1 PITA 1

1PITA, mutumibwi a Yisu Kalistu, kudi basungudibwi badi bantu babene ba Lucakacaka mu Ponto, Ngalatia, Kapadokia, Asia, yi Bitinia ; 2bamasungudibwa ku kilubukilu kia buxi kia Ncembi Tete, yi bamabalolebwa ku kubalolebwa kwa Mwoxixi, ndo kwakala yi diedya, yi kucakibwa kwa maxi a Yisu Kalistu ; lwoxixi lwakali yinenu yi polo bungi bungi.

3Ncembi yi Tete a Fumwecu Yisu Kalistu atumbixibwi, akatulela kabidi bea biakadi mwengo ănci mungi, bituxeakala yi mudingidilu ă môyo bwalo bwa kubika kwa Yisu Kalistu kudi bafu, 4bituxeakala yi mwokito utena musalu, yi utena mbindu, yi utasolengowa, ămabumbibwa mu melu kulu ku micwe yenu ; 5nonu bamanamibwa ku ngulu ya Ncembi ku kwetabusa, pôi ku kipandilu kia môyo kitanalanda kwebexebwa ku kikondo kia ku sula. 6Ku bwalo bobu ndo kunwaxekyelela kungi ; isanga nwamatekyebwa yi buxitu ku nkyekyu you yi ku kakondo kabende, ndo bwalo budi noku, kudi bielekyexelu binga ; 7nako, kwelekyesa kwa kwetabusa kwenu, kwamadika ôlo dipiko unancimina isanga ămakwelekyexebwa ku mudilu, kuxesañanibwa yi lotumbu yi dikai yi kinemu, ku kiebexelu kia Yisu Kalistu ; 8unwamananga kutena nwamamumona ; yi isanga kanusomumona nkyekyu, kaninga nwamamwetabuxila yi nwamaxekyelela kungi yi kiango kitabiyi kusakolebwa, kiamakwolubila dikai ; 9yi nudi mu kwangata sayi ya kwetabusa kwenu, kupandixibwa kwa bidimu bienu.

10Ku bwalo bwa kupandixibwa koku, badimuxi bakakwakwala yi bakapalala kungi, bakadimusa dia lwoxixi luxelwa kunudi ; 11bakadi mu kupalala kikondo, yi butonga bwa kikondo, kiakakwebesa Mwoxixi a Kalistu akadi munda mwabo, pakatôbôlayi buxi dia masama a Kalistu yi dia makai axealanda kunyuma. 12Kwakabebexebwa ene, kumoni kudibo mikyeabo mo kunudi ndo kwakalongolabo bintu bebi biamanwambidibwa kudi bantu bamanwambila losangu lunengela kudi Mwoxixi a babala akatumibwa mu diulu ; bintu biamakyeba bangele kuxixima.

13Mbwôso nukobi makondu a nkanyi yenu yi nwakali yi mulangu, nudi mu kudingidila lwoxixi dyendeli lunacwadibwa kunudi ku kiebexelu kia Yisu Kalistu ; 14bea bana ba diedya, kanufwanixibwi yi xindilu yenu ya kalikali ku kikondo kia bwilwa bwenu ; 15kate bea bidi you babala akanubikila ndo binwakali nonu kabidi babala ku mwosambu ěnu muncimancima ; 16bwalo bwakafundibwa ene, Nunakala babala, bwalo bundi meme babala.

17Yi ndo nwamakwabila you ene, Tete, amasambola mudimo ă muntu mwoso kutena kuyila bantu kikanda, nudikisi kikondo kia kuxikama kwenu yi bowa ; 18bwalo bunwalubukwa ene, nwakapikudibwa, kumoni yi bintu binasaluka, bea mpalata yi ôlo, kudi mwosambu ěnu ă kanana ăkanuxiyidibwa kudi batetenu ; 19kate yi maxi a dipiko, bea a mwana a mukwakwa utena bwalo bubi yi utena kantobo, maxi a Kalistu ; 20akalubukibwa sôsôlwo buxi bwakadi loboko kalusobangibwa, mo akakwebexebwa ku sula kwa bikondo ku micwe yenu ; 21ya nonu badi betabuxi, bamakwetabuxila Ncembi ku bwalo bwanci, akamubisa kudi bafu, yi akamupa dikai ; bixeakala kwetabusa kwenu yi mudingidilu enu kudi Ncembi.

22Bwalo bunwamasusula micima yenu ku kwedeya kwenu kwa sôsôlwo ku nyinga ya bakunyi yitena mancanga, nunanganani kungi ku mucima ă babala ; 23bwalo bunwamalelebwa kabidi kumoni ku mitongu yalubukwa kusaluka, kate ku mitongu yitabiyi kusaluka, ku diyi dia Ncembi didi yi môyo yi dinasala kô kô. 24Bwalo budi munyu mwoso bea bilo, yi bungi bwa dikai diau didi bea disusu dia bilo. Bilo ndo biomoma, yi disusu ndo dinapona ; mo diyi dia Fumu dinasala kô kô. 25Dedi ndo diyi dia losangu lunengela diakanwambidibwa.

Currently Selected:

1 PITA 1: Luna_NT

Highlight

Copy

Compare