MAKISA 27

1MO pakakwencebwa ene, tuxeya iwa kibusu kuya ku Italia, bakalongola Paulu yi minga misungi kudi kapalai, dina dienci ene, Yulio, muna kibumbu kia Angusto. 2Bitwakakondela lolo mu kibusu kia ku Andalamitio, kixeya namata namata ku mala a ku mbata a Asia, twakanamuka. Yi Alistako, muna Makyedonia a ku Tesalonika akadi yinecu. 3Ku diba lolo diamubidi twakanamata ku Sidono ; yi Yulio akakwenca yi Paulu loko, akamulekyela ayi kudi bimbila bienci kuya dikolesa mikyend. 4Patwakancuka koku twakaya ku kwabanda kwa Kupuloso, bwalo bwakakandañana mpepele. 5Patwakamana kwenda mu mai a Kilikia yi Pamañlia, twakalwa fika ku Mila mu Lukia. 6Yi kapalai kakasañana kibusu koku kia ku Alesandalia kidi mu kwenda kuya ku Italia ; yi akatukondelesa momu. 7Pakadi twamakwenda bikyebikye matuku mangi, yi twamalwa yi lwěndo lukola ku mpala a Kinidu, lupepele Iwakatukanda koku, yi twakaya kwabanda kwa Kyelete ku mpala a Salamone ; 8twakadika dika lolo yi lwendo lukola, yi twakalwa ku kidi kiabikidibwa ene, Mbongo yinengela, kitani yi bula bwa Lasea pepe.

9Yi pakamapwa kikondo kingi, yi ku lwendo kwakadi kukola kungi bwalo bwamadika kikondo kia Luncilu, Paulu akabadimusa 10yi akatôya ene, Bakyelengi, ngwalembetela ene, lwendo lunakala yi kipoma kibi yi kinkambili kia bubi, kumoni ku bwalo bwa bintu bitupu yi kibusu, kate bwa mieyo yecu kabidi. 11Kaninga kapalai kakakwombwa mukobi a kibusu yi fumu a kibusu, kumoni mwakatôyebwa kudi Paulu. 12Yi bwalo butakadi mbongo loko ndo kwakala momu ku ngondo ya maxika, bobo bakadika bungi bakakwenca kuncuka koku, ambeci kufika ku Feniki ndo kuxikama koku ku ngondo ya maxika ; kudi mbongo a mu Kyelete adingila bolongya bwa Nôdo-Este yi bwa Sudu-Este. 13Yi pakapupuya lupepele lwa Sudu bikyebikye, bakakisa ene, lukanyi lwabo lwamafika, bakasomona ngindu, yi bakaya pa bule bwa Kyelete pepe yi mbata. 14Kaninga kunyuma kwa kakondo kabende kwakalwa lupepele lwa ngiembi lwabikidibwa ene, Eulakulo ; 15yi pakakwacibwa kibusu, kakibiyi kwenda ku mpala a lupepele, twakakilekyela yi twakapumbuxibwa. 16Yi bitwakadika muxi mwa kisala kiabikidibwa ene, Kolôda, katwalubukwa kukondelesa kabusu kabende, kutena yi mudimo ukola ; 17yi pakadi bamakombulula bakakasuka yi mixinga ya kudinga kibusu kinene ; yi bwalo bwakacinabo ambeci banasakibwa pa Sutisi bakapwesa mbuxa kulu, yi mo nako ndo mwakapumbuxibwabo. 18Bitwakatanda lolo yi ngiembi kungi kungi, mankyelo bakabanga kwecikisa mixete ya munda, 19yi ku diba diamusatu bakakwecikisa bintu binga bia mu kibusu yi makaci abo mikyeabo. 20Biakadi lolo diba kadisomoneka matuku mangi ndo mitoto, yi ngiembi ya bubi yakatanda yinecu, ku sula, mudingidulu mwoso ă kupandixibwa môyo ăkancudibwa. 21Pakadi bamasala kikondo kingi kutena kudya, kunyuma Paulu akakwemana pakacikaci pabo, yi akatôya ene, Bakyelengi, nuxengwombwa, kumoni kuncuka ku Kyelete kulwa pomanañana yi kipoma kibi kieki yi kinkambili. 22Nkyekyu nwatôyela ene, nukolesi micima, bwalo butasoncimina môyo ă isanga muntu umoumwe udi yinenu, kaninga kibusu. 23Bwalo bwapwemana mwangele pandi ku butuku bobu, a Ncembi you undi muntu anci, ungwasadila, 24ene, Kucini, Paulu, uxekwemana ku mpala a Kyesa ; yi, mona Ncembi amakupa bantu boso bayeya yinebe lwa kibusu. 25Mbwôso, bakyelengi, nukolesi micima ; bwalo bunamakwetabusa Ncembi, ene, kunakala mo nako bea biapungwambidibwa. 26Kaninga tuxekwelebwa pa kisala kinga.

27Mo pakafika butuku bwa disangi yi inai, bitwakakwendexebwa mpala kunu mpala koku mu mai a Adalia, pakacikaci pa butuku bena kibusu bakakisa ene, badi mu kukokyela pepe yi mbata ; 28yi bakakwelekyesa yi bakasañana maboko masangi abidi a mai ; yi kunyuma kwa kakondo, bakakwelekyesa kabidi yi bakasañana maboko disangi yi atano. 29Yi bwalo bwakacinabo ambeci tunakwelebwa pa kidi kitani mabwe, bakapwesa ngindu inai ku nyuma yi bakadila lubangu. 30Yi pakapalala bena kibusu kucina mu kibusu, yi bakadi bamapwesa kabusu kabende mu mai bea bixenangabo kwela minga ngindu ku ntôi a buxi, 31Paulu akatôyela kapalai yi masalai, ene, Kutena baba basala mu kibusu, kanunalubukwa kupandixibwa môyo. 32Masalai pako akakala miekulu ya kabusu kabende yi akakalekyela dyendeli. 33Pakalanda butuku, kukya Paulu akababondabonda bungi bwabo dia bidya kudya ene, Lelo ndo diba dia disangi yi inai, dinwamasala mu kudingila dingila, kutena kudya kantu. 34Mbwôso nwabondabonda, ene, nwangati bidya ; nako bwalo bwa diyangu dienu enu bwalo butasonuncimina lunyonyi lwa ku mucwe ă muntu mwoso udi yinenu. 35Pakadi amatôya noku, akangata dimpa, akaxinga Ncembi ku mpala yabo ya bungi bwabo, akadinyowa yi akabanga kudya. 36Yi micima yabo ya bungi bwabo yakaxekyelela, yi mikyeabo kabidi bakangata bidya. 37Twakadi munda mwa kibusu bantu nkama ibidi yi masangi sambwali yi bantu basambomo. 38Pakakwokutabo, bakateka kibusu bosala, bakakwecikisa masangu munda mwa mai. 39Yi pakalwa lubangu, bakadi kabasolembetela mbata ; mo bakamona bea dibete yi mbongo, yi bakakwelañana nkanyi, ambeci kwendesa kibusu papa noku. 40Yi pakalekyelabo ngindu bakayixiya munda mwa mai, yi bakalekyela miekulu ya bikobelu ndongo ; bakabandisa lolo mbuxa a ntôi yi bakakwenda lwa mbongo. 41Mo pakafikabo ku kidi kiakitelañana mai abidi bakakwomesa kibusu ; ntôi lolo akasuba yi akasala kutena kwenda, kaninga kicini kia nyuma kiakabanga kumwangalaka ku buxitu bwa diele. 42Yi masalai akadi ene, tuxipi misungi, ximbi muntu uxekwowa diakwa kuya ongoloka. 43Kaninga kapalai kakakyeba kusamunina Paulu kakabaximbila lukanyi lwabo ; yi kakatôya ene, bobo babili makwa badieli mikyeabo mu mai kuya buxi ku mbata ; 44yi bena kwabo, banga ku mabaya yi banga ku bintani bia mu kibusu. Mo nako bakasabuka bungi bwabo ngengele ngengele ku mbata.

Currently Selected:

MAKISA 27: Luna_NT

Highlight

Copy