Хаггай 2

Шэнэ Һүмэ урдынхидаа орходоо бүри баян, үлүү ехэ алдар суутай байха

1Долоодохи һарын хорин нэгэдэхи үдэр Эзэн Хаггай лүндэншэдэ иигэжэ айладхаба:

2– Иудын захирагша, Шалтиээлэй хүбүүн Зэрубабээлдэ, ахамад санаарта Ёцадаагай хүбүүн Иисүүстэ ба баряанһаа бусааша арад зондо иимэ захяа дамжуулыш даа: 3«Энэ Һүмые урданайнь алдар солын үедэ үзөөшэ, таанарай дунда үлөөшэ хэн байнаб? Мүнөө энэ Һүмэ таанарта ямараар харагданаб? Юуншье бэшэ гээд таанарта үзэгдэнэ бэшэ аал? 4Гэбэшье Зэрубабээл зоригтой бай, Ёцадаагай хүбүүн Иисүүс, ахамад санаартан, зоригтой бай! Энэ ороной улад зон, зоригтой байгты! Би, Түмэн Сэрэгтэ Эзэн, таанартай хамта байнаб. Ажал хэгты, туһалхаб. 5Египедһээ гаража байхадатнай таанартай баталһан Минии хэлсээн ба Минии Һүлдэ таанадтай хамта байна, бү айгты! 6Түмэн Сэрэгтэ Эзэн айладхана: Һаяар Би тэнгэри болон газарые, далай болон хуурай газарые һэгсэрхэб! 7Бүхы арадуудые һэгсэрхэб! Тэдэнэй баялиг эндэ асаруулагдаха. Тиигээд Минии алдар солын гэрэл энэ һүмые дууһан гэрэлтүүлхэ. 8Бүхы алта мүнгэн Минии юм. 9Шэнэ Һүмэ хуушан Һүмэдэ орходоо бүри алдар суутай байха гэжэ Би найдуулнаб. Энэ газарай улад зондо амгалан тайбан байдал Би үршөөхэб. Энэ болбол Би, Түмэн Сэрэгтэ Эзэн, айладхана мүн!»

Нангин болон бузарлагдаһан зүйл тухай

10Даариин хаан шэрээдэ заларһаар хоёрдохи жэл, юһэдэхи һара, хорин дүрбэдэхи үдэр ябажа байхада Эзэн Хаггай лүндэншөөр дамжуулан айладхал буулгаа бэлэй. 11Түмэн Сэрэгтэ Эзэн иигэжэ айладаа:

– Һургаал тухай лүндэншэдһөө иигэжэ асуугыш даа: 12Хэрбээ хэн нэгэн арюудхагдаһан мяха хубсаһанайнгаа хуняаһанда абаад ябажа байтараа тэрээгээрээ хилээмэндэ, болоһон эдеэндэ, үзэмэй дараһан архида, оливын тоһондо, юрэдөө, ямаршье хоолдо хүрэбэл, тэрэнь арюун болохо гү?

Санаартад харюусаба:

– Үгы.

13Хаггай асууба:

– Хэрбээ хүүртэ хүрэжэ бузартаһан хүн эдэ бүгэдын али нэгэндэ хүрэбэл, тэрэ нь бузартаха гү?

Санаартад харюусаба:

– Бузартаха.

14Хаггай харюудань иигэжэ хэлэбэ:

– Энэ арад зон иимэл даа. Минии харахада тэдэ иимэ, – гэжэ Эзэн тунхаглажа байна. – Тэдэнэй хэһэн юумэн булта тиимэ. Тэдэ юу үргэнэб, тэрэнь бузартай.

Энэ сагһаа хойшо Эзэн иудынхидэй таряалан болон сэсэрлигүүдые үреэбэ

15Мүнөө юун таанадтай болоһые ойлгожо шадаха гүт? Минии ордоной заһабарилгын ажалай үшөө эхилээдүйдэ 16хорин боолто таряа абахаар хэн нэгэнэй ерэхэдэ, тэндэ оройдоол арбан боолто байдаг; үзэмэй дараһан архиин торхоһоо хэн нэгэнэй табин һуулга абахаяа ерэхэдэ, тэндэ оройдоол хорин һуулга байдаг бэлэй. 17Би таанарые болон хэрэг ажалыетнай халуун һалхи, мүндэрөөр сохин байгааб, теэд таанар үшөөл һанаа ороогүйт, Нам руу эрьеэгүйт. 18Минии ордоной һуури мүнөөдэр дууһан табигдаа. Саашадаа юун болохоб гэжэ анхарыт. 19Амбаар соо үрэ бии гээшэ гү? Үзэмэй жэмэс, инжирэй модон, анар, чидун модон мүнөө болотор үрэ үгөөгүй байгаа. Харин мүнөөдэрһөө эхилэн Би таанадые үреэхэб.

Зэрубабээл – Эзэнэй богоол

20Тэрэл үдэртөө, тэрэ һарын хорин дүрбэдэхи үдэр, Эзэн Хаггайда хоёрдохёо хандажа, иигэжэ дамжуулба:

21– Иудын захирагша Зэрубабээлдэ иигэжэ хэлэ: тэнгэри, газарые Эзэн доһолгоохонь, 22хан түрэнүүдые үгы хэхэнь, арадуудай хан түрэнүүдэй хүсэ шадалынь бууруулхань. Дайшалхы тэргэнүүдые хүмэрюулжэ, жолоошодыень унагаахань. Морин сэрэгшэд бэе бэеэ һэлмээр сабшан усадхаха. 23Энэ болбол Түмэн Сэрэгтэ Эзэн айладхана мүн! Шалтиээлэй хүбүүн Зэрубабээл, тэрэ үдэр Эзэн шамайе, Өөрын богоолые, шэлэн абажа, Өөрын нэрэһээ зонхилдог болгохо. Энэ хадаа Түмэн Сэрэгтэ Эзэн айладаа мүн!

Currently Selected:

Хаггай 2: BurBBL2024

Highlight

Copy

Compare