Аввакуум 3
3
Аввакуумай Эзэндэ этигэл найдал
1Аввакуум лүндэншын зальбарал-гашуудал дуун:
2Эзэн! Тан тухай мэдээ дуулаад, би һүрдэн айжа байнам.
Эзэн! Манай энэ үе сагта гайхамшагта хэрэгүүдээ бүтээгыт!
Уур хилэнтэй байгаа сагтаа үршөөл тухайгаа бү мартыт!
3Тэмаанһаа болон Параан хадаһаа
Арюун Бурхан заларжа байна.
Тэрэнэй һүр жабхалан тэнгэри дүүрэн хушаа,
дэлхэй Тэрэнэй алдар солоор дүүрэн байна.
4Тэрэнэй туяа наранай гэрэл мэтэ,
гарһаань туяанууд сасаран байна.
Тэндэл хүсэ шадалынь хоноотой.
5Урдань тахал үбшэн ябана,
хойноһоонь һүйдхэлтэй хамшаг дахана.
6Тэрэнэй зогсоходо, дэлхэй доһолбо.
Харахадань, арадууд шэшэрбэ.
Мүнхэ хада ууланууд хамхарба,
эртэ урдын толгойнууд унаба.
Эдэ хадаа Тэрэнэй эртэ урда сагта сэнгэдэг зүргэ замууд бэлэйл.
7Кушаан болон Мидианай майхангуудай
айһандаа шэшэрэн байхые хараа һэм.
8Моридоо унаад, абаралай тэргэнүүдтээ залараад ерэһэнтнай
гол мүрэнүүдтэ сухалдаһандаа, үгышье һаа,
далайда уурлаһандаа гэжэ гү?
9Годли табихаар бэлэн болгожо,
Та һурша номоо татаат.
Газар дэлхэйе гол мүрэнүүдээр хахалан хубаабат.
10Хада ууланууд Таниие хараад, доһолон шэшэрбэ,
аадар бороо адхарба.
Газарай гүнэй уһан шууяжа,
долгидынь үндэртэ хүрэн шааяба.
11Харбаатай годлинуудайтнай туяа гэрэлдэ,
ялалзаһан жадануудайтнай туяанда гайхан,
12уур сухалтай газар дэлхэйгээр Та алхалжа,
зэбүүрхэн арадуудые дэбһэнэт.
13Өөрын арад түмэнэй абарал болон,
шэлэжэ тоһолон ёһолһон хаанаа абархын тула
Та гаража ерээ бэлэйт.
Нүгэлтэй муу арадай удамаршые Та сохижо,
дууһан нюсэгэлэн орхинот.
14Түшэмэлнүүдынь шуурган мэтэ нам руу дугташан,
хүсэгүйе һэмээхэн үгы хэхэмнай гэжэ баярлан,
намайе хюдахаяа һанаба.
Теэд Та удамаршынь өөрынь жадаар нэбтэ хадхабат.
15Та моридоороо далай тэнгисээр,
ехэ уһанай долгин дээгүүр зам гарган ябабат.
16Тэрээн тухай дуулахадаа, досоомни доһолбо,
урални шэшэрбэ, яһамни үбдэбэ,
зогсоһон газартаа би һалганабаб.
Теэд арад зониием сүйдхүүлһэн дээрмэшэндэ
һүнэхэ сагай ерэхые би тэсэбэритэйгээр хүлеэхэ ёһотойб.
17Инжир модоной сэсэглээшьегүй,
үзэмэй модоной үрэ жэмэс үгөөшьегүй,
чидун модоной ургаашьегүй,
таряаланда юуншье ургаагүй,
хашаанда хонигүй, һарабша доро үхэргүй болоошье һаань,
18би Эзэндэ баясан байхаб,
юуб гэхэдэ, Тэрэ минии Абарагша Бурхан мүн!
19Эзэн Бурхан – минии хүсэ шадал.
Тэрэ хүлыем һогооной хүл мэтэ болгожо,
үндэр газарнуудаар намайе ябуулхал!
Дуунай бүлэгэй хүтэлбэрилэгшэдэ: хүбшэргэйтэ зэмсэгэй дууряалга доро.
Currently Selected:
Аввакуум 3: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
