi matuku a Dafidi.

46You akamonebwa yi dikasa dinengela ku meso a Ncembi, yi akakwapangusa dia kupaladila Ncembi a Yakobo ncibo. 47Mo Solomono akamwabakila ncibo. 48Kate Ncembi a kulu kasoakala mu ncibo yamapangibwa ku makaci ; bea biamatôya mudimuxi ene, 49Diulu didi lukwasa Iwamene yi loboko ludi katanda ka makasa amene : Fumu aputôya ene, nunangwabakila ncibo kai ? Kupai lolo kudi kidi kia kwomowa kwamene ? 50Ki kianca kiamene kiamakwenca bintu bebi bioso ?

51Nonu bena xingu kukola, bena mientonto ku mucima yi ku macu, nonu nwapidya pidya Mwoxixi a babala matuku moso, bea biakakisa batetenu, ka nonu kabidi. 52Ñani udiko a badimuxi utakolomona batetenu ? Bakaxipa lolo bobo bakakwambila buxi dia kulwa kwa you a nkwami, unwapwakala nonu nkyekyu bengi yi bondi ; 53bapwangata bwadi bulungika kudi bangele, yi kanubunamini pô.

54Biakakwombwabo malo aa, bakakadibwa ku micima, yi bakamubambakanyina meno abo. 55Kaninga yei akakwolubilañana yi Mwoxixi a babala, akatebela lwa diulu sosonyi, akamona dikai dia Ncembi, yi Yisu emanini ku kianca kia Ncembi kia kidyo, 56yi akatôya ene, Mona, ngwamona diulu diamadipudibwa, yi Mwana a Muntu amakwemana ku kianca kia Ncembi kia kidyo. 57Kaninga bakakwamena yi diyi dikola, yi bakabamba macu abo, yi bakamwotunukila bo-a-bwoso ; 58yi bakamupaula kunci kwa bula, yi bakamwela mabwe. Yi batôbôdi ba ntôbô bakabotaka bilamba biabo ku makasa a dipulwa diakatambibwa ene, Saulu.

59Yi bakakwela Stefano mabwe, udi mu kwabila Ncembi, yi kutôya ene, Fumu Yisu, angata kidimu kiamene. 60Yi akakuma binu paxi, akakwamena yi diyi dikola ene, Fumu kubabambakanyini kwona koku noku. Pakadi lolo aputôya noku, akalala tulu.

Currently Selected:

MAKISA 7: Luna_NT

Highlight

Copy