Михей 3
3
Зохихогүй удамаршад, лүндэншэд, санаартад
1Би иигэжэ хэлэбэб:
Яковай гэр бүлын толгойлогшод, Израилиин удамаршад, шагныта!
Зүб, бурууе таанар мэдэнэбди гэжэ һананат.
2Теэд таанар һайн юумэ үзэн ядадагта, муу муухайда дуратайт.
Минии арад зоной арһа хуулажа, яһанһаань мяхыень һалгаанат.
3Арадайм мяха эдижэ, арһыень хуулажа,
яһыень эбдэн, бутаргаад, мяхыень хэршэн тогоон руу хэнэт.
4Таанад Эзэнһээ туһа эрин хашхаралдахат,
теэд Эзэн таанадые дуулахагүй,
муу муухайе үйлэдэн байгаа сагтатнай
Тэрэ таанарһаа буруу харан байха.
5Эдилгэ үгэдэг зондо амгалан тайбаниие худал найдуулжа,
эдилгэ үгэдэггүй зондо дайн дажар болохо гэжэ
һүрдөөжэ байгааша худалша лүндэншэд арад зониием мэхэлнэ.
Эзэн эдэ лүндэншэдтэ иигэжэ айладхана:
6– Таанадта һүниин харанхы бууха, лүндэн табижа шадахагүйт,
Таанадые шэб харанхы тойрохо, абарал буулгажа шадахагүйт.
Лүндэншэд дээрэхи наран хорон орохо, тэдэнэй оршожо байһан үдэр бүрхэхэ.
7Үзэлшэд эшэжэ эхилхэ, мэргэшэд аягүй байдалда орохо.
Бурханһаа харюу абахагүй тэдэ бултадаа амаа хаажа эхилхэ.
8Харин намда Эзэн хүсэ шадал болон һүр һүлдэ дүүрэн үршөөгөө.
Тиимэһээ шударга ёһо, эрэ зоригтой би
Яковай удамда гэм зэмэ үйлэдэһэн тухайнь, Израилиин улад зондо нүгэл тухайнь сэхэ хэлэхэб!
9Израилиин удамаршад, Яковай гэр бүлын толгойлогшод, энээниие шагныта!
Таанад шударга ёһые үзэн ядадаг, сэхэ юумэ гажаадагта.
10Бурханай хото Иерусалимай үндэһэ һуури
алалга-хюдалга дээрэ болон үнэн шударга бэшэ зүйл дээрэ табижа байнат.
11Бэлэг абажа, удамаршадынь сүүд үйлэдэнэ,
түлбэри абажа, санаартадынь һургаал заана,
мүнгэ абажа, лүндэншэдынь лүндэн табина.
Тэдэ бүгэдэ «Эзэн бидэнтэй хамта!
Гай тодхор бидэнтэй болохогүй!» гэлдэн, Эзэндэ түшэглэнэ.
12Тиимэһээ таанадһаа боложо, Сион таряалангай талмай мэтэ хахалагдаха,
Иерусалим обоолоотой һандархай шулуун болохо,
Һүмын мүнөө байгааша газар ой модоной ургадаг гүбээ болохо!
Currently Selected:
Михей 3: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
