उत्पत्ति 4
4
कैन का वजेसे हाबिल को खुन
1जब आदम अपनी लुगय हवा का पास गयो तब ओने पेटसे हुय खे कैन खे जन्म दियो अरु बोल्यो, मेने परमेश्वर का मदत से एक बेटा खे जन्म दियो हइ. 2फिर उ ओको भैइ जन्म्यो, हाबिल तो मेडाहोन को चरान आलो बनी गयो, पर कैन जमीन कि खेत करन आलो कि किरसान बन्यो. 3कुछ दिन का बाद कैन परमेश्वर का पास जमीन को उग्यो मे से कुछ भेट लि आयो. 4अरु हाबिल भी अपनी मेडाहोन को कुछ एक पयलो जन्म्यो बच्चो भेट चडान लि आयो अरु उनकी चर्बी भेट चडैइ; तब परमेश्वर ने हाबिल अरु ओकी भेट खे अपनायो.#4:4 निघमन 34:19 इब्रानिय 11:4 5पर कैन अरु उनकी भेट खे ओने अपनायो नी तब कैन भोत घुस्सा हुयो, अरु ओका मुंडा पर उदासी छै गय. 6तब परमेश्वर ने कैन से बोल्यो, “तू क्यु घुस्सा हुयो? अरु तरो मुंडा पर उदासी क्यु छै गय हइ? 7अगर तू भलो कर्ये, ते का तरी भेट कबुल नी की जाये? अरु अगर तू भलो नी कर्ये, ते पाप द्वार पर लुक्यो र्हेस हइ, अरु ओकी लालुच तरा तरफ हुये, अरु तो खे ओ खे हकालनो पड्ये.” 8तब कैन ने अपना भैइ हाबिल से कुछ बोल्यो; अरु जब वे मैदान मे थो, तब कैन ने अपना भैइ हाबिल पर चडी खे ओको खुन करी दियो.#4:8 योयल 3:15 प्रकासितवाक्त 10:3 9तब परमेश्वर ने कैन से पुच्छो, “तरो भैइ हाबिल कहा हइ?” ओने बोल्यो, “मालुम नी; का मी अपना भैइ को रखवालो हइ?” 10ओने बोल्यो, “तोने का कर्यो हइ? तरा भैइ को खुन जमीन मे से मरा तरफ चिल्लैइ खे मरो दुहाइ दि र्हो हइ.#4:10 इब्रानियो 12:24 11येकालिये अब जमीन जेने तरा भैइ को खुन तरा हाथ से पीना का लिये अपना मुंडो खोल्यो हइ, ओका तरफ से तू श्रापित हइ. 12चाहे तू जमीन पर खेती कर, ते भी ओकी पूरी उग्यो फिर तो खे नी मिल्ये, अरु तू धरती पर भटकन आलो अरु भगोडो हुये.” 13तब कैन ने परमेश्वर से बोल्यो, “मरी सजा असहनीय हइ. 14देख तोने आज का दिन मे खे जमीन पर से निकल्यो हइ अरु मि तरी नजर का आड मे र्हियु अरु धरती पर भटकन आलो अरु भगोडो र्हियु; अरु जो कोय मे खे मरी हत्या कर्ये,” 15यो कारण परमेश्वर ने ओकासे बोल्यो, “जो कोय कैन को खुन कर्ये ओकासे साथ गुणा बदलो लियो जाये,” अरु परमेश्वर ने कैन का लिये एक चिन्ह ठैरायो असो नी हो कि कोय ओ खे पैइ खे मारी डाल्ये.
कैन कि पिडी
16तब कैन परमेश्वर का सामने से निकली गयो अरु नोद#4:16 नोद भगोडो नामको देश मे, जो अदन का पूर्व का तरफ हइ, र्हेन लग्यो. 17जब कैन अपनी लुगय का पास गयो तब वा पेट से हुय अरु हनोक खे जन्म दियो; फिर कैन ने एक नगर बसायो अरु उ नगर को नाम अपना बेटा का नाम पर हनोक रख्यो. 18हनोक से इराद पैदा हुयो, अरु इराद से महूयाएल से पैदा हुयो अरु मतूशाएल पैदा हुयो अरु मतुशाएल से लेमेक पैदा हुयो. 19लेमेक ने दो बइहोन भ्याव कर्यो जेमे से एक को नाम आदा अरु दूसरी को सिल्ला हइ. 20आदा ने याबाल खे जन्म दियो, उ उन इन्सानहोन को बाप थो जो झोपडीहोन मे र्हेतो थो अरु जनवरहोन को पालन करी खे जीवन जीया करतो थो. 21ओका भैइ को नाम यूबाल थो; उ उन इन्सान होन बाप थो जो वीणा अरु बासुरी बजातो थो. 22अरु सिल्ला ने भी तूबल कैन नामको एक बेटा खे जन्म दियो; उ पीतल अरु लोहा को सब धार आलो हथियार होन खे बनान आलो हुयो अरु तूबल कैन की भैइन नामाह थी. 23लेमेक ने अपनी लुगय होन से बोल्यो, “हे आदा अरु हे सिल्ला मरी सुन : हे लेमेक कि लुगय होन, मरी बात पर कान लगानु; मेने एक अदमी खे जो मे खे चोट लगातो थो, अर्थात एक जवान खे जो मे खे घायल करतो थो मारी डाल्यो हइ. 24जब कैन को बदलो सात गुना लियो जाये ते लेमेक को सतहत्तर गुणा लियो जाये.#4:24 मत्ती 18:22”
शेत अरु एनोश
25अरु आदम अपनी लुगय का पास फिर गयो; अरु ओने एक बेटा खे जन्म दियो अरु ओको नाम यो बोली खे शेत रख्यो कि “परमेश्वर ने मरा लिये हाबिल खे बदल्यो, जे खे कैन ने मार्यो थो, एक अरु कुल प्रदान कर्यो.” 26अरु शेत खे भी एक बेटो पैदा हुयो अरु ओने ओखो नाम एनोश रख्यो उय टेम्म से इन्सान प्रभु का नाम से आराधणा करन लग्यो.
Currently Selected:
उत्पत्ति 4: Gnn25
Highlight
Copy
Compare
Share
Want to have your highlights saved across all your devices? Sign up or sign in
The Gowlan Bible ©The Word for the World International and Gawlan Translation Samiti, Telkhar, Maharashtra, India, 2025.
