1 KOLINTI 12
12
1NKYEKYU ku bwalo bwa malongi a Mwoxixi, kisonanga nonu kwakaia kutena kulubukwa. 2Nwalubukwa ene, panwakadi bena mabila, nwakacwadibwa kudi ngixi yei ya bimeme mu muxiyilu mwoso unwakaxiyibwa. 3Mbwôso meme nwalubukisa ene, kakuna muntu mwoso, ndo amatôya kudi Mwoxixi a babala, unabikila Yisu ene, mufingibwi ; yi muntu kabiyi kutôya ene, Yisu udi Fumu, kutena kudi Mwoxixi a babala.
4Malongi pako adiko ntonga yi ntonga, mo Mwoxixi umoumwe. 5Yi midimo idiko ntonga yi ntonga, yi Fumu umoumwe. 6Yi mikixilu idiko ntonga yi ntonga, mo Ncembi, umoumwe ndo akisa bintu bioso mu bungi bwayo. 7Kaninga kudi muntu mwoso kwamapebwa mwebexelu ă Mwoxixi ndo kutetowesa bantu yinau. 8Kudi muntu umoumwe kwamapebwa diyi dia bwinu kudi Mwoxixi ; kudi munga, diyi dia kilubukilu kudi Mwoxixi you umoumwe ; 9kudi munga, kwetabusa mu Mwoxixi you umoumwe ; kudi munga, malongi a kupandisa bantu masama mu Mwoxixi you umoumwe ; 10kudi munga, mikixilu ya makisa a ngulu ; kudi munga kudimusa ; kudi munga, kulembetela kwa bidimu ; kudi munga, ntonga yi ntonga ya ndimi ; kudi munga, kisakolelu kia ndimi. 11Kaninga bintu bebi bioso ndo biakisa Mwoxixi you umoumwe isanga yei mikyenci, udi mu kwabanyila muntu mwoso malongi, ku muntu ku muntu, mwoso mwanangayi.
12Bwalo luna bidi mumbidi umoumwe, yi udi yi bicini bingi, yi bungi bwa bicini bia mumbidi, isanga bingi, bidi mumbidi umoumwe, ndo bidi buna Kalistu kabidi. 13Bwalo butwamanumeyebwa ku mumbidi umoumwe mu Mwoxixi umoumwe, ndo bena Yuda ndo bena Ngiliki ; ndo bapika ndo bena bula ; yi twamanuxibwa kudi Mwoxixi umoumwe. 14Bwalo butasoakala mumbidi kicini kimokimwe, kate bingi. 15Ndo dikasa dinatôya ene, Bwalo buntena kianca, meme kiena muna mumbidi, kadina lolo muna mumbidi ? 16Yi ndo dicu dinatôya eñe, Bwalo buntena diso, meme kiena muna mumbidi, kadina lolo muna mumbidi ? 17Akali mumbidi muncimancima uxeakala diso, kwombwa kwa macu kuxeakala kupai ? Ndo buncima bwau buxeakala kwombwa kwa macu, kwombwa kwa melu kuxeakala kupai ? 18Mo nkyekyu Ncembi amateka bicini mu mumbidi, kicini ku kidi, kicini ku kidi, kwoso kwakanangayi. 19Yi ndo bixeakala bungi bwabio kicini kimokimwe, mumbidi uxeakala kupai ? 20Mo nkyekyu bicini bidi ingi, kaninga mumbidi umoumwe. 21Yi diso kadibiyi kutôyela kianca ene, Meme kisokudila owe ; yi mucwe kabidi kaubiyi kutôyela makasa ene, Meme kisokudila owe. 22Kañana ; bicini bebi bia mumbidi biamakwencebwa ene, biamadika kulebela, biamadika kudidibwa ; 23yi bicini bebi bia mumbidi bitwencenca ene, biamakala kanana, kabebi ndo bitwamalatisa kinemu kingi ; yi bicini biecu bitena yi lwoxixi biapwakala yi lwoxixi lungi. 24Mo bicini biecu bia lwoxixi kabisokwayila ; kate Ncembi amakwelekyesa mumbidi ; amapela kicini kieki kinemu kingi kiakasaka ; 25bitaxeakala nkalu mwoso mu mumbidi, kate bicini bixenamañana bunami bumobumwe. 26Ndo lolo kicini kimokimwe kiombombwa kusama, bungi bwa bicini biombombwa kusama yinakio ; ndo kicini kimokimwe kiamatumbixibwa, bungi bwa bicini biamaxekyelela yinakio.
27Nonu lolo nudi mumbidi ă Kalistu, yi bicini biau, muntu kicini muntu kicini. 28Yi Ncembi amateka banga mu kikokye, ku buxi batumibwi, diamubidi badimuxi, diamusatu beyexi, kunyuma makisa a ngulu, kunyuma malongi a kupandisa bantu masama, bantu bamakwacisa bena kwabo, banamañani, ntonga yi ntonga ya ndimi. 29Badi batumibwi bungi bwabo ? badi badimuxi bungi bwabo ? badi beyexi bungi bwabo ? badi bakisañani ba makisa a ngulu bungi bwabo ? 30Bungi bwabo badi yi malongi a kupandisa bantu masama ? bamatôya yi ndimi bungi bwabo ? bamasakola ndimi bungi bwabo ?
31Mo nukyebi malongi adika manene ; kaninga ntananwebesa mwosambu ămadika loko lungi.
Currently Selected:
1 KOLINTI 12: Luna_NT
Highlight
Copy
Compare
Share
Want to have your highlights saved across all your devices? Sign up or sign in
© La Société biblique de Genève
