1 KOLINTI 14
14
1NULABELI nyinga, yi nukyebi kungi malongi a Mwoxixi, kaninga nutungi ndo kudimusa. 2Bwalo bwa you amatôya mu ludimi lutasolubukibwa kasotôyela bantu kate Ncembi ; bwalo butasomwombwa muntu ; mo ku kidimu kienci ndo kwatôyayi malo a bwisa. 3Mo you amadimusa amatôyela bantu yi kiabakilu, yi kisubixilu, yi kibondelu. 4You amatôya mu ludimi amadiabaka mikyenci ; mo you amadimusa amakwabaka kikokye. 5Ngwadila pako nuxetôya bungi bwenu yi ndimi, mo ngwatunga nuxedimusa ; bwalo bwadika mudimuxi munene, kumoni you amatôya yi ndimi, kutena yei amasakola bixeangata kikokye kiabakilu. 6Nkyekyu lolo bakunyi, ndo nakulwa kunudi ndi mu kutôya yi ndimi, nakunutetowesa kai kutena namanutôyela ndo yi kiebexelu, ndo yi kilubukilu, ndo yi kidimuxilu, ndo yi kieyexelu ? 7Bintu biamatôya diyi, isanga kabina yi môyo, ndo muxembi, ndo lusese, aka kabisoxiyañanisa meyi, musambu unalubukibwa beci ămakumibwa ku muxembi ndo ku lusese ? 8Bwalo bwa mpungi ndo amasakola diyi dia kanana, ñani unadilungika bwalo bwa mbita ? 9Mo nako nonu, kutena nwamasakola ku ludimi meyi amalembetelebwa loko, bwalo bunalubukibwa beci bwamatôyebwa ? bwalo bununatôya kulu ku mwoxixi kanana. 10Meyi adiko ku loboko, ambeci ntonga yi ntonga, yi kumoni diyi dimodimwe ditena yi sakolo. 11Aka lolo meme kisokyendula diyi, nakwakala yi muntu you atôya bea Musenci, yi you atôya unakala bea Musenci yinami. 12Mo nako nonu, bwalo bunudi yi nyinga ya malongi a Mwoxixi, nupalali kulekola yinao bwalo bwa kwabaka kwa kikokye. 13Mbwôso you amatôya mu ludimi alombi bixesakolayi. 14Bwalo ndo ngwalomba mu ludimi, kidimu kiamene kiamalomba kate lukanyi lwamene ludi kikuta. 15Mbwôso bwalo budi beci ? Nakulomba yi kidimu yi nakulomba yi lukanyi kabidi ; nakwembikisa yi kidimu yi nakwembikisa yi lukanyi kabidi. 16Ximbi, ndo owe wamatumbisa yi kidimu kiebe, you axikama mu bolelo bwa bantu batabiyi, unatôya Amen beci ku kikondo kiamaxinga owe biloba ? bwalo butasolubukwayi mwatôya. 17Owe waxinga loko sôsôlwo, kate munga you kasokwabakibwa. 18Ngwaxinga Ncembi bwalo bunamanudika bungi bwenu yi kutôya kwa ndimi. 19Kaninga mu kikokye nxetunga kutôya meyi atano yi lukanyi lwamene binxekweyesa banga kabidi, kumoni kutôya meyi nkone disangi mu ludimi.
20Bakunyi, kanwakadi babaki ku lukanyi ; kaninga ku bwalo bwa mwoxingi nwakali babaki ; mo ku bwalo bwa lukanyi nwakali babakulu. 21Ku bwadi kwamafundibwa ene, Kudi bantu ba ndimi ya babene, yi ku milomo ya babene ndo kunatôyela bantu baba ; mo isanga nako bobo kabanangwombwa ; Fumu ndo atôya noku. 22Mbwôso ndimi idi kiiayixilu, kumoni kudi bantu bamakwetabusa, kate kudi bantu batasokwetabusa ; mo kidimuxilu kidi bwalo kumoni bwa bantu batasokwetabusa, kate bwa bantu bamakwetabusa. 23Mbwôso ndo bungi bwa kikokye bamasangila kidi kimokimwe, yi bungi bwabo bamatôya yi ndimi, aka bantu bamabwela batasolubukwa ndo batasokwetabusa, ki banatôya ene, nwamapasuka ? 24Mo ndo bantu boso bamadimusa, yi muntu amabwela utasokwetabusa ndo utasolubukwa, amatongolebwa kudi bantu boso, amabelebwa kudi bantu boso ; 25malo a bwisa a mu mucima ănci amakwebexebwa, yi mo nako unapona ku mpala anci yi unaxingila Ncembi, yi unacwala losangu ene, Ncembi udi yinenu sôsôlwo.
26Mbwôso bwalo budi beci, bakunyi ? Oka nwasangila, muntu mwoso udi yi musambu, udi yi kieyexelu, udi yi kiebexelu, udi yi ludimi, udi yi kisakolelu. Bintu bioso biencebwi ndo kwabakanana. 27Aka muntu mwoso amatôya mu ludimi, batôyi babidi ndo isanga basatu, (banga kumoni) ; yi balandudilañani ; yi muntu umoumwe asakoli. 28Mo akali musakodi kienako, apudikili mu kikokye ; aditôyeli munda mwanci yi kudi Ncembi. 29Badimuxi lolo batôyi ndo babidi ndo basatu ; banga basamboli. 30Mo ndo kiebexelu kiamakwebexebwa munga amaxikama padiyi, you a buxi apudikili. 31Bwalo bununadimusa ku muntu ku muntu, bixekweya bantu boso, bixesubixibwa bungi bwabo. 32Yi bidimu bia badimuxi biamakwedeya badimuxi. 33Bwalo butena Ncembi muna lwobuncu, kate muna polo, bea mu bikokye bioso bia bena babaia.
34Babakaxi benu bapudikili mu bikokye, bwalo butasobapebwa kutôya, kate ndo kwakala yi diedya, bea biamatôya kabidi bwadi. 35Yi ndo bakyeba kweya kintu kioso, bapangusi babayabo kunci kwabo ; bwalo bwapwakala bundu mwamukaxi kutôya mu kikokye. 36Kai ? Diyi dia Ncembi diakabatuka kunudi ? sungu diamafika kunudi batupu ?
37Aka muntu udiencenca ene, udi mudimuxi, ndo udimuna Mwoxixi, alembeteli bintu binwafundila ene, bidi milangu ya Fumu. 38Mo ndo muntu kasolubukwa, asali kutena kulubukwa.
39Mbwôso bakunyi, nukyebi kungi kudimusa, yi kanukandi bantu kabatôyi yi ndimi. 40Bintu bioso biencebwi yi mwosambu unengela yi ku loici.
Currently Selected:
1 KOLINTI 14: Luna_NT
Highlight
Copy
Compare
Share
Want to have your highlights saved across all your devices? Sign up or sign in
© La Société biblique de Genève
