Захарияа 4
4
Табадахи үзэгдэл: Алтан дэн ба оливын модон
1Намтай хөөрэлдэгшэ тэнгэриин Эльгээмэл һөөргөө ерээд, бүхэ нойрһоо һэреэһэн мэтэ намайе дорюун болгобо.
2– Юу харанаш? – гэжэ тэрэ намһаа асууба.
– Сула алтаар хэһэн дэнгэй табюур, тэрээн дээрэ томо аяга байна, аяга дээрэ долоон сүгсэ, тус тустаа долоон голтой. 3Хоёр олива байна, нэгэниинь аягын баруун талада, нүгөөдэнь зүүн таладань табяатай, – гэжэ харюусабаб.
4Удаань би тэнгэриин Эльгээмэлһээ:
– Энэ юун бэ? – гэжэ асуубаб.
5Тэнгэриин Эльгээмэл намда:
– Энэ юун гэжэ мэдэхэгүй аалши? – гэбэ.
Би:
– Эрхим ноён минии, би хаанаһаа мэдэхэбиб даа, – гэбэб.
6Тэнгэриин Эльгээмэл намда иигэжэ ойлгуулба:
– Түмэн Сэрэгтэ Эзэнэй Зэрубабээлдэ
хандаһан иимэ үгэнүүд гээшэ:
Шинии туһа болбол эрхэ мэдэлээр бэшэ, хүсэ шадалаар бэшэ,
Минии Һүлдөөр ерэхэ.
7Асари хада, Зэрубабээлэй урда ши хэмши?
Ши тэгшэ тала гээшэш.
Һүмын оройн шулуу дээшэнь гаргажа табихадань,
арад зон «Эзэнэй үгэһэн аша буян энэл» гэжэ соло дуудаха.
8Эзэн намда иигэжэ зарлигтаа:
9– Зэрубабээлэй гарнууд энэ гэрэй һуури табиһан гээшэ.
Тэдэ гарнууд лэ эсэстэнь хүргэг.
Тиихэдэнь Түмэн Сэрэгтэ Эзэн намайе таанарта эльгээгээ гэжэ мэдэхэт.
10Долоон дэн тухай хэлээ һэмнайб.
Эдэ хадаа Эзэнэй хамаг дэлхэйе шобто харадаг нюдэд гээшэ.
Зэрубабээлэй гарта байһан тэгшэлүүр тээшэ
баяртайгаар хаража байһан энэ үдэрые хэн шухала бэшэ гэжэ хэлэхэб даа, – гэжэ Эльгээмэл хэлэбэ.
11Би тэрээнһээ дахяад асуубаб:
– Дэнгэй хажууда табяатай жэмэсэй хоёр модон ямар удхатайб? 12Хоёр алтан сорго соогуур алтан мэтэ тоһо бэеһээ гаргажа байһан модоной хоёр һалаа ямар удхатай болоноб?
13– Тэрээниие мэдэхэгүй аалши? – гэбэ тэрэ.
– Эзэмни, би хаанаһаа мэдэхэбиб? – гэбэб. 14Тэрэ хэлэбэ:
– Бүхы дэлхэйн Эзэндэ алба хэхэ гэжэ магнайдаа оливын нангин тоһо түрхюулһэн хоёр хүбүүд гээшэ. Тэдэ бол Эзэнэй хоёр талаар зогсодог.
Currently Selected:
Захарияа 4: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
