Pilipi 3
3
Bolum sosuai ma kojere Yesus Kristus, Tuhan co bokuasa ma ito
3:1-21
1Kojekaieh, Kawan konduang kuh, jorih jerahboh ponah Tuhan. Aroko ome-ome bagi akuh amun akuh nyurat hopuli tintun kawan aang tatuh hia ikan. Kawan aang tatuh monjaga ina ikan tenden bolum sosuai ma kojere Tuhan.
2Hati-hati tohimo kawan dulun co majar bahawa dulun sobulih tomalak ika jarin umat Mohotara. Iroh jahat hintang ngobohaya isan asu dangas. 3Sobujur eh, umat Mohotara iyohco ito co tomombimbing pian Roh-Eh ika nyembah Are. Iyohboh ciri ‘hobalak’ co bujur. Ito bosukur awi Kristus Yesus nyolamat ito. Ito aroko boharap ma kawan alogawi kolunon. 4Sompamaeh kawan aang taiyoh lian nyolamat ito, akuh oko alasan ika boharap ma kawan aang taiyoh. Mungkin dulun bokon bopikir iroh oko alasan ika boharap ma kawan aang taiyoh. Tapi, alasan kuh meleh borohon hangki kokon doh. 5Akuh tomalak nyan ondo kojalu opah akuh tonganak. Akuh dulun Israel ingkan suku Benyamin. Akuh bujur-bujur dulun Ibrani totok. Amun dulun bokon nyau nara arop tului iroh monau Hukum Torat, akuh ingkan kolompok Parisi co monau kokoieh. 6Amun dulun bokon nyau nara arop tului iroh nontumun agama ma kotukoi, akuh tuu-tuu tukoi dapot batuh akuh nyiksa kawan dulun co porocaya ma Yesus. Amun dulun bokon nyau nara arop tului iroh bolum ma cara co buah nuhit Hukum Torat, akuh aroko lian tonyala ponah aang taiyoh. 7Batuh, akuh bopikir kokon iyoh umpi akuh bohujung. Tapi, makitu akuh ocop nyono Kristus. Jadi, akuh mongangap kawan aang taiyoh aroko artieh. 8Malah akuh mangap kokon aranaang arelu oko artieh tombanding ma nyono Kristus Yesus, Tuhan kuh. Iyoh meleh penting hangki kokon aang co bokon. Iyohboh tuluieh akuh aroko boharap bat ma kawan aang taiyoh. Akuh mangap uras aang taiyoh samah isan poruhuk ina akuh lian nyono Kristus, 9hintang ina akuh lian hokohico ma Are. Akuh jarin bujur nyan tohimo Mohotara aroh tului usaha kuh leh nuhit Hukum Torat. Akuh jarin bujur tului akuh porocaya ma Kristus. Mohotara co nguan iyoh. Are umpi dulun jarin bujur nyan tohimo-Eh amun iroh porocaya. 10Akuh tuu-tuu jere nyono Kristus. Akuh jere nongkomo kuasa co umpi Are bolum hopuli ingkan pompatoi. Akuh jere umba mondorita samah isan Are hintang selang matoi samah isan Are. 11Ma sanioh, akuh yakin boharap arop kuh mahi angar bolum hopuli ingkan pompatoi.
12Akuh aroko bomaksut akuh ocop dapot tujuan cioh! Mula akuh arinai somporaka. Tapi akuh horoholuh bousaha ika dapot tujuan cioh. Tului, iyohboh roncana Kristus Yesus indang kuh hiah waktu Are naah akuh jarin Are empui. 13Kawan konduang, akuh leh aroko bopikir akuh ocop dapot tujuan cioh. Tapi oko ico aang co tongompiang kuh. Iyohonon, akuh aroko mohira kawan aang co ocop tonolikut kuh hintang bousaha ika dapot tujuan co oko nyan muka kuh. 14Akuh samah isan dulun ponah lomba tongkoru, akuh tongkoru ngecat eh ina ngohaba hodiah. Hodiah kuh iyohco Mohotara naah akuh ika bolum halo Are nyan sorga. Iyoh baya boraoi tojadi tului Kristus Yesus.
15Tului iyoh, kokon to co borohon porocaya ma Yesus sobulih bopikir ma cara isan akuh yoh. Tapi amun oko dulun nyan halo ikan co bopikir ma cara co bokon, maka Mohotara angar monjelas iyoh indam mu. 16Tapi, co penting ito tenden bolum ma cara co makitu co ocop Mohotara poleha eh ma ito.
17Kawan konduang, umbaboh cuntu kuh. Porhatiboh ka kawan dulun co bolum sosuai ma cara kobolum kaih. 18Awi, oko orong dulun co kuloi ajaran bahawa Kristus matoi nyan sompolaki ika mombebas ito ingkan hukuman dosan to. Akuh ocop derek lau mara ikan tintun iyoh. Makitu samir nangih, akuh mara ma ikan tintun iyoh kole. 19Nyan kojekaieh, kawan dulun taiyoh angar lumat. Iroh bolum sosuai ma kojere betin doh leh hangki bolum sosuai ma kojere Mohotara. Iroh banga tintun kawan alogawin doh co jahat co sobulih eh umpi iroh mohaan. Iroh baya bopikir tintun kawan aang nyan dunia tuh leh. 20Tapi, ito iyohco umat Mohotara, ponduduk sorga. Ito mahi nganto Ponyolamat to dombut hopuli ingkan idi, iyohonon Tuhan Yesus Kristus. 21Are oko kuasa ika umpi kokon aranaang nyook ma-Eh. Ma kuasai-Eh yoh, betin to tuh co domu hintang boraoi lenyoh, Are angar mubah eh jarin samah isan beti-Eh co somporaka.
Currently Selected:
Pilipi 3: TBSS
Highlight
Copy
Compare
Share
Want to have your highlights saved across all your devices? Sign up or sign in
