Михей 2
2
Баяд ноёдые шүүмжэлгэ
1Орондоо хэбтээд, муу муухай юумэ түсэблэн байгаашад ямар жэгшүүритэйб!
Үүрэй сайхада түсэблөөшэ юумэеэ тэдэ хэжэ эхилнэ,
юуб гэбэл, энээниие хэхээр тэдэ хүсэтэй.
2Тэдэ таряаланда һанаашархабал, хүсэ хэрэглэн, буляажа абана,
гэр байрада обтобол, саб байса абана, хүниие, гэр хогшолыень,
уг залгамжалан дамжуулдаг зөөри зөөшыень хуряажа абана юм.
3Тиимэһээ Эзэн иигэжэ айладхана:
Анхарагты, Би таанадта нэгэ гай тодхор тохёолдуулха гэжэ байнаб.
Тэрэ таанадай хүзүүн дээрэ тудаад, һалахаар бэшэ байха.
Энэ муу сагта таанад бардам сэхээр ябажа шадахаяа болихот.
4Тэрэ сагай ерэхэдэ, таанадтай тохёолдоһон ушарые
гай тодхорой жэшээ болгон зон хөөрэлдэжэ,
иимэ гашуудалтай дуу дуулахал:
«Бидэ дууһан усадхагдаабди! Манай газар дайда урбагшадта үгтэбэл!
Маанадта һөөргөө бусахаа болёол!»
5Эзэнэй зарлаһан суглаанда байлсаха,
газар дайда хубаарилгын жээрэб таталгын болоходо,
татаха хүн танай талаһаа нэгэшье байхагүй.
6Зон намда иигэжэ хэлэбэ:
«Огтолон бү хөөрэ! Бидэ эшхэбтэр байдалда орохо дурагүйбди, тиимэһээ бү хөөрэ!»
7Яковай үринэр! Таанарта хэлэгдээгүй юм һэн гү?
Эзэн тэсэбэригүй гэжэ гү?
Эдэ болбол Тэрэнэй үйлэ хэрэгүүд гү?
Зүб шударгаар хэрэг эрхилэгшэдэ Тэрэ «Һайн» гэжэ айладанагүй юм гү?
8Эзэн иигэжэ айладхана:
Урдань Минии байгааша арад түмэн таанад
дайсан мэтээр урдаһаам һөөргэдэн бодобот.
Аажам тайбан үнгэржэ байгааша зоной,
дайн дажарһаа бусажа байгшадай гадар, доторшье хубсаһыень буляажа абажа байнат.
9Зохидхон гэрнүүдтэнь һанаашархан,
арадайм эхэнэрнүүдые тэрэ гэрнүүдһээ үлдэжэ гарганат,
Минии үреэлые үхи хүүгэдһээнь хэмэ мүнхэдөө буляан абанат.
10Бодожо, эндэһээ ябагты. Энэ газарта амгалан тайбан таһалдаа.
Таанадай хэһэн нүгэл энэ газарые аймшагтай һандаралда хүргөө.
11Һалхин мэтэ хүн, таанадай һанаае худалаар тэгшэлжэ,
«үзэмэй дараһан архи тухай болон үшөө дахин үзэмэй дараһан архи тухай!»
гэжэ хэлэжэ байгааша хүн һанаандатнай таараха байгаа.
12Би, Эзэн, Яковай уг удамые бултыень, амиды мэндэ үлөөшэ Израилиин улад зониие
хамталан суглуулхаб гэжэ үгэеэ үгэнэб.
Хонишон хонидоо хашаа руу оруулжа, суг болгодог.
Тэрээндэл адли, Би арадаа хамтаруулхаб. Тиихэдэм тэдэ угаа олон болон шууяхал.
13Би тэдэниие дахуулан, хана хэрэмүүдые хамха сохин гарахаб.
Тэдэ бута сохин, хаалгануудаар гараад үнгэрхэ.
Би, тэдэнэй хаан, урдань ябажа, дахуулан абаашахаб!
Currently Selected:
Михей 2: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
