Һошээ 9
9
Хэһэн хэрэгүүдэйнгээ хэмээр харюусаха саг ерэбэ
1Израилиин арад зон, ондоо арадуудтал һайндэрнүүдые хэжэ, сэнгэжэ байхаяа болигты! Таанад өөрын Бурханһаа холодожо, Тэрээндэ шүтэхэеэ болёод байнат. Орооһо сохидог газарта та янхан эхэнэртэл, мүнгэ абаха дуратайт. 2Теэд һаяын сагта таанад хилээмэгүй, оливын тоһогүй болохот, үзэмэй дараһан архитнайшье дууһахал. 3Эзэнэй үршөөһэн газарһаа тэдэ гаран ошохо баатай болохо, Эпрааим һөөргөө Египет руу бусаха, Ассиридэ сээртэй хоол эдин байха. 4Хариин газарта тэдэ Эзэндэ архяар үргэл хэдэггүй, бусадшье тахил үргэдэггүй байха. Эдеэ хоолынь ямбада эдиһэн хоолдол, эдиһэн лэ хүниие хорлохо. Хилээмэнь гансал үл залгахын тула, Эзэнэй нангин үргөө руу хэзээдэшье оруулагдахагүй. 5Эзэниие магтан дуулаһан һайндэрнүүдэй үедэ таанад юу хэхэбта? 6Аюул боложо, арад зоной тэрьедэн гүйхэдэ, Египедэй зон тэдэниие суглуулаад, Мээмпис хүдөөлүүлхэ! Үнэтэ мүнгэн хэрэгсэлнүүдынь болон гэрнүүдынь адаалхай һөөгүүдээр дүүрэн ургашанхай, хаясаанай болоод байха.
7Израиль, саг ерэбэ! Хэһэн хэрэгүүдэйнгээ хэмээр харюусаха сагшни ерэбэл! Ши энээнээ мэдэрхэш. «Энэ лүндэншэ тэнэг, галзуурһан энэ ухаа муутай» гэжэ ши хэлэнэш. Шинии нүгэл шэбэл угаа ехэ байһан дээрэһээ улад зоншни намайе ехэ үзэн ядана. 8Бурханай лүндэншэн Эпрааимые харууһалхаяа оролдоо, теэд Эпрааимай бүхы замда урьха табигданхай, тиин Эпрааимай Бурханай нангин үргөө соо зэбүүрхэл эсэргүүсэл оршоно. 9Гибаада үйлэдэһэн хэрэгтээл адляар, тэдэ забхай зальхай ябадалда сүм ороол! Бурхан тэдэнэй нүгэл тушаа һанажа, хэһээлтэ амасуулха даа.
Бурханай хэһээлтэнүүд
10Эзэн иигэжэ айладана:
– Израилиие анха түрүүн Минии олоходо, тэрэ сүл губида үзэмэй модондол, инжирэй модондо түрүүшын жэмэс мэтэ байгаа бэлэйл. Теэд тэрэ Пэһоорой Баалда эрьен ошожо, жэгшүүритэй муухай онгонуудта дуратай боложо, мүргэжэ эхилээ, тиигээд тэдээндээ адли болоо. 11Израилиин алдар соло шубуундал адли ниидэн ошохо, үхи хүүгэдшье түрэхөө болихо, һамгадшье хээлитэй болохогүй. 12Хүүгэдээ тэдэнэй үндылгөөшье һаань, буляан абахаб! Би тэдээнһээ буруу харахаб, тиихэдэм тэдэ гай гашуудалда орохо даа!
13Израиль, шамайе харахадам, ши һайхан газарта түбхинэнхэй байгааш, теэд мүнөө ши хүүгэдээ алуулха тээшэнь хүтэлэн ябанаш. 14Эзэн, тэдээндэ иимэ юумэ үршөөгыт – һамгадыень үхибүү тогтоодоггүй умайтай, үхибүү тэжээжэ шадахагүй хүхэтэй болгыт!
15Эзэн иигэжэ айладхана: «Бүхы муу муухай хэрэгүүдынь Гилгаалда эхилээ бэлэй. Тэндэ Би тэдэниие үзэн ядажа эхилээ һэм. Минии үргөөһөө тэдэниие намнан гаргахаб, тэдээндэ бэшэ дуратай байхаяа болёоб, удамаршадынь Минии урдаһаа буһалгаалаашад болоно. 16Үндэһөөрөө хатаһан ургамалдал адли Израиль болоо, бэшэ үри хүүгэдые түрэхэгүй. Угаа ехээр хүсэн түрөөшье һаань, Би тэрэ үнэтэ үхибүүень усадхахаб!»
17Минии Бурхан тэдээнһээ буруу хараха, юуб гэхэдэ, тэдэ үгыень дуулаагүй. Тиигээд тэдэ ондоо арадуудай дунда тэнэжэ-түгэншэлжэ ябаха.
Currently Selected:
Һошээ 9: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
