MAKISA 8

1YI Saulu akakwetabuxila kuxipibwa kwanci. Ku diba dedi kwakabanga kukolomona kungi, bwalo bwa kikokye kiakadi mu Yelusaleme ; yi bakacakanixibwa bungi bwabo ca mu mbata ya Yudiya yi Samalia, kutena batumibwi. 2Yi bantu ba nkwami bakancika Stefano, bakamudidila bidilu bingi. 3Mo Saulu akasanca sanca kikokye, akabwela mu ncibo mwoso, akaputulula babalumi yi babakaxi, yi akababwesa mu ncibo a lukanu.

4Bobo lolo bakacakanixibwa bakatanga tanga mala, badi mu kwambila diyi. 5Yi Filipi akapweka ku bula bwa Samalia, akabambila dia Kalistu. 6Yi bimbukuma biakanama bintu yi lukanyi lumolumwe biakatôyebwa kudi Filipi, pakakwombwabo, yi pakamonabo bilayixilu biakakwencayi. 7Bwalo bwakapauka bidimu bia mbindu kudi bantu bangi bakadi yinabio, badi mu kwamena yi diyi dikola ; yi bantu bangi bakadi yi mbôyaponde, yi bitumbi, bakapandixibwa. 8Yi ku bula bobu kwakadi kiăngo kingi.

9Kaninga muntu umoumwe akadiko, dina dienci ene, Ximono, akasaka bubuki ku bula kalikali, yi akakamisa bubila bwa Samalia, akaditôyela ene, mikyenci ndo munene : 10akakwombwelabo bo-a-bwoso, poi mwamuki pôi mwamukulu ene, You udi ngulu ya Ncembi yabikidibwa ene, Minene. 11Yi bakamudingila bwalo bwakabakamisayi kikondo kingi ku bubuki bwanci. 12Kaninga pakakwetabusabo Filipi udi mu kwambila losangu lunengela lwa bufumu bwa Ncembi yi Iwa dina dia Yisu Kalistu, bakanumeyebwa, yi babalumi yi babakaxi. 13Yi Ximono akakwetabusa mikyenci kabidi ; yi pakadi amanumeyebwa, akasala yi Filipi ; yi pakamonayi bilayixilu yi makisa manene a ngulu biakakwencebwa akakama kama.

14Pakakwombwa batumibwi bai kadi ku Yelusaleme, ene, Samalia apwangata diyi dia Ncembi, bakabatumina Pita yi Yoano ; 15bobo, pakadi bamapweka, bakabalombelela bangati Mwoxixi a babala ; 16bwalo butaponayi kulu kwa muntu mwoso abo pô, mo bakanumeyebwa mu dina dia Fumu Yisu. 17Kunyuma bakabaka makaci abo kulu kwabo, yi bakangata Mwoxixi a babala. 18Kaninga pakamona Ximono ku kubaka kwa makaci a batumibwi kwakapebwa Mwoxixi a babala, akabalonga mpalata 19ene, Mpi meme kabidi bumanya bobu, bixeangata muntu mwoso Mwoxixi a babala ungwabaka makaci. 20Mo Pita akamwambila ene, Mpalata yebe yifwi yinebe, bwalo bwapwenca kwangata dilongi dia Ncembi ku mpalata. 21Kuna yi kicini ndo yi dikapa ku bwalo bobu, bwalo butena mucima ěbe yi nkwami ku mpala a Ncembi. 22Mbwôso udibeli mikyebe bwalo bwa bubi bwebe bobu noku, lombela Fumu, ndo ambeci lukanyi lwa mucima ěbe lunakulekyelebwa ; 23bwalo bunkwamona wapwakala mu lusangu lwa bululu yi mu muxinga ă kwona. 24Yi Ximono akapingasa ene, Nungulombeleli kudi Fumu, bitaxenguponena bwalo bumobumwe bwa malo anwamatôya.

25Mbwôso pakadi bamatôbôla, yi bamatôya diyi dia Fumu, bakapifiana ku Yelusaleme, yi bakakwambila losangu lunengela mu mala mangi a bena Samalia.

26Mo mwangele a Fumu akatôyela Filipi, ene, Emana, yaka ku bolongya bwa Sudu, mu ncila a kupweka ku Yelusaleme kuya ku Ngasa ; koku kudi mbata a kanana. 27Yi akakwemana yi akaya. Yi mona muna Etiopia, Saludi, niuna kikupu kinene muxi mwa Kandaki, fumu a babakaxi a bena Etiopia, akanama bima bienci bioso, akamalwa ku Yelusaleme kulwa xingila ; 28akadi utanapifiana, uxikamini pa kicwadilu kienci ; udi mu kubala mudimuxi Esaya. 29Yi Mwoxixi akatôyela Filipi ene, Kokyeia, sangila yi kicwadilu kieki. 30Yi Filipi akaya iubilu, akamwombwa udi mu kubala mudimuxi Esaya, yi akatôya ene, Wakyendula lolo bwalo butanabala ? 31Yei ene, Ape nkyenduli beci, kutena muntu unangwebesa ? Yi akalomba Filipi, abandi kulwa xikama yinanci. 32Kidi lolo kia mukanda ă Ncembi kiakabalayi ndo kieki ene, Akaxiyibwa bea mukwakwa ku kixipilu ; yi bea bidi mwana a mukwakwa kimeme ku mpala a mukuludi a nyonyi, ndo biakadi yei, akadi kasodipula musuku ănci. 33Ku kupwexebwa kwanci kwakancudibwa kimu kienci ; nkumbu yenci, ñani unayibala ? Bwalo bwamancudibwa môyo ănci paxi.

34Yi Saludi akapingasa Filipi ene, Ungwambilipo, dia nani diaputôya mudimuxi noku ? dia mikyenci ndo dia munga muntu ? 35Yi Filipi akadipula musuku ănci, akabanga pa mukanda ou, yi akamwambila dia Yisu. 36-37Yi pakakwendabo mu ncila, bakafika pakadi mai ; yi Saludi akatôya ene, Mona, mai ; kiñani kingwakanda kinumeyebwi ? 38Yi akatôya ene, kicwadilu kiemani ; yi bakapweka munda mwa mai yi Filipi yi Saludi, yi akamunumeya. 39Yi pakabandabo mu mai, Mwoxixi a Fumu akancimisa Filipi ; yi Saludi kamumona kabidi pô, bwalo bwakakwendayi mu ncila anci yi kiango. 40Mo Filipi akasokoloka ku Asoto ; yi pakatanga tangayi, akakwambila losangu lunengela mu mala moso, biakafikayi ku Kyesalia.

Currently Selected:

MAKISA 8: Luna_NT

Highlight

Copy