Һошээ 5
5
1Санаартад, энээниие шагныта! Израилиин улад зон, соносогты! Хаанай гэр бүлэ, шэхээ табигты! Таанадые шүүн, заргада оруулхань! Ушар юуб гэхэдэ, таанад Мицпаада болон Табоорто улад зондо занга табижа байгаат. 2Тэдэ забхайрһанай гүнзэгы нүхэндэ унаа. Тиимэһээ Би бултыень хэһээхэб. 3Израиль, Би шам тушаа бүхы юумэ мэдэнэб. Ши Намһаа буруу хаража, ондоо бурхадта мүргэжэ байнаш.
4Хэжэ байгаа хэрэгүүдынь Бурхандаа дахин тэдэнэй эрьен ерэхые табинагүй. Онгонуудта мүргэхэ гээшэнь досоонь байһан зандаа, Эзэниие тэдэ мэдэнэгүй. 5Израилиин зоной дээрэлхүү зан өөһэдтэнь мууе хэнэ. Хэһэн нүгэлһөө боложо Израиль бүдэрэн унаха, Иудашье тэрээнтэй хамта унаха. 6Эзэндэ хони, үхэр тахил болгон үргэхэеэ тэдэ ошохо, Эзэниие бэдэрхэ, теэд олохогүй. Эзэн тэдээнһээ холодоо. 7Эзэндэ тэдэ урбаа, үхи хүүгэдынь өөрынь бэшэ. Тиимэһээ мүнөө тэдэ газар уһантаяа хамта һандаргаагдахань.
Израиль Иуда хоёр хоорондоо дайлалдана
8Гибаада үхэр бүреэгээр үлеэжэ, һэргылһэн дохёо үгэгты! Рамаада бүреэ дуугаргагты! Бэньямиинэй зон, Бэт-Аавэндэ добтолгын тэмдэг үгэгты! 9Хэһээлтын үдэр Израилиин газар үрэжэлгүй, амигүй хооһон болохо! Энээниие хэхэб гэжэ Израилиин обог бүхэндэ дуулганаб!
10Иудын ноёд Израилиин газар уһанай хилын тэмдэгүүдые хүдэлгэжэ, газар өөһэдтөө хулгайлан абана. Тэдээндэ уурлажа, уур хилэнгээ уһан мэтэ тэдээн дээрэ адхахаб. 11Израиль гайтай ехэ сохилто абанхай. Ондоо бурхадта мүргэһэнэйнь аша энэл даа! 12Израилиие хибэн мэтэ химэлэн һалгаахаб, Иудые модоной хорхой мэтэ эдин үгы хэхэб!
13Израиль үбшэ хабшангаа ойлгоходоо, Иуда шарха ярануудаа харахадаа, Ассири руу ошожо, асари ехэ хүсэ шадалтай хаанһаа туһа эрибэ. Теэд тэрэ танай шарха, үбшэнгые эдэгээжэ шадахагүй. 14Арсаландал адляар Би Израилиин арадта, Иудын уладта добтолон орохоб. Тэдэниие таһа татан, шэрэн абаашажа байхадам, хэншье тэдэниие Намһаа абаржа шадахагүй! 15Тэдэнэй өөрынгөө гэм мэдэржэ, Намайе бэдэржэ эхилтэр Би тэдээн тушаа мартаад, огтолон орхёод байхаб.
Currently Selected:
Һошээ 5: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
