Матвей 14
14
(Мк 6:14-29; Лк 9:7-9)
1Тэрэ үедэ Галилей можын Ирод захирагша Иисүүс тухай һураг дуулаад:
2– Энэ Уһаар Арюудхагша Иоанн байна. Тэрэ амидыраа, тиимэһээл гайхамшагта хэрэгүүдые бүтээнэ, – гэжэ албатандаа хэлэбэ.
3Урдань Ирод Филипп дүүгэйнгээ Иродиада һамганһаа боложо Иоанные барижа хүлеэд, түрмэдэ хаахыень захирһан байгаа. 4Юундэб гэхэдэ, Иоанн: «Ши Иродиадатай һууха ёһогүйш», – гэжэ Иродтэ хэлэһэн байгаа. 5Ирод Иоанные алахаяа һанабашье, улад зонһоо айгаа, шалтагааниинь гэхэдэ, Иоанн лүндэншэн гэжэ тоологдодог байгаа.
6Иродэй түрэһэн үдэрэй найрта Иродиадын басаганиинь айлшадай урда хатаржа, Иродтэ ехээр һайшаагдаба. 7Тиимэһээ басаганай ямаршье эриһэн юумые үгэхэб гэжэ Ирод амалба. 8Эхынгээ һургаһан ёһоор басаган:
– Мүнөө эндэ Уһаар Арюудхагша Иоаннай толгойе табаг дээрэ табяад намда үгэ! – гэжэ хэлэбэ.
9Тиихэдэнь Ирод хаан һанаата болобошье, бүхы айлшадай урда үгөө үгэһэн тула басаганай хүсэл дүүргэгты гэжэ захирба. 10Тиимэһээ түрмэ соо Иоаннай толгойе таһа сабшаба. 11Тиигээд толгойень табаг дээрэ табяад, басаганда асараа, тэрэнь эхэдээ абаашажа үгөө. 12Иоаннай шабинарынь шарилыень абажа хүдөөлүүлээ бэлэй. Тиигээд энээн тухай Иисүүстэ ошожо дуулгаа һэн.
Иисүүс таба мянган хүниие садхааба
13Иисүүс Иоанн тухай дуулаад, байһан газарһаа гансаараа онгосоор тамаржа эзэгүй зэлүүд газарта ошобо. Энээн тухай улад зон дуулаад, тура хотонуудһаа гаража, хойноһоонь ябагаар ошобо. 14Иисүүс онгосоһоо буухадаа олон зоной сугларһые хараад, тэдэниие хайрлан, үбшэнтэнииень аргалжа эдэгээбэ. 15Үдэшэ болоходо, шабинарынь Иисүүстэ ерэжэ:
– Энэ эзэгүй газар байна, тиигээдшье орой болоо. Хүдөө тосхонуудта ошожо, эдихэ юумэ худалдажа абахыень сугларһан зониие табиит, – гэбэ. 16Зүгөөр Иисүүс тэдэндэ:
– Улад зоной ошоһоной хэрэггүй, таанад тэдэндэ эдихэ юумэ үгэгты, – гэжэ хэлэбэ. 17Тиихэдэнь шабинарынь:
– Бидэ оройдоол табахан монсогор хилээмэтэй, хоёр загаһатай байнабди, – гэжэ харюусаба.
18– Тэдэнээ иишэнь Намда абажа ерэгты, – гэжэ Иисүүс хэлэбэ. 19Тэрэ улад зондо ногоон дээрэ һуухыень дурадхаба. Тиигээд табан хилээмэ, хоёр загаһа абажа, тэнгэри өөдэ шэртэн, Бурханда баяр баясхалан хүргэбэ. Удаань хилээмэ хухалжа, шабинартаа үгэбэ, тэдэнь улад зондо дам тарааба. 20Хүнүүд булта эдеэлжэ садаа. Үлөөдэһыень суглуулхадань, арбан хоёр түрсүүг болоо һэн. 21Эхэнэрнүүдһээ, үхибүүдһээ гадна тэндэ табан мянга шахуу эрэшүүл эдеэлһэн байба.
Иисүүсэй уһан дээгүүр ябалга
22Тиигээд Иисүүс шабинараа онгосодо һуулгажа, нуурай нүгөө бэедэ өөрһөөнь түрүүлэн тамархыень захирба. Харин өөрөө улад зоной таратар үлөө һэн. 23Зоной тарахада, Иисүүс гансаараа хада өөдөө зальбархаяа гараба. Үдэшэндөөшье Тэрэ тэндэ гансаараа байгаа. 24Эгээл тэрэ үедэ шабинарайнь тамаржа байһан онгосо далайн тэгэндэ хүрөөд, урдаһаань һалхинай үлеэхэдэ, долгиндо сохюулжа байба. 25Үүр сайхын урдахана#14:25 Һүниин дүрбэдэхи харуулай үедэ. Иисүүс далайн уһан дээгүүр ябаад, шабинартаа ошоо. 26Шабинарынь тэрэнэй уһан дээгүүр ябаһыень хараад, ехээр мэгдэжэ:
– Энэ хии үзэгдэл, – гэжэ айһандаа хашхаралдаба. 27Зүгөөр Иисүүс тэдэндэ:
– Зоригтой байгты. Энэ Биб, бү айгты, – гэбэ. 28Пётр тэрээндэ:
– Эзэн аа, хэрбээ энэ үнэхөөрөө Та юм һаа, намайе уһан дээгүүр ябаад, Танда ерэхыемни захирыт, – гэбэ.
29Тиихэдэнь Иисүүс:
– Ерэ, – гэбэ. Пётр онгосоһоо гараад, багшынгаа урдаһаа уһан дээгүүр ябаба. 30Теэд шанга һалхинай үлеэхэдэ айгаад, уһанда шэнгэжэ эхилбэ.
– Эзэн! Намайе абарыт, – гэжэ тэрэ хашхарба. 31Иисүүс тэрэ дороо гараа һарбайжа, Пётрые дүнгэн баряад:
– Ямар бирагүй һүзэгтэйбши! Юундэ һэжэглэбэш? – гэбэ.
32Тэдэ хоёрой онгосодо һуухатайнь сасуу һалхин намдаба. 33Онгосодо байһан шабинарынь Иисүүстэ мүргэжэ:
– Та үнэхөөрөөл Бурханай Хүбүүн байнат, – гэлдэбэ.
Иисүүс Гэннэсарээдтэ үбшэнтэниие эдэгээбэ
34Иисүүс шабинартайгаа далай гаталжа, Гэннэсарээдэй газарта хүрэжэ ерэбэ. 35Тэндэхи зон Иисүүсые таняад, бүхы оршон тойронхи газарта хүнүүдые эльгээжэ, хамаг үбшэнтэниие Тэрээндэ асаржа байгаа.
36Хубсаһандатнай халташье хүрэхые зүбшөөгыт даа гэжэ тэдэ Иисүүсые гуйба. Тиин хубсаһандань гараараа хүрөөд абаһан бүхы хүнүүд эдэгэшэдэг бэлэй.
Currently Selected:
Матвей 14: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
