उत्पत्ति 3
3
इन्सान को परमेश्वर कि आज्ञा नि माननु
1परमेश्वर ने जेत्ता जंगली जनवर बनाया था, उन सब मे साप चलाक थो, अरु ओने बइ से बोल्यो, “का सच हइ, कि परमेश्वर ने बोल्यो, तुम या बगीचा का कोय भी झाड को फल नी खानु?” 2बइ ने साप से बोल्यो, या बगीचा का झाडहोन को फल हम खै सकस हइ; 3पर जो झाड बगीचा का बीच मे हइ, ओका फल का बारे मे परमेश्वर ने बोल्यो हइ कि नी ते तुम ओ खे खानु अरु नी ओ खे छिनु, नि ते मरी जाह्ये. 4तब साप ने बइ से बोल्यो, “तुम निश्चय नी मरन का. 5परमेश्वर खुद जानस हइ कि जो दिन तुम ओको फल खाये उय दिन तुमारा आखहोन खुली जाये, अरु तुम भला बुरा को ज्ञान पैइ खे परमेश्वर का जसा हुय जाये.”#3:5 एज खेल 28:2 6आखरी जब बइ ने देख्यो कि उ झाड को फल खान मे अच्छो, अरु देखना मे मनोहर, अरु बुद्धी देन का लिये चाहनो जसो भी हइ, तब ओने ओमे से तोडी खे खायो; अरु अपना अदमी खे भी दियो, जो ओका साथ थो अरु ओने भी खायो. 7तब उय दोयझन कि आखहोन खुली गय, अरु उन खे मालुम हुयो कि वे बीना कपडा का हइ; येकालिये उनने अंजीर का पत्ता जोडी-जोडी खे लंगोट बनैय लिया.
8तब परमेश्वर, सांझ का टेम्मे बगीचा मे फिरतो थो, ओको आवाज सुनैइ दियो, तब आदाम अरु ओकी लुगय बगीचा का झाडहोन का बीच मे परमेश्वर से लुकी गया. 9तब परमेश्वर ने फुकारी खे आदाम से पुच्यो, “तू कहा हइ?” 10ओने बोल्यो, “मि तरो आवाज सुनी खे डरी गयो, क्युकि मि बीना कपडा को थो येकालिये मी लुकी गयो.” 11परमेश्वर ने बोल्यो, “कोने तो खे बातायो तु बिना कपडा को हइ? जो झाड को फल खान का लिये मेने तो खे मना कर्यो थो, का तोने ओको फल खायो हइ?” 12आदाम ने बोल्यो, “जो बइ खे तोने मरा संग र्हेन का लिये दियो, हइ ओने उ झाड को फल मे खे दियो, अरु मेने खायो.” 13तब परमेश्वर ने बइ से बोल्यो, “तोने यो का कर्यो हइ?” बइ ने बोल्यो, “साप ने मे खे भैइकइ दियो, तब मेने खायो.”
परमेश्वर को न्याय
14तब परमेश्वर ने साप से बोल्यो, “तोने जो कर्यो हइ येकालिये तू सब घरेलू जनवरहोन, अरु सब जंगली जनवरहोन से जादा श्रापित हइ; तू पेट का बल चल्या कर्ये, अरु जीवन भर मट्टी चाटता र्हिये. 15अरु मी तरा अरु या बइ का बीच मे, अरु तरा वंश अरु येका वंश का बीच मे बैर पैदा कर्यु, उ तरा माथा खे कुचली डाल्ये, अरु तू ओकी येडी खे चाब्ये.”#प्रकाशन 12:17 16फिर बइ से ओने बोल्यो, “मी तरो दुख अरु तरा पेटसे होन को दुख खे भोत बडायु; तू तडफि खे बच्चो पैदा कर्ये; अरु तरी लालुच तरा अदमी का तरफ हुये, अरु उ तरा पर हक्क जताये.” 17अरु आदम से ओने बोल्यो, “तोने जो अपनी लुगय की बात सुनी, अरु जो झाड को फल का बारे मेने तो खे आज्ञा दि थी कि तू ओ खे नी खानु, ओ खे तोने खायो हइ, येकालिये जमीन तरा कारन श्रापित हइ, तू ओकी उग्यो जीवन भर दुख का साथ खाया कर्ये. 18अरु उ तरा लिये काटा अरु उटकटारे उंगाये, तू खेत को उग्यो खाये. 19अरु अपना पसीना की रोटी खाया कर्ये, अरु आखरी मे मट्टी मे मिली जाह्ये; क्युकि तू ओमे से निकली आयो हइ, तू मट्टी तो हइ अरु मट्टी ही मे फिर मिली जाह्ये.” 20आदम ने अपनी लुगय को नाम हवा रख्यो; क्युकि जेत्ता इन्सान जिन्दा हइ उन सब की मूलमाता वा हुय.
21अरु परमेश्वर ने आदम अरु ओकी लुगय का लिये चमडा का कपडा बनैय खे उन खे पेनैइ दिया.
आदम अरु हव्वा खे बगीचा से निकाल्यो जानु
22फिर परमेश्वर ने बोल्यो, “इन्सान भला बुरा को ज्ञान पैइ खे हम मे से एक का जसा हुय गया हइ; येकालिये अब असो नी हो, कि उ हाथ बडैइ खे जीवन का झाड का फल भी तोडी खे खै ले अरु सदा जिन्दो र्हेनु.” 23येकालिये परमेश्वर ने ओ खे अदन बगीचा मे से निकाली दियो कि वा जमीन पर खेत करनु जेमे से उ बनायो गयो थो. 24येकालिये आदम खे ओने निकाली दियो अरु जीवन का झाड को रस्ता को पैरो देन का लिये अदन को बगीचा का पूर्व का तरफ करुबो#3:24 करुबो विशिष प्रकार खे स्वर्गदुत जिन खे पंख होते है पंख दारी प्राण खे, अरु चारी तरफ घूमन आली अंगार जसी तलवार खे भी नियुक्त करी दियो.#यहेज्केल 28:16
Currently Selected:
उत्पत्ति 3: Gnn25
Highlight
Copy
Compare
Share
Want to have your highlights saved across all your devices? Sign up or sign in
The Gowlan Bible ©The Word for the World International and Gawlan Translation Samiti, Telkhar, Maharashtra, India, 2025.
