MAKISA 16

1YI akalwa ku Debe yi ku Lustula ; yi mona, mweyi akadi koku, dina dienci ene, Timoteo, mwana a mwamukaxi a bena Yuda, mwetabuxi, kaninga tetenci ndo muna Ngiliki. 2You akatôbôlebwa ntôbô yinengela kudi bakunyi ba ku Lustula yi ba ku Ikonyumu. 3Paulu akananga kumwendesa yinanci, ndo biakamwangatayi yi akamwela bwadi ku bwalo bwa bena Yuda bakadi mu mbata yei ; bwalo bwakalubukwa bungi bwabo ene, tetenci udi muna Ngiliki. 4Yi pakatangabo mu mala, bakabalongola milangu kunama yakalangibwa kudi batumibwi yi babakulu bakadi mu Yelusaleme. 5Mbwôso bikokye biakasubixibwa mu kwetabusa, yi bakalunda ku bungi dituku dioso.

6Yi bakadika mu mbata a Filingia yi Ngalatia, bwalo bwakalangibwabo mulangu kudi Mwoxixi a babala, kumoni kutôya diyi mu Asia ; 7yi pakapwekabo pepe yi Misia bakapalala kuya ku Bitunia, yi Mwoxixi a Yisu akadi kasobayisa ; 8pakadikabo Misia lolo, bakapweka ku Toloasa. 9Yi dilu diakamoneka kudi Paulu ku butuku ; mwamulumi, muna Makyedonia, akadiko, amakwemana yi amamuxengula ene, Sabuka ku Makyedonia, utukwacisi. 10Yi pakadi amamona dilu twakapalala mangwoso kwenda ku Makyedonia, twakalembetela ene, Ncembi aputubikila tubambili losangu lunengela.

11Mbwôso twakancuka lwa kibusu ku Toloasa, yi twakaxembama swi kuya ku Samotolaki, yi ku diba diamubidi ku Neapoli ; 12kunyuma ku Filipi, kudi bula bwa buxi bwa kicini kieki kia Makyedonia, kudi kingandu kia bena Loma, Yi twakasala ku bula bobu matuku mabende. 13Yi ku diba dia sabado twakaya kunci kwa kibwelelu pepe yi ncedi, pakadi mwosambu ăbo ndo kulombela ; yi twakaxikama yi twakakwambila babakaxi bakadi bamasangilañana. 14Yi mwamukaxi umoumwe, dina dienci ene, Lidia, mwodixi a bilamba, muna bula bwa Tiatila, akaxingiia Ncembi, akatwombwa ; akadipula Fumu mucima ănci ndo kwombwela bintu biakatôyebwa kudi Paulu. 15Pakadi amanumeyebwa yi bena nkumbu anci, akatubondabonda ene, Ndo nwamangwenca ndi muna kibaku ku bwalo bwa Fumu, nulwi ku ncibo amene, nusali koku. Yi akatwetabuxisa.

16Pakadi lolo tutanaya kuya lombela, mupika a babakaxi, akakala yi kidimu kia bubuki, akapomana yinecu, akafikixila bafumu banci bima bingi bwalo bwa bubuki bwanci. 17You akalabela Paulu yi coco, yi akakwamena ene, Babalumi baba badi basadi ba Ncembi a kulu, bamanwambila dia ncila a kupandixibwa. 18Nako kwakakwencayi matuku mangi. Kaninga Paulu akakwombwa buxitu bungi, akakulumuka, akatôyela kidimu ene, Nkwatôyela mu dina dia Yisu Kalistu, ene, batuka munda mwanci. Yi kiakabatuka pa ola you.

19Bafumu banci lolo, pakamonabo mudingidilu ă bima biabo ămancuka, bakakwata Paulu yi Silasa, yi bakabaputulula ku dibanca dia kisalu, ku mpala ya bantu banene ; 20yi pakadi bamabafikisa kudi basambodi ba malo, bakatôya ene, Babalumi baba, badi bena Yuaa, bamanyingisa bula bwecu bongonco, 21beyesa miesambu yitasolelekyela coco kwangata, ndo kwenca, badi bena Loma. 22Yi kimbukuma kiakabasangila ndongo, yi basambodi ba malo bakabapulula bilamba biabo, yi bakatôya ene, bakakumi mici. 23Pakadi bamababaka miekolola mingi, bakabela mu ncibo a lukanu, bakatôyela munami a ncibo ene, abanami kunama kwa loko ; 24you noku, papwangatayi diyi diaku dedi, akabela mu ncibo a munda yi akasuka makasa abo mibumba nda. 25Kaninga pakacikaci pa butuku Paulu yi Silasa bakadi mu kulomba, yi bakakwembikixila Ncembi misambu, yi misungi yakabombwela. 26Yi loboko lwakatepa kutepa kungi mangwoso, biakanyingixibwa bibangolelu muxi mwa ncibo a lukanu ; yi mbelo mioso yakadipudibwa mangwoso, yi mixinga yabo ya bungi bwabo yakasudibwa. 27Yi munami a ncibo akabixibwa mu tulu, yi akamona mbelo ololwo ya ncibo a lukanu, akasomona mwele ănci, uxedixipa mikyenci, akakwenca ene, misungi yamakwongoloka. 28Mo Paulu akakwamena yi diyi dikola ene, Kuditatixi mikyebe, bwalo bututani kunu bungi bwecu kô. 29Yi akabikila minda, akalwa munda lubilu, udi mu kulukuta lukomba, akapona paxi ku mpala ya Paulu yi Silasa ; 30akababatusa lolo yi akatôya ene, Bakyelengi, nkisi beci ndo kupandixibwa môyo ? 31Yi bakatôya ene, Etabuxila Fumu Yisu, yi unapandixibwa, owe yi nkumbu ebe. 32Yi bakamwambila diyi dia Fumu, yi bantu boso bakadi mu ncibo anci. 33Yi akabangata pa ola you a butuku yi akakusula miekolola yabo ; yi akanumeyebwa, mikyenci yi bena nkumbu anci boso mangwoso. 34Yi akababwesa munda mwa ncibo anci, yi akakwadisa mesa, yi akaxekyelela, yi bungi bwa ncibo anci, amakwetabuxila Ncembi.

35Mo pakalwa munyinya, basambodi ba malo bakatuma masalai ene, Lekyela babalumi baba. 36Yi munami akasakolela Paulu meyi aa, ene, Basambodi ba malo bamatuma ene, nulekyelebwi ; mbwôso nkyekyu nubatuki, nuyi polo. 37Kaninga Paulu akabambila, ene, Bamatukuma ku mpala ya bantu, kutena twamabelebwa, coco badi bena Loma, yi bamatwela mu ncibo a lukanu ; nkyekyu lolo batwatenyeka ku busoko ? Kañana ; kumoni ; kate balwi mikyeabo batubatusi. 38Yi masalai akasakolela basambodi ba malo meyi aa, yi bakacina pakakwombwabo ene, badi bena Loma. 39Yi bakalwa babondabonda, yi pakadi bamababatusa kunci, bakabalomba babatuki mu bula. 40Yi bakabatuka mu ncibo a lukanu, yi bakalwa kwa Lidia ; yi pakadi bamamona bakunyi, bakababondabonda yi bakancuka.

Currently Selected:

MAKISA 16: Luna_NT

Highlight

Copy