MAKISA 15

1YI kanga bantu bakalwa mu Yudiya, yi bakakweyesa bakunyi, ene, Kutena nwamakwelebwa bwadi luna bidi mwosambu ă Mosese, kanunalubukwa kupandixibwa. 2Pakalwa lolo mpeto yi mbata mungi yinabo kudi Paulu yi Banabasa, bakalungika ene, Paulu yi Banabasa yi banga bena kwabo, bayi ku Yelusaleme kudi batumibwi yi babakulu, dia bwalo bobu. 3Mbwôso bobo bakaxindikixibwa mu ncila abo kudi kikokye bakatanga Finiki yi Samalia, badi mu kwambila dia kukulumuka kwa mabila. Yi bakafikisa kiango kingi kudi bungi bwa bakunyi. 4Pakafikabo ku Yelusaleme, bakaxekyelelebwa kudi kikokye, yi batumibwi, yi babakulu, yi bakakwambila bintu bioso biakakwenca Ncembi yinabo. 5Kaninga banga ba butonga bwa baFalixi bakakwetabusa, bakakwemana, ene, Baxebela bwadi, baxebatôyela ene, banami bwadi bwa Mosese.

6Yi batumibwi yi babakulu bakasangila ndo kwela bwalo bobu nkanyi. 7Pakadi lolo mbata yamakwelexebwa bongonco, Pita akakwemana, akabambila ene, Bena kwami, nwalubukwa ene, Pôi matuku a buxi pakasungula Ncembi kunudi, ene, ku musuku ămene kuxekwombwa mabila diyi dia losangu lunengela, bixekwetabusabo. 8Yi Ncembi alubukwa micima, akabatôbôlela ntôbô, akabapa Mwoxixi a babala bea mikyecu kabidi, 9yi akadi kasotuxiyañanisa yinabo pô, akakusula micima yabo ku kwetabusa. 10Mbwôso kukai nwamakwelekyesa Ncembi nkyekyu, yi kuteka mwosangi pa xingu a beyi, utabiyi ndo batetecu ndo mikyecu kucwala ? 11Kate twamakwetabusa ene, tunapandixibwa môyo ku lwoxixi lwa Fumu Yisu, mupandixilu yinabo umoumwe.

12Yi bungi bwa kibumbu bakapudikila ; yi bakakwombwa Banabasa yi Paulu bakatôya dia bilayixilu yi bikamakama biakakwenca Ncembi kudibo kudi mabila. 13Yi pakadi bamalekyela, Yakobo akakulumuna ene, Bena kwami, nungwombwi ; 14Ximono aputôya mwakadingila Ncembi mabila ku buxi buxi, ndo kusokola bantu kudibo bwalo bwa dina dienci. 15Ku bwalo bobu kwamafwanañana meyi a badimuxi, bea biakafundibwa ene, 16Kunyuma kwa bintu bebi nakupiñana, yi nakwabaka kabidi ncibo a Dafidi amabunduka, yi nakwabaka kabidi bisasa bienci, yi nakumwemanika, 17bixepalalabo Fumu bamasala, yi bungi bwa mabila badi yi dina diamene diamatambibwa kulu kwabo. Fumu ndo atôya noku, encenca bintu bebi, 18biamalubukibwa pôi bubangabanga bwa loboko.

19Mbwôso meme ngwasambola ene, Katutepexi bantu ba mabila bamakulumuka kudi Ncembi ; 20kate tubafundili ene, bancili mbindu ya ngixi, yi diendela, yi nyama yamafinibwa xingu, yi maxi. 21Bwalo budi Mosese yi bantu ku bula bwoso bamwambidila, pôi mieciya ya kalikali, amabadibwa ku bixingidilu ku diba dioso dia sabado.

22Ku kikondo kieki kwakamonebwa loko kudi batumibwi, yi babakulu, yi bungi bwa kikokye, kusungula bantu ba mu kibumbu kiabo, ndo kubatuma ku Antioko yi Paulu yi Banabasa : Yudaxi abikidibwa ene, Basaba, yi Silasa, bantu banene ba bakunyi ; 23yi bakatuma mukanda ku makaci abo, ene, Batumibwi yi babakulu kudi bakunyi ba mabila ba mu Antioko yi mu Silia yi mu Kilikia, môyo. 24Bwalo butwamakwombwa ene, banga bamabatuka kutudi bamanutepesa yi meyi, bamapeteya micima yenu, batutatôyeli nako pô ; 25kwamamonebwa loko kutudi, bitwamakwetabusañana cu-a-bwoso, kusungula bantu, kunutuminabo yi banangibwi becu, Banabasa yi Paulu, 26bantu bamalongola mieyo yabo ku mucwe ă dina dia Fumwecu Yisu Kalistu. 27Mbwôso twaputuma Yudaxi yi Silasa, bananwambila bintu bebi kabidi mikyeabo ku diyi dia musuku. 28Bwalo bwamamonebwa loko kudi Mwoxixi a babala yi kutudi, kumoni kunwombuludisa bunga buxitu, butena bintu bebi bia buxitu ; 29ene, nuncili bintu biamalongolebwa kudi ngixi, yi maxi, yi nyama amafinibwa xingu, yi diendela ; aka nudianamuna mikyenu kudibio, nunakwenca loko. Nusali polo.

30Mbwôso bobo, pakalekyelebwabo, bakapweka ku Antioko ; yi pakadi bamakokyeya kibumbu, bakalongola mukanda. 31Yi pakadi bamaubala bakaxekyelela kibondelu. 32Yudaxi lolo yi Silasa, bakadi badimuxi mikyeabo kabidi, bakabondabonda bakunyi yi meyi mangi, yi bakabakolesa. 33-34Yi pakadi bamadikisa kikondo koku, bakalekyelebwa yi polo kudi bakunyi bayi kudibo bakabatuma. 35Kaninga Paulu yi Banabasa bakasala mu Antioko, badi mu kweyesa yi kwambila diyi dia Fumu, yi bamo bantu kabidi bangi.

36Kaninga kunyuma kwa matuku mabende, Paulu akatôyela Banabasa ene, Tupiñani nkyekyu kuya dingila bakunyi ku bula bwoso kutwamakwambila diyi dia Fumu, mwakalabo.

37Yi Banabasa akakisa ene, bacwali yinabo Yoano kabidi abikidibwa ene, Maku ; 38kaninga Paulu akakwenca ene, kumoni loko kumucwala yinabo, you akabakadeya mu Pamafilia, yi kayili yinabo ku mudimo. 39Mbwôso mbata yakakwelexebwa mungi mungi, biakanamukananabo ; Banabasa lolo akacwala Maku yi akaya lwa kibusu ku Kupuloso ; 40mo Paulu akasungula Silasa, yi akaya, amalongolebwa kudi bakunyi ku lwoxixi lwa Fumu. 41Yi akatanga Silia yi Kilikia, udi mu kukolesa bikokye.

Currently Selected:

MAKISA 15: Luna_NT

Highlight

Copy