Захарияа 7
7
Иерусалим тухай гашуудал
1Даариин Персиин хаан шэрээдэ заларһанай удаа дүрбэдэхи жэлдэ юһэдэхи хислээб һарын дүрбэндэ Эзэн Захарияада айладхал буулгаа. 2Тэрэ үе сагта Бэт-Ээлэй зон Эзэнэй талархал гуйжа, Шарээцэр, Рээгэм-Мээлэх гэгшэдые хүнүүдтэйнь хамта зальбархыень эльгээгээд байгаа. 3Тэдэ Түмэн Сэрэгтэ Эзэнэй үргөөгэй санаартан болон лүндэншэдһээ асууба: «Бидэ Һүмын һандарһан ушараар олон жэлдэ гашуудаһан заншалаараа табадахи һарада гашуудан уйлаха гүбди?»
4Түмэн Сэрэгтэ Эзэн намда, Захарияада, айладаба:
5– Энэ орон нютагай бүхы арад түмэндэ ба санаартанда хэлэ: «Таанар иигэжэ далан жэлэй туршада табадахи, долоодохи һарануудта масаг барин гашуудахадаа, үнэхөөрөө Минии түлөө масаглана гээшэ гүт? 6Эдихэ уухадаа өөрынгөөл аша туһын түлөө оролдоо бэшэ юм гүт?» 7Эзэн бүри үни Иерусалимда дүүрэн зон ажаһуужа, тэрэ хотын хүгжэн һалбаржа байха сагта урданай лүндэншэдөөр дамжуулан энээнииел айладаа бэшэ юм гү? Хотые тойроод, сүл губидахи урда орондо, хадын баруун хормойдо, доро газарта амитан зоной олоороо һуужа байхада, тунхаглаһан үгэнь иимэ бэшэ аал?
8Тиигээд Эзэнэй Захарияада айладаһан үгэ иимэ:
9– Түмэн Сэрэгтэ Эзэн иигэжэ айладана:
Үнэн шударга ёһо дэлгэрүүлэн, хүн бүхэн хажуудахи хүндээ
аха дүү мэтэ энэрхы, хайрлаха сэдьхэлээр хандагты.
10Бэлбэһэн болон үншэдые, ерүүл хүниие болон ядуушуулые бү дарлагты.
Зүрхэ сэдьхэлдээ нэгэ нэгэндээ муу юумэ түсэблэжэ болохогүй.
11Гэбэшье тэдэ Эзэнэй үгэдэ анхарангүй, шэхээ бүтүүлээд байгаа бэлэй. 12Тэдэ зүрхэ сэдьхэлээ шулуун хатуу болгоһон ушарһаа Түмэн Сэрэгтэ Эзэнэй Өөрын Һүлдөөр эртын эшэ үзүүлэгшэ лүндэншэдөөр дамжуулһан хуули заабари болон үгэнүүдые дуулаагүй. Тиихэдэнь Түмэн Сэрэгтэ Эзэнэй айхабтар ехэ уур хилэнсэг хүдэлбэ.
13«Минии дуудахада, тэдэ дуулаагүй һэн. Тэрээн шэнги харюудань тэдэнэй дуудахада, Би дуулахагүйб. 14Тэдэниие һалхи шуургантай хамта хари зоной дунда тараан сасаахаб, харин өөһэдэйнь газар нютаг эзэгүй болон хооһоржо, хойшо урагшаа нэгэшье хүн ябахагүй. Тэдэ өөһэдөө һайхан орон нютагаа хооһон губи болгобо», – гэжэ Түмэн Сэрэгтэ Эзэн айладхаа.
Currently Selected:
Захарияа 7: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
