Аввакуум 2
2
Эзэнэй хоёрдохи харюу
1Би манаанай үндэр самхаг руу абиран гаража, Эзэнэй намда харюусахые хүлеэн, гомдолоо юун гэжэ ойлгуулхаяа бодон зогсобоб. 2Эзэн намда иимэ харюу үгэбэ:
– Үзэгдэлые бэшээд аба. Уншагшын бэлэхэнээр уншахын тула шулуун хабтаһанууд дээрэ элихэнээр бэшэ. 3Тогтоогдоһон саг тушаа үзэгдэл юм. Теэд тэрэнэй удаараашье һаань, хүлеэгөөрэй, заабол бэелдэхэ. Тэрэ болюулагдахагүй, заабол ерэхэ. 4Зай, бардам зантай хэн нэгэниие Би тоохогүйб. Үнэн сэдьхэлтэн этигэл һүзэгэйнгөөл ашаар амидарха.
5Ехэрхэг зантай хүн эһээгдэжэ байгааша үзэмэй дараһан архидал оройдоошье тогтохогүй. Тэрэ үхэлэй орон мэтэ эдихэ дура хүсэлөө бүри ехэ болгожо, үхэлдэл адли садахагүй, бүхы арадуудые даран дарлан байха һанаатай.
Дарлагшадта заналтанууд
6Дарлагша арадуудынь бултадаа тэрээн тушаа ябаган зугаа, наадалһан дуу дуулаха: «Өөрын бэшэ зөөреэр өөрыгөө баяжуулдаг хүн удаанай гү? Үри зээли арадууд дээрэ тохожо, тэрэ бэеэ зобооно!»
7Шинии дарлалта доро байгаашад гэнтэ урдаһааш бодожо, шамайе һэжэржэ эхилхэл. Дээрмэшэд добтолжо, ши тэдэнэй хүнэһэн болохолши. 8Олон арадуудые дээрмэшэлһэнэйш түлөө бусад бүхы арад түмэн урдаһааш тулан, хүнэй шуһа урасхуулһан, орон нютагыень, хото һууринуудыень, ажаһуугшадыень хооһоруулан һүйдхүүлһэнэйш түлөө шамайе хэһээн дээрмэшэлхэ.
9Өөрын гэр байрада хуули бусаар эд зөөри суглуулааша, гэнэ усалһаа болгоомжолон, үндэр газарта гэр уурхайгаа түхеэрээшэ хэн нэгэн абарагдахагүй! 10Олон арадуудые усадхажа, нүгэл үйлэдөөш. Иигэжэ гэр бүлэдөө ши гай тодхор татабаш. 11Нээрэһээ хана хэрэмһээ шулуунууд хашхаржа, модон байшангай хүндэлэбшэнүүд иимэ зондо иигэжэ харюусаха: 12«Шуһа урасхуулан хото баригша, хүсэрхэлөөр һуури табигша абарагдахагүй!» 13Зай, арад үндэһэтэнэй бүхы шадалаа эршэдэн ажаллаһаниинь гал дүлэндэ хосорхо, дэмы һалаха гэжэ Түмэн Сэрэгтэ Эзэн тогтоогоо бэшэ аал?
14Юуб гэбэл, уһан далайе дүүргэдэгтэл, газар дэлхэй хадаа
Эзэнэй алдар тухай мэдэсээр дүүрэнхэй байха.
15Дүтын хүндэ муу муухай юумэ хүсэн, унда барижа, тэрэниие доромжолхо, баһахаяа һогтоогшо ши абарагдахагүйш! 16Алдар солын орондо ши эшэмхэй муу байдал амжахаш. Мүнөө ши уужа-һогтожо, өөрыгөө эшхэбтэр байдалда оруулхаш. Эзэн эшхэбтэр байдалай ундатай аяга шамда бариха! 17Ливаанай ой модо хайра гамгүй усадхааш. Ан амитадые, улад зониие хюдааш, орон нютагуудые хооһоруулааш, һандаргааш. Энээнэй түлөө ши зэмээ амасахаш.
Вавилооной хүсэгүй онгонууд
18Шүтээниие хүнэй һиилэн бүтээһэн хойно тэрэнэй ашаг туһа юун байхаб даа. Энээниие бүтээгшэ хүн гар бүтээлдээ этигэн найдаал ааб даа, теэд худал хуурмагые заадаг, дуугаржа шадахагүй хэмэл хүрэгүүдһээ ямар туһа байхаб? 19Модоной тайрадаһанда хандан «һэри!» гэжэ, дүлии шулуунда «бодо!» гэжэ хэлэдэг хүн абарагдахагүй. Тэдэ яагаад багша боложо шадахаб? Харыт, тэрэ алта мүнгөөр шэмэглэгдэнхэй, теэд ямаршье амисхал тэрээндэ байхагүй.
20Эзэн нангин Һүмэ соогоо оршоно. Бүхы дэлхэй Тэрэнэй урда дуугүй байхань болтогой!
Currently Selected:
Аввакуум 2: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
