Цэпаанияа 1
1
1Хэзэкияагай дүшэ, Амарияагай гуша, Гэдаалияагай аша, Күшиигэй хүбүүн Цэпаанияа гэгшэдэ Иудын хаан, Аммооной хүбүүн Ёшияагай амиды мэндэ байха үедэ Эзэнэй айладхаһан захяа гэбэл, энэ.
Эзэнэй үдэр, уур хилэнгэй үдэр ойртоо
2Эзэн иигэжэ айладаа:
– Энэ хүрьһэтэ дэлхэй дээрэһээ бүхы юумэ дууһан усадхахаб. 3Улад зониие, мал, огторгойн жэгүүртэниие, далайн загаһадые усадхахаб. Газарай хүрьһэн дээрэһээ зониие үгы хэхэдэм, муу муухай зон бүдэрдэг зүйлнүүдтэеэ хамта һалаха. Энэ болбол Би, Эзэн, айладхаа мүн! 4Иудын болон Иерусалимай бүхы ажаһуугшадые усадхахаяа гараа һунгахаб. Баалда мүргэдэг зүйлнүүдэй бүхы үлдөөсые энэ газарһаа үгы хэхэб, шүтээнэй санаартад тушаа һануулха юушье үлөөхэгүйб. 5Гэрэй хушалта дээрэһээ огторгойн одо мүшэдтэ зальбарагшадые, Минии нэрээр тангариг үргэжэ байтараа Милхоом бурхандаа эрьежэ, тэрэнэй нэрээр тангариглажа байгшадые, 6Намһаа буруу харагшадые, Намайе бэдэрээгүй, һурагшалан Нам руу ерээгүй зониие усадхахаб.
7Эзэнэй зарга шүүбэриин үдэр дүтэлөө, тиимэһээ Эзэн Бурханай хажууда абяа аниргүй байгты! Өөрын арад түмэнөөр тахил хэхэеэ Эзэн бэлдээд байна, Иудые һандарган дээрмэшэлхээр ямар дайсадые урихаб гэжэ Тэрэ тодорхойлоо. 8Эзэн иигэжэ айладхаа:
– Тахил үргэхэ үдэрөө Би түшэмэлнүүдые, хаанай хүбүүдые, хариин ёһо заншалнуудые сахидаг зониие усадхахаб. 9Шүтээн онгонуудта мүргэгшэдые бултыень#1:9 Эхэ еврей хэлэн дээрээ: «богоһо дээгүүр дэбхэрэн һүрэгшэдые бултыень» гэжэ бэшээтэй, Пилиштынхидтэ һүмын богоһо дээгүүр дэбхэрхэ гээшэ шүтээндөө мүргэхэ ёһололой нэгэ хуби байгаа юм., Минии нангин үргөө хулгайлһан, дээрмэшэлһэн олзоороо дүүргэгшэдые усадхахаб. 10Тэрэ үдэр Иерусалимай Загаһанай хаалгануудай хажууда болон нүгөө хаалгануудай дэргэдэ орилоон хашхаралдаан болохо, гүбээнүүдһээ шанга һандаралгын абяан дуулдаха. Энэ болбол Би, Эзэн, айладхаа мүн! 11Хотын доодо шатада ажаһуугааша зон, шангаар бархирыта! Юуб гэбэл, аралжаа наймаа эрхилэгшэд, мүнгэ хэмжээшэд бултадаа хюдагдаха! 12Тэрэ сагта Би дэн абаад, Иерусалимые нэгжэн харахаб. Сайн шаара мэтэ үлдөөсөөрөө сэдьхэлээ ханаад һуугааша, «Эзэн һайншье, муушье юумэ хэдэггүй» гэжэ һанажа байгааша зониие Би хэһээхэб. 13Тиигээд тэдэнэй баялиг дайсанай олзо болохо, гэр байшангуудынь эзэгүйрэн хооһорхо. Гэр баряашье һаа, тэдэ тэндэ ажаһуухагүй, үзэмэй модоной сэсэрлиг һуулгаашье һаа, үзэмэй дараһан архи тэдэ уухагүй.
14Эзэнэй агууехэ үдэр ойртоо! Ойртоод, угаа хурдан ерэжэ байна. Эзэнэй үдэрэй абяан лэ! Баатар сэрэгшэшье тэндэ сурхирса уйлахал! 15Энэ үдэр хадаа уур хилэнгэй үдэр, бэрхэшээл, зоболонгой үдэр, һандарал, эзэгүйрэлгын үдэр, хаб харанхы, бүрэнхын үдэр, үүлэтэ, бүрхэг харанхын үдэр болохол. 16Энэ хадаа бүхэлэгдэһэн хотонуудта болон үндэр самхагуудта добтолон орогшо сэрэгэй үхэр бүреэгэй дуугарһан болон шанга хашхараанай үдэр болохо юм.
17Эзэн иигэжэ айладана: «Зониие хашан зобооходом, тэдэ һохор мэтэ тэмтэрэн ябадаг болохо. Тэдэ Минии урдаһаа нүгэл хээ, тиимэһээ шуһаниинь уһан мэтэ адхагдаха, үхэһэн бэень шабааһан мэтэ шобторогдохо».
18Эзэнэй хилэнсэгтэ үдэрэй мандахада, алта мүнгэншье тэдэниие абаржа шадахагүй. Бүхы дэлхэй Тэрэнэй уур хилэнгэй гал дүлэн соо дууһан шатаха. Ушарынь гэбэл, дэлхэйн бүхы ажаһуугшадые Тэрэ гэнтэ дүрэлзэһэн уур хилэнгээр хюдаха юм!
Currently Selected:
Цэпаанияа 1: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
