Матвей 15
15
(Мк 7:1-23)
1Тиигээд Иерусалимһаа хэдэн Хуули заадаг багшанар, фарисейнүүд Иисүүстэ ерэжэ:
2– Шабинартнай юундэ үбгэ эсэгэнэрэймнай заншалнуудые баримталнагүйб? Тэдэнэртнай эдихынгээ урда тээ гараа угаанагүйл, – гэлдэбэ.
3Иисүүс тэдээндэ иигэжэ харюусаба:
– Тиихэдээ юундэ таанар Бурханай захяа заабари дүүргэнгүй, өөһэдынгөө ёһо гуримые баримталнабта? 4«Аба эжы хоёроо хүндэлэ», – гэжэ Бурхан заабарилаа бэшэ һэн гү? Мүн баһа «Аба эжы хоёроо муушалһан хүн үхэлдэ хүртэхэ» гээ бэшэ һэн гү? 5Харин таанар эхэ эсэгэдээ үгэжэ туһалха аргатай байһан юумэеэ: «Би Бурханда үргөөб» гэжэ хэлэбэл, 6эхэ эсэгэеэ хүндэлхэ хэрэггүй гэжэ заанат. Тиигэжэ таанар Бурханай захяа заабари сахингүй, өөһэдынгөө тогтооһон ёһо заншалаар һэлгэнэт. 7Хоёр нюуртан! Таанар тухай лүндэншэ Исай үнэн сохомые уридшалан хэлээ һэн лэ:
8«Энэ улад зон хэлэ амаараа Намайе хүндэлнэ,
харин зүрхэ сэдьхэлдээ Нам тухай огто бодоногүй.
9Хүнүүдэй зохёоһон ёһо гуримуудта һургажа байхадаа,
тэдэ дэмы Намда мүргэнэ даа».
Ямар юумэнүүд хүниие бузарланаб?
10Иисүүс улад зониие дуудаад:
– Хэлэһыемни шагнажа, ойлгохые хэшээгты! 11Амандатнай орожо байһан эдеэн таниие бузарладаггүй, харин аманһаатнай гаража байһан муухай үгэнүүд таниие бузарладаг, – гэжэ хэлэбэ.
12Тиихэдэнь шабинарынь Иисүүстэ ойртоод:
– Хэлэһэн үгэнүүдтнай фарисейнүүдэй һанаанда таарабагүй гэжэ мэдэнэ гүт? – гэжэ һураба.
13Иисүүс иигэжэ харюусаба:
– Тэнгэридэ байгша Эсэгымни таряагүй ямаршье ургамал үндэһэтэйгөө хамта абтажа хаягдаха. 14Тэдэн тухай һанаагаа огто бү зобогты. Тэдэнэр һохор хүнүүдэй һохор ударидагшад мүн; теэд һохор хүн һохорые хүтэлжэ ябабал, хоюулаа нүхэ руу унаха юм.
15– Хүниие бузарладаг юумэнүүд тухай хөөрэһэнөө маанадта тайлбарилжа үгыт даа, – гэжэ Пётр гуйба.
16– Хэлэһыемни хэнтнайшье мүнөө болотор ойлгоогүй гээшэ гү? 17Ойлгоногүй аалта, амандаа хэһэн эдеэтнай хотондотнай ороод, һүүлдэнь бэеһээтнай гарадаг. 18Харин аманһаатнай гараһан үгэнүүд зүрхэ сэдьхэлһэйтнай гарадаг; тэдэтнай таанадые бузарладаг ха юм. 19Ушарынь юуб гэбэл, зүрхэнһөөтнай хара һаналнууд түрөөд, таанадые алаха, эрэдээ гү, али эхэнэртээ урбаха, забхай зальхай ябадал гаргаха, хулгай хэхэ, бусадые хардаха, муушалха гэхэ мэтын дорой хэрэгүүдтэ түлхидэг юм. 20Эдэ бүхы ябадалнууд таанадые бузарладаг. Зүгөөр угаагдаагүй гараараа юумэ эдихэдээ, таанад бэеэ бузарладаггүйт.
Эхэнэрэй һүзэг этигэл тухай
21Иисүүс байһан газарһаа хүдэлжэ, Тиир Сидоон хотонуудай шадархи газар дайдада хүрэжэ ерэбэ. 22Тэндэ ажаһуудаг нэгэ хананей эхэнэр Иисүүстэ ерэжэ:
– Эзэн, Давидай үри һадаһан, намайе хайрлажа үршөөгыт! Басагамни ада шүдхэртэ барюулаад, аймшагтай зобожо байна, – гэжэ орилбо.
23Теэд Иисүүс тэрэ эхэнэртэ юушье хэлэбэгүй. Тиихэдэнь Тэрэнэй шабинарынь дүтэлжэ:
– Энэ эхэнэрые ябуулыт, хойноһоомнай дахаад лэ, хашхараад лэ һаланагүйл, – гэжэ гуйба.
24– Би имагтал Израилиин төөрижэ хосорһон хонидто эльгээгдэһэн байгааб, – гэжэ Иисүүс харюусаба.
25Харин тэрэ эхэнэр бүри ойртоод, Иисүүсэй урда дохин мүргэжэ:
– Эзэн! Намда туһалыт, – гэжэ гуйба.
26– Хүүгэдэй эдихэ хоол абаад, нохойнуудта хаяхань зохихогүй юм, – гэжэ Иисүүс тэрээндэ харюусаба.
27Тиигэхэдэнь тэрэ эхэнэрынь:
– Зүб даа, Эзэн! Теэд эзэдэй шэрээһээ унаһан бутархай нохойнуудшье эдидэг бшуу, – гэжэ урдаһаань хэлэбэ.
28Тиихэдэнь Иисүүс тэрээндэ:
– Ай, эхэнэр! Шинии һүзэг ехэ байна! Һанаһан хүсэһэн юумэншни бүтэхэ! – гэжэ харюусаба. Эгээл тэрэ үедэ эхэнэрэй басаганиинь эдэгэшэбэ.
Иисүүс олон зониие эдэгээбэ
29Тэндэһээ Иисүүс Галилей далайн шадар ерэбэ. Һүүлдэнь нэгэ гүбээ дээрэ гаража һууба. 30Тэрээндэ олон зон ерэжэ байгаа. Дохолон, һохор, хэлэгүй, бэртэһэн, мүн бусадшье элдэб янзын үбшэнтэй зониие Иисүүстэ асаржа, хүлэйнь дэргэдэ һуулгаба. Тэдэ үбшэн зониие Иисүүс бултыень эдэгээбэ. 31Тиин хэлэгүй байһан зоной хэлэхые, бэртэһэн хүнүүдэй эдэгэхые, дохолонуудай ябахые, һохорнуудай хараатай болоһые хараһан зон аргагүй ехээр гайхаа бэлэй. Тиигээд Израилиин Бурханда алдар соло дуудаа һэн.
Иисүүс дүрбэ мянган хүниие садхааба
32Иисүүс шабинараа дуудажа:
– Би эдэ зониие хайрланаб. Тэдэ Намтай гурбан үдэр байлсаа, теэд мүнөө эдихэ юумэгүй болоод байна. Эдэниие үлэн хооһоор табиха дурагүй байнаб. Гэртээ бусаха замдаа эдэ һуларжа ядархал, – гэбэ. 33Теэд шабинарынь:
– Теэд эзэгүй хооһон энэ газарта эдэ олон зониие бултыень садхааха хилээмэ бидэ хаанаһаа абахабибди? – гэжэ урдаһаань һураба.
34– Таанадта хэды шэнээн хилээмэ байнаб? – гэжэ Иисүүсэй һурахада, тэдэнь:
– Долоон хилээмэн, хэдэхэн загаһан бии, – гэжэ харюусаба.
35Иисүүс улад зониие һуухыень захирба. 36Тиигээд байгаа долоон хилээмэ, загаһа абажа, Бурханда баяр баясхалан хүргэбэ, тэдэнииень хухалан, шабинартаа үгэбэ, шабинарынь улад зондо дам тараажа үгөө һэн. 37Хүн бүхэн дураараа эдижэ садаад, үшөө тиихэдэ эдеэнэй үлөөдэһэн долоон түрсүүгээр дүүрэн болоо. 38Эхэнэрнүүдһээ, үхибүүдһээ гадна дүрбэн мянган эрэшүүл эдеэлжэ садаһан байгаа.
39Иисүүс улад зониие табяад, онгосодо һуужа, далайгаар тамаран, Магаддаан хотын шадархи газар дайдада хүрэжэ ерэбэ.
Currently Selected:
Матвей 15: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
