Захарияа 5
5
Зургаадахи үзэгдэл: Ниидэжэ ябаһан хуйламал бэшэг
1Дээшээ харахадам, хуйламал бэшэг ниидэжэ ябаба.
2– Юу харанаш? – гэжэ Эльгээмэл асууба.
– Ниидэжэ ябаһан хуйламал бэшэг харанаб. Утаараа хорин тохой, үргэниинь арбан тохой, – гэжэ харюу үгэбэб.
3Эльгээмэл намда иигэжэ хэлэбэ:
– Энэ хадаа бүхы газар дэлхэйдэ бууһан хараал гээшэ. Хулгай хэһэн хамаг амитан һүнэхэ гэжэ нэгэ таладань бэшээтэй, худалаар тангариг үгэһэн хүншье баһал һүнөөгдэхэ гэжэ нүгөө таладань бэшээтэй.
4Түмэн Сэрэгтэ Эзэн иигэжэ айладаа:
Би тэрэниие хулгайшанай гэртэ ба Минии нэрээр хуурмаг тангариглагшын гэртэ ябуулааб.
Тэндэ нэбтэрэн орожо өөрыень һүнөөхэ, модо шулууеньшье усадхаха.
Долоодохи үзэгдэл: хэмжүүрэй амһарта соохи эхэнэр
5Намтай хөөрэлдэһэн Эльгээмэл гараад намда хэлэбэ:
– Дахяад дээшээ харал даа, юун дүтэлнэ гээшэб?
6– Би мэдэнэгүйлби, – гэжэ би хэлэбэб.
– Энэ нэгэ эфаагай багтамжатай хэмжүүрэй ехэ амһарта гээшэ. Зоной нүгэл хэмжэдэг амһарта, – гэбэ тэрэ.
7Туулган хабхагай үргэгдэхэдэ, амһарта соо һуужа байгааша нэгэ эхэнэр харагдаба. 8Эльгээмэл: «Энэ эхэнэр хадаа хилэнсэтэ байдалай дүлгэ тэмдэг», – гээд, эхэнэрые амһартын оёор руу шулуу шэдэһэндэл хаяжа, туулган хабхагаар бүглэбэ.
9Дахин дээшээ харахадам, далитай хоёр эхэнэр харагдаба. Тэдэнэй хилэн шубуунай дали шэнги далинууд һалхи татуулан эшхэрбэ. Тэдэ амһартые үргэжэ, газар тэнгэриин хоорондуур шуумайба. 10Намтай дуугаралсагша Эльгээмэлһээ асуубаб:
– Хайшань тэрэ амһарта абаашабаб?
11Тэрэ намда иигэжэ хэлэбэ:
– Шинаар орондо тэрээндэ һүмэ бариха юм. Бэлэн болоходонь, тэрэ эхэнэртэй амһарта һууридань һуулгаха.
Currently Selected:
Захарияа 5: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
