MAKISA 14

1KU Ikonyumu lolo kwakabwelabo ndongo mu kixingidilu kia bena Yuda, yi bakatôya kutôya kwa noku, biakakwetabusa kibumbu kinene kia bena Yuda yi baNgiliki. 2Kaninga bena Yuda batakwetabusa bakanyingisa nkanyi ya bena mabila yi bakabanyañanisa bakunyi. 3Mbwôso bakasala koku kikondo kingi, badi mu kutôya yi mucima mu Fumu, akakwencañana yi diyi dia lwoxixi lwanci, akapa bilayixilu yi bikamakama kwencebwa ku makaci abo. 4Mo bungi bwa bula bakakwatolañana : banga bakadi yi bena Yuda, yi banga yi batumibwi. 5Yi pakadi bamasangilañana yi bena mabila yi bena Yuda yi bantu babo banene, kulwa bakolomona, yi kubela mabwe, 6bakalubukwa, yi bakacina ku mala a Lukaonia, ku Lustula yi ku Debe, yi ku mbata papa, 7yi bakakwambila losangu lunengela koku.

8Ku Lustula lolo kwakaxikama muntu amafwa mikolo, kikomo pôi difu dia mamanci, utakwenda pô. 9Yei akakwombwa Paulu udi mu kutôya ; you noku akamuxingulula akamumona udi yi kwetabusa kwa kupandixibwa, 10akatôya yi diyi dikola ene, Emana ku makasa ebe mwema. Yi akatamba kulu, akakwenda. 11Pakamona bimbukuma mwakakwenca Paulu, bakabandisa meyi abo Luna Lukaonia ene, Bancembi bamakwelekyexebwa luna bantu bamapweka kutudi. 12Yi bakabikila Banabasa ene, Seusu, yi Paulu ene, Eleme, bwalo bwakadikayi yi kutôya. 13Yi bokanda bwa Seusu akakala ku mpala a bula, bwakacwala ñombi yi bidinga bia masusu ku bibwelelu, buxelongola malongi mosa yi bimbukuma. 14Kaninga pakadi batumibwi Banabasa yi Paulu bamakwombwa, bakapanda bilamba biabo yi bakabatuka mbilu pakacikaci pa kimbukuma, badi mu kwamena 15ene, Babalumi, kukai nwencenca bintu bebi ? Coco kabidi badi bantu butonga bumobumwe yinenu, twamaiwa nwambila losangu lunengela ene, nukulumuki kudi bintu bebi bia kanana kudi Ncembi a môyo, akapanga diulu yi loboko yi mai manene, yi bintu bioso bidi munda mwabio ; 16yei, ku mieciya ya kalikali, akalekyela mabila moso ayi yi miesambu yabo mikyeabo. 17Kaninga kadixiyili mikyenci kutena ntôbô, bwalo bwakakwencayi kunengela, akanupela mu diulu yi mbula yi layinga ya loko, akakwolubisa micima yenu yi bidya yi kiango. 18Kaninga isanga ku meyi aa kuxepwangwabo kuximba bimbukuma, kababalongodi malongi mosa.

19Mo koku kwakalwa bena Yuda ba ku Antioko yi ba ku Ikonyumu ; yi pakadi bamakwetabuxisa bimbukuma, bakakwela Paulu mabwe, yi bakamuputulula kunci kwa bula, bakakisa ene, afufwa. 20Kaninga pakamudinga beyi, yei akabika yi akabwela munda mwa bula. Mankyelo lolo akancuka yi Banabasa kuya ku Debe. 21Yi pakadi bamakwambila bula bobu losangu lunengela, yi bamakwetabuxisa beyi bangi, bakapiñana ku Lustula yi ku Ikonyumu yi ku Antioko, 22yi bakakolesa micima ya beyi, bakababondabonda baxini yi kwetabusa, ene lolo, ku mpeya mingi ndo kutwabwela mu bufumu bwa Ncembi. 23Yi pakadi bamabasungudila babakulu mu kikokye kioso, yi bamalomba yi kuncila kwa bidya, bakabateka ku makaci a Fumu akakwetabuxilabo 24Yi bakatanga mbata a Pisidia yi bakalwa ku Pamafilia. 25Yi pakakwambilabo diyi mu Penge bakapweka ku Atalia ; 26bakasabuka koku lolo ku Antioko, kwakatekyebwabo mu lwoxixi lwa Ncembi, bwalo bwa mudimo ăkamanabo. 27Pakadi bamafika, yi bamakokyeya kikokye, bakasakola bintu bioso biakakwenca Ncembi yinabo, mwakadipudilayi mabila mbelo a kwetabusa. 28Yi bakasala yi beyi kikondo kingi.

Currently Selected:

MAKISA 14: Luna_NT

Highlight

Copy