1 KOLINTI 6

1MUNTU mwoso kwenu, ndo utani yi muna kwanci bwalo, udi yi mucima ă kwimuka kimu ku mpala ya bena mabi, yi kumoni ku mpala ya bena babala ? 2Nonu kanusolubukwa ene, bena babala banasambola loboko ? Yi ndo loboko lunasambolebwa kunudi, nonu kanusolelekyela yi kusambola malo mabende nci ? 3Kanusolubukwa ene, coco tunasambola bangele ? Ape ki malo a môyo ou kabidi ? 4Aka lolo nudi yi malo a bintu bia môyo ou, nuteki bantu kwasambola badi babende nci mu kikokye. 5Ngwatôya ndo kunwombwesa bundu. Kudi lolo noku ; muna bwinu kwenu nyô ? Kumoni isanga umoumwe unalubukwa kusambola muna kwanci ? 6Mo mwakunyi uyeya kimu yi mwakunyi, ku mpala ya bantu batena yi kwetabusa kabidi. 7Mbwôso nudi yi kwona kungi isanga nkyekyu, bwalo bunwimukanana bimu. Kukai kanusotunga kwonenebwa ? Kukai kanusotunga kufinibwa ? 8Kaninga nonu nwonona yi nwafina, isanga bena kwenu.

9Kanusolubukwa ene, bena mabi kabanakita bufumu bwa Ncembi mwokito ? Kanudimbibwi ; ndo badibi, ndo baxingidi ba ngixi, ndo bena mendela, ndo bena mabombu, ndo bobo bamadiona mikyeabo yi babalumi, 10ndo befi, ndo bena luxindilu, ndo bena nkolwa ya malufu, ndo bena mpolo, ndo bafinañani, kabanakita bufumu bwa Ncembi i mwokito. 11Yi banga badi yinenu bakadi mo nako ; kate nwamakusudibwa, kate nwamabalolebwa, kate nwamasuwixibwa ku dina dia Fumu Yisu, yi kudi Mwoxixi a Ncembi ecu.

12Bintu bioso bialelekyela ndo kwencebwa kundi, kate bintu bioso kabina yi kipoma kinengela ; bintu bioso bialelekyela ndo kwencebwa kundi, kate kinapwexebwa muxi mwa bumanya bwa kintu kioso. 13Bidya ku bwalo bwa difu, yi difu ku bwalo bwa bidya ; mo Ncembi unancimisa yi dedi yi bebi. Mo mumbidi kauna ku bwalo bwa budibi, kate ku bwalo bwa Fumu, yi Fumu ku bwalo bwa mumbidi. 14Ncembi lolo akabisa Fumu, yi unatubisa coco ku ngulu yenci. 15Nonu kanusolubukwa ene, mimbidi yenu idi bicini bia mumbidi bia Kalistu ? Ngwangati lolo bicini bia Kalistu, mbiteki bicini bia mudibi ? Ai ! Kumoni. 16Ape kanusolubukwa ene, you amasambikibwa yi mudibi udi mumbidi umounwe ? Bwalo bwakatôyayi ene, Babidi banakala munyu umoumwe. 17Kaninga yei amasambikibwa yi Fumu udi mwoxixi umoumwe. 18Nucini budibi. Kwona kwoso kwonona muntu kudi kunci kwa numbidi ; mo you onona ku budibi amakwonena mumbidi ănci mikyenci. 19Ape kanusolubukwa ene, mumbidi ěnu udi tempelo a Mwoxixi a babala udi munda mwenu, unwapwangata kudi Ncembi, yi kanuna bantu benu mikyenu ? 20Bwalo bunwakakwodibwa yi diso ; mbwôso nutumbisi Ncembi mu mumbidi ěnu.

Currently Selected:

1 KOLINTI 6: Luna_NT

Highlight

Copy

Compare