Марк 1

(Мт 3:1-12; Лк 3:2-16; Ин 1:19-28)

1Энэ болбол Бурханай Хүбүүн Иисүүс Христоос тухай Һайн Мэдээсэл юм. 2Тэрэнь Исай лүндэншын ном соо Бурханай иигэжэ айладаһанай ёһоор эхилнэ: «Шинии ябаха харгы бэлдэхыень Би түрүүндэшни Эльгээмэлээ ябуулнаб», 3баһа «Эзэнэй ябаха замыень бэлдэгты,

алхаха харгыень дардам сэхэ болгогты гэжэ

хэн бэ даа сүл губида хашхарба».

4Сүл губида Уһаар Арюудхагша Иоанн бии боложо:

– Нүгэл шэбэлнүүдээ хүлисүүлхын тула Бурханда хандан, уһаар арюудхуулагты, – гэжэ айладхаба. 5Иудейн можоһоо, Иерусалимһаа олон зон Иоанные шагнахаяа ошобо. Тэдэнэр нүгэл шэбэлнүүдээ мэдэрэн гэмшэбэ, тиин Иоанн тэдэниие Иордан голдо шунгуулан уһаар арюудхаба.

6Иоанн тэмээнэй нооһон хубсаһа үмдөөд, һур бэһэ бэһэлээд ябадаг, таршаагаар ба зэрлиг зүгын балаар хооллодог бэлэй.

7– Хойноһоомни ерэхэ Хүн намда орходоо аргагүй ехэ һүр жабхалантай юм. Би бүгтыгөөд, Тэрэнэй гуталайнь ооһорыешье тайлаха эрхэгүйб. 8Би таанадые уһаар арюудханаб, харин Тэрэ таанадые Арюун Һүлдөөр арюудхаха юм, – гээд Иоанн номнодог бэлэй.

Иисүүсые уһаар арюудхалга

9Уданшьегүй тэдэ үдэрнүүдтэ Галилей можын Назарет хотоһоо Иисүүсэй ерэхэдэнь, Иоанн Тэрэниие Иордан голдо шунгуулан уһаар арюудхаба. 10Уһанһаа гарахатайгаа сасуу Иисүүс огторгойн нээгдэхые, Арюун Һүлдын гулабхаагай дүрсэтэйгөөр дээрэнь буухые хараба.

11– Ши хайрата Хүбүүмниш, сэдьхэлыемни баярлуулнаш, – гэһэн абяан тэнгэриһээ дуулдаба.

12Тиигэмсээрнь Һүлдэ Иисүүсые сүл губи руу ябуулба. 13Тэндэ Иисүүс дүшэн үдэрэй туршада шолмосоор туршуулан, зэрлиг ан арьяатанаар хамта байлсаа, зүгөөр Бурханай Эльгээмэлнүүд Тэрээндэ туһалжа байгаа.

Иисүүс дүрбэн загаһашадые дуудана

14Иоанные барижа түрмэдэ хааһан хойнонь Иисүүс Галилей можо ерэжэ, Бурханай Һайн Мэдээсэл номнобо.

15– Таарамжатай саг ерэбэ! Бурханай хаан түрэ мандаха дүтэлөө. Нүгэл шэбэлээ орхижо, Һайн Мэдээсэлдэ этигэгты! – гэжэ Тэрэ айладхаба.

16Нэгэтэ Галилей далайн хажуугаар ябахадаа, тэрэ Симон ба Андрей гэдэг тэрэнэй ахые хараба. Тэдэ хоёр загаһашад гүльмэеэ далайда хаяжа байгаа.

17– Намтай ябалсагты, Би таанадые загаһа барихын орондо хүнүүдые Намда хандуулхада һургахаб, – гэжэ Иисүүс тэдэ хоёрто хэлэбэ. 18Тэдэнэр дары гүльмэеэ орхёод, Иисүүсэй хойноһоо ябаба.

19Тэндэһээ саашалжа ябатараа, Тэрэ Зэбэдэйн хүбүүдые, Яков ба Иоанн гэдэг аха дүүнэрэй онгосо соо һуугаад, гүльмэеэ заһажа байхыень харамсаараа, 20дуудаба. Тэдэнь Зэбэдэй эсэгэеэ хүдэлмэришэдтэйнь хамта онгосодонь орхёод, Иисүүстэй ябаба.

Ада шүдхэртэ дайруулһан хүн

21Иисүүс шабинартайгаа хамта Капернаум хото ерэжэ, субботын болоходо мүргэлэй гэртэ орожо, хүн зониие һургаба. 22Тэрэнэй һургаал шагнаһан хүнүүд булта ехээр гайхадаг һэн, юундэб гэхэдэ, тэрэ Хуули заадаг багшанарта адляар бэшэ, харин эрхэ засаг баригшада адляар улад зониие һургажа байгаа.

23Тэрэ мүргэлэй гэртэ ада шүдхэртэ барюулһан хүн орожо:

24– Назаредэй Иисүүс, Та бидэниие яаха гээбта? Та маниие хосороохоёо ерээ гүт? Би Таниие мэдэхэб, Та Бурханай Арюун Хүбүүнта, – гээд хашхарба.

25– Абяа аниргүй болоод, энэ хүнһөө гара! – гэжэ Иисүүс шангаар ада шүдхэртэ захирба.

26Тиигэхэдэнь ада шүдхэр үнөөхи хүнөө ехээр орилуулан, шангаар хашхараад, бэеһээнь гаража арилба. 27Хүн зон булта аргагүй ехээр гайхажа, бэе бэедээ:

– Энэ юун бэ? Һүр хүсэтэй шэнэ һургаал байнал! Яаһан ехэ эрхэ засагтайб? Ада шүдхэрнүүдшье Тэрэнэй үгэ дууланал, – гэлдэбэ.

28Уданшьегүй Иисүүс тухай һураг бүхы Галилейн можоор хаа хаанагүй тараба.

Иисүүс олон хүнүүдые аргалан эдэгээбэ

29Иисүүс Яков Иоанн хоёр шабинартайгаа хамта мүргэлэй гэрһээ гараад, Симон Андрей хоёройдо ошобо. 30Иисүүсэй ерэхэдэ Симонэй хадам эжын ехэ халууржа хэбтэбэ. 31Иисүүс тэрэ эхэнэрэй хажууда ерэжэ, гарһаань баряад бодхообо. Тиихэдэнь халууниинь бууража, эхэнэр айлшадаа хүндэлжэ оробо.

32Үдэшэлэн, наранай ороходошье, Иисүүстэ үбшэн зониие, ада шүдхэрнүүдтэ барюулһан хүнүүдые асаржал байгаа. 33Хотын зон бултадаа шахуу гэрэй үүдэндэ сугларба. 34Иисүүс элдэб үбшэнтэй олон зониие эдэгээбэ, олон ада шүдхэрнүүдые намнажа гаргаба. Тэрэнэй Бурханай табисуурта байһыень ада шүдхэрнүүдэй мэдэжэ байһан хадань, юумэ хэлэхыень тэдээндэ Тэрэ хорибо.

Иисүүс Галилейн можоор номноно

35Иисүүс хойто үглөөнь хара үүрээр бодоод, гэрһээн гаража нэгэ эзэгүй газарта ошоод, Бурханда зальбарба. 36Тиихэдэнь Симон ба Тэрээнтэй ябаһан зон хойноһоонь гаража бэдэрбэ. 37Һүүлдэнь Тэрээниие олоод:

– Бүхы зон Таниие бэдэрнэл, – гэбэ.

38– Дүтэ оршодог ондоо тосхонуудаар ябая, Би тэндэхи зондо баһал номнохо ёһотой хүм, тиимэ зорилготойгоор иишэ ерээб, – гэжэ Иисүүс харюусаба.

39Тиигэжэ Тэрэ бүхы Галилей можын мүргэлэй гэрнүүд соо һургаалаа номножо, ада шүдхэрнүүдые даража байгаа.

Иисүүс үбшэнтэй хүниие аргалан эдэгээбэ

40Иисүүстэ арһанай бузар үбшэнтэй хүн ерэжэ, үбдэглэн урдань унаад, Тэрэниие гуйба:

– Хэрбээ Та хүсэбэл, намайе арюудхан эдэгээхэ аргатайт.

41Иисүүс тэрэ хүниие хайрлаад, гараа һарбайжа тэрээндэ хүрөөд:

– Эдэгээхэ хүсэлтэйб, арюун болыш даа, – гэбэ. 42Тэрэ дары арһанайнь бузар үбшэниинь арилжа, үнөөхи хүмнай арюун сэбэр болобо. 43Тиигээд эмнүүлһэн хүндөө хэлэбэ:

44– Энээн тухай ши хэндэшье бү хэлээрэй. Зүгөөр санаартада сэхэ ошожо, бэеэ үзүүлэ, тиигээд аргалуулһанаа хүн бүхэндэ гэршэлхын тула ши Моисейн зарлигай ёһоор үргэл хээрэй.

45Зүгөөр үнөөхи хүниинь гараад, эмнүүлһэн тухайгаа хүн бүхэндэ хөөрэбэ. Тиимэһээ Иисүүсэй энэ хотодо үзэгдэхэ байхын аргагүй болоходо, Тэрэ хотоһоо гаража эзэгүй газарта ошоо һэн. Тиигэбэшье хүн зон Тэрээндэ газар бүхэнһөө ерэжэ байгаа.

Currently Selected:

Марк 1: BurBBL2024

Highlight

Copy

Compare