Pilipi 2
2
Nosehat ina hokohico hintang morandah arop isan Kristus
2:1-11
1Jadi, atoi me lian tongorohon awi ikan ponah Kristus. Ikan lian tomohibur awi oko asi ponah Kristus. Ikan lian bolum hokohico ma Roh Mohotara. Ikan lian mongasihi hintang hopasi ico ma co bokon. 2Tului kokon iyoh, umpiboh atoi kuh meleh jorih kole ma nguan kawan aang tatuh: Bolumboh ponah kohokohico. Horoholuh hopasi ico ma co bokon. Kojerebat pikiran hintang tujuan me horoholuh samah. 3Aroh bolecak hintang nganyap koponara co mohampa. Tapi, morandah atoi me. Mangapboh dulun bokon meleh penting hangki ikan leh. 4Aroh baya porhati kopentingan arop me tarop. Tapi, porhatiehboh kopentingan dulun bokon ka.
5Cara pikiran me sobulih samah isan cara pikiran Kristus Yesus. Santuhboh cara pikiran-Eh:
6Mula bujur, Yesus Kristus samah ma Mohotara.
Tapi, Are aroko bopikir Are sobulih mompotahan kodudukan cioh.
7Malah seen, Are selang molapas kokon iyoh.
Are dombut hia dunia tuh jarin samah ma dulun co molayan dulun bokon.
Are jarin samah ma kolunon.
8Nohani, waktu Are jarin kolunon,
Are morandah arop-Eh hintang nyook ma kojere Mohotara dapot Are matoi,
malah matoi nyan sompolaki.
9Iyohboh tuluieh Mohotara umpi Are jarin poko penting.
Mohotara mihi aran indai-Eh co meleh bokuasa ma kokon co bokon.
10Mohotara umpi iyoh ina kokon aranaang angar nyook nyembah aran Yesus,
Iyohonon kokon aranaang co oko nyan langit, nyan pindaondo, hintang nyan pinda tana.
11Kokoieh angar mongaku bahawa Yesus Kristus iyohco Tuhan ma kokon aranaang.
Ma sanioh, Mohotara Tama angar tonara.
Bolum ma cara co bujur ponah dunia co jahat
2:12-18
12Kawan konduang kuh co tongasih, ikan horoholuh nuhit Mohotara. Jadi, tenden nyook hintang mihi hormat ma-Eh samir ikan bousaha bolum ma cara co patut indan kawan dulun co ocop tonyolamat. Ikan sobulih umpi iyoh aroh baya isan batuh hiah waktu akuh halo ikan tapi meleh kole makitu hiah waktu akuh aroko halo ikan. 13Mohotara leh ocop dohop ikan. Are bogawi ponah atoi me ika ikan kolu hintang botindak sosuai ma ome co tongonjere-Eh.
14Hiah waktu ikan umpi ome bewe, aroh ngolomumut hintang aroh hojawap. 15Ma sanioh, ikan bolum ma cara co buah hintang borasih. Ikan bolum sobagai kawan anak Mohotara co aroko hegah tonyala oluco ikan oko nyan tohun-tohun kawan dulun co jahat hintang aroko nyono cara bolum co bujur. Jadi, ikan jarin kopandau indan doh, samah isan kawan potondu co bocohaya nyan dunia tuh. 16Iyohonon, ikan porahan ma iroh Antun Mohotara co mihi kobolum co tuu-tuu. Amun ikan bolum isan iyoh, akuh angar banga nyan ondo Kristus dombut hopuli. Awi, ikan jarin bukti bahawa polayanan kuh aroko mohampa. Oko hasir ingkan kobohimat gawingkuh. 17Tapi, akuh angar tenden jorih jerah ka amun akuh tongompatoi. Awi, ikan porocaya ma Kristus hintang bolum molayani-Eh. Ikan jarin samah isan kurban porsembahan indan Mohotara. Amun akuh tongompatoi, artieh daha kuh tonumbak nyan tungkui porsembahan me yoh. Jadi, akuh jorih jerah hintang akuh umba jorih jerah ma ikan. 18Isan iyoh ka, ikan sobulih jorih jerah hintang umba jorih jerah ma akuh.
Timotius doruo Epaproditus
2:19-30
19Akuh boharap Tuhan Yesus angar umpi ina kuh jion nyoruhan Timotius hia ikan. Ma sanioh, atoi kuh angar tenang ngoneh tarung tintun ikan ingkan are. 20Nyan songkolang kokon dulun co halo akuh, baya Timotius leh co hico songa ma akuh. Are tuu-tuu jere dohop ikan. 21Kokon dulun bokon baya porhati kopentingan doh leh aroh kopentingan Yesus Kristus. 22Ikan leh ocop monau bahawa Timotius korinah boguna. Are ocop bogawi bohimat umba akuh ika momborita Tarung Pio. Are dohop akuh samah isan anak dohop tamaieh. 23Jadi, opah akuh monau tintun koputusan kasus pongadilan kuh, akuh boharap ika jion nyoruhan are hia ikan. 24Tapi akuh yakin bahawa Tuhan angar dohop akuh ina akuh tarop lian nyua nyari ikan.
25Tapi, sopondehan, akuh nongkomo porulu nyuhu Epaproditus hopuli hia ikan. Batuh, ikan nyoruhan are ika dohop akuh ponah seper nyan intoi. Are ocop jarin konduang co bogawi hintang bojuang indan Kristus umba akuh. 26Tapi are korinah bolingu kokom me. Atoieh giha awi are monau ikan ocop ngoneh bahawa are hotoro. 27Mula bujur, are hotoro, asit matoi. Tapi Mohotara porahan kopomasi ma are. Aroh baya are leh, tapi Mohotara porahan kopomasi ma akuh ka. Mohotara aroko moholu are matoi ina kojorung yoh aroko tonambah indang kuh. 28Poko tului iyoh, akuh jere lau nyuhu are hopuli hia ikan, ina ikan jorih jerah kole sopopak ma are. Ma isanioh, atoi kuh mahi jarin tenang. 29Jadi, nyambutboh are ma cara co patut indan konduang ponah Tuhan, iyohonon ma kojorih. Ikan sobulih hormat ma kawan dulun isan are. 30Tului, are asit matoi awi are bogawi indan Kristus. Are selang matoi kotahin are mowakili ikan ika dohop akuh.
Currently Selected:
Pilipi 2: TBSS
Highlight
Copy
Compare
Share
Want to have your highlights saved across all your devices? Sign up or sign in
