MAKISA 24

1YI kunyuma kwa matuku atano kwakalwa bokanda bunene Anania yi banga babakulu, yi kitenci yinabo dina dienci ene, Tetulo ; yi bakasanya Paulu ku mpala a mulopwe. 2Yi pakabikidibwayi, Tetulo akabanga kumusanya, ene, Bwalo butwamona polo mungi kudi, yi madi anengela amakwelebwa mu bubila bobu bwalo bwa lukanyi lwebe, 3twaxinga matuku moso yi ku bidi bioso, idyanga Felixi, yi biloba bingi. 4Kaninga bintaxedya kikondo kiebe kingi, nkwalomba unatwombwa kakondo kabende ku bonkangi bwebe. 5Bwalo butwamasafiana muntu you muna mulaku mungi, mutombokyexi a bena Yuda ku bungi bwa loboko, yi muntu munene a kibumbu kia baNasalete ; 6-7akapalala lolo kwona tempelo ; utwakakwata coco kabidi ; 8yi owe, ndo unamwapangusa mikyebe, unalubukwa kulembetela malo aa noku moso atwamamusanya. 9Yi bena Yuda kabidi bakakwetabusafiana yi lusanyi, ene, malo aa adi mo nako.

10Yi pakadi mulopwe amamusongela kianca, Paulu akakyata ene, Bwalo bunkwalubukwa ene, wapwakala musambodi a malo a bubila bobu mbula mingi, ndo bungwakyata ku bwalo bwamene yi mulukutu ; 11bwalo buxelubukwa ene, matuku atani mo disangi yi abidi, anakaya ku Yelusaleme kuya xingila ; 12yi ku tempelo kabasongusañana ngwelesafiana yi muntu mbata, ndo kuteka muyengi ă bantu kumoni, ndo munda mwa bixingidilu, ndo mu bula. 13Kabasolubukwa pako kwebesa malo angwasanyilabo nkyekyu. 14Kaninga nkwasakolela ene, Mu Ncila abikilabo ene, Busaluki, ndo mungwasadila Ncembi a batetecu, ndi mu kwetabusa bintu bioso biamafundibwa mu bwadi, yi kudi badimuxi ; 15ndi yi mudingidilu ă Ncembi ădingidilabo mikyeabo, ene, Kubika kwa bafu kunalwa kwa bena nkwami yi kwa bena bubi. 16Ku bwalo bobu ndo kungwapalala kwakala yi kilubukilu kia munda kitena kwona ku bintu bioso ku meso a Ncembi yi ku meso a bantu. 17Pakamadika lolo mbula mingi, nakafika, ndi mu kucwadila bubila bwamene malongi a mwengo, yi amo malongi. 18Mbwôso bakangusañana mu tempelo, namakusudibwa, kiena yi bantu, ndo yi muyengi kumoni. 19Kaninga banga bena Yuda ba mu Asia :—baxemoneka kunu ku mpala ebe ndo kungusanya, ndo batani yi bwalo kutôya ku mucwe ămene. 20Kaninga babalumi baba mikyeabo batôyi dia kwona kwoso kwakamonabo panakakwemana ku kikokye, 21kutena ambeci bwalo bwa diyi dedi dimodimwe dinakakwamena, binakakwemana pakacikaci pabo, ene, Ku bwalo bwa kubika kwa bafu ndo kunamasambolebwa kunudi lelo.

22Mo Felixi, pakalubukwayi sôsôlwo dia Ncila, akabopisa, ene, Panapweka Lisiasa kiliaka, nakumana bwalo bwenu. 23Yi akatôyela kapalai ene, amunami, amwendesi bimpe, kamunyañanini muntu mwoso a bimbila bienci kumusadila.

24Mo kunyuma kwa matuku mabende kwakalwa Felixi yi Dusila mukasanci, akadi muna Yuda, akatuma ndo kwangata Paulu, yi akamwombwa bwalo bwa kwetabuxila Kalistu Yisu. 25Yi pakasakolayi dia nkwami, yi dia mulangu ku mucima, yi dia lopelo lutanalwa, Felixi akalukuta, yi akapingasa ene, Yaka biebe nkyekyu ; panamona kipoma kinengela nakukubikila kundi. 26Akadingila kabidi mpalata ambeci yinamupebwa kudi Paulu ; biakamubikilayi lolo mabikila mangi, yi akakwambilañana yinanci. 27Mo pakapwa mbula ibidi, Felixi akanyamunibwa kudi Pôkio Festo akamukita ; yi Felixi bwalo bwakakyebayi kumonebwa yi dikasa dinengela kudi bena Yuda, akaxiya Paulu ku lukanu.

Currently Selected:

MAKISA 24: Luna_NT

Highlight

Copy