Һошээ 4
4
Эзэн Израильтай заргалдана
1Израилиин арад зон, Эзэнэй үгэ соносогты! Энэ газарта этигэмжэтэ байдал, энэрхы сэдьхэл, Намайе, Бурханиие, мэдэхэеэ һанаһан эрмэлзэл үгы гээд, Эзэн энэ газарай улад зониие гэмнэн, урдаһаань зарга болоод байна. 2Хараал, мэхэ гохо, алалта, хулгай ба забхай зальхай ябадал угаа дэлгэрээ. Шуһа урасхуулха ябадал хойно хойноһоо болоно. 3Энээнэй түлөө тус газар хэнэйшье амидархын аргагүй хооһон сүл губи болохо. Дээрэнь ажаһуугааша бүхы амитад – хээрын ан гүрөөл, жэгүүртэн, үнгэрхэдөө, загаһадшье бултадаа хосорхо туйлдаа хүрэхэ.
Эзэн санаартадые гэмнэнэ
4Эзэн иигэжэ айладхаа:
– Харин хэнииешье бү зэмэлэгты, хэндэшье донгодолго бү үгэгты. Би санаартадые гэмнэнэб. 5Ши болон лүндэншэд үдэр, һүнигүй бүдэржэ, унан алдахат. Абяа аниргүй болгон эхыеш усадхахаб! 6Намайе мэдэрхэеэ татагалзаа хадаа арад түмэмни усадхагдаха. Таанад, санаартад, Намайе мэдэрхэеэ арсажа, һургаалым мартан хэрэгсээгээгүй бэлэйт. Тиимэһээ Би таанадые хэрэгсээхэгүйб, хүбүүдыеш санаартадни гэжэ тоохогүйб, мартахаб. 7Санаартад олошорхо бүри урдаһаам нүгэл шэбэлээ бүри олоор үйлэдэжэ байна. Би тэдэнэй алдар солые эшэмхэй муу байдалаар һэлгэхэб. 8Арадайм нүгэл шэбэл үйлэдэхэдэ, тэдэ баяжажа байна. Бүри ехээр нүгэл хэг лэ гээд тэдэ сэдьхэнэ. 9Арад зониие яажа хэһээнэбиб, тон тиимээр санаартадые хэһээхэб. Хэһэн үйлэ хэрэгэйнь хэмээр тэдээндэ хэһээлтэ амасуулхаб. 10Тэдэ эдеэлээшье һаа, садахагүй, ондоо бурхадта мүргэбэшье, хүбүүдтэй болохогүй. Ушар гэбэл, тэдэ Намһаа буруу хараа шуу.
11Арад түмэн ондоо бурхадта зальбарна, ухааень манаруулха шэнэ аргануудые бэдэрнэ. 12Минии арад түмэн модон онгонһоо зүбшэл заабари асуужа байна! Тэдэ Намһаа буруу хаража, ондоо бурхадта мүргэжэ, янхан эхэнэртэл адли, забхай зальхай хэрэгүүдые эрхилнэ. 13Хада уулануудай болон гүбээнүүдэй орой дээгүүр тэдэ тахил үргэнэ, һүүдэртэ, һалбагар мүшэр, набшатай модод доро уталгануудые ууюулна. Иимэ жэшээ хараад, басагад болон бэреэдтнай янхан ябадал гаргана. 14Зальхай забхай ябадалтай басагад, бэреэдыетнай усадхахаяа Би үшөө хүлеэхэм, юуб гэбэл, таанад өөһэдөө янхан ябадалтайт, хариин бурхадта мүргэн, тахил үргэнэт. Тэнэг мунхаг иимэ арад хадаа таанад усадхагдахат!
15Израилиин улад зон, таанад ондоо бурхадай хойноһоо ябанат. Нүгэл хэжэ ябаа хадаа ябаад, Иудын зониие бү дахуулагты! Гилгаал болон Бэт-Аавэн руу ябажа мүргэхэеэ болигты! Амиды Эзэнэй нэрээр хуурмаг тангариг үргэхэеэ болигты! 16Израилиин улад үсэд үнеэндэл адли болоо. Уужам бэлшээри дээрэ номхон хурьгадые харюулһандал адляар Би тэдэниие харууһалжа, адуулжа байха аалби?! 17Израилиин арад зониие онгонууд эльбэ жэльбэ дороо оруулаа. Орхиё тэрэ зандань! 18Шал һогтуу боложо, тэдэ забхай зальхай ябадал гаргана. Эшхэбтэр муухай байдалда тэдэ дуратай. 19Һалхиндал адляар тэдэ оро һэегүй үлеэгдэн үгы хэгдэхэ. Ондоо бурхадта тахил үргэжэ байһандаа тэдэ эшэжэ эхилхэ.
Currently Selected:
Һошээ 4: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
