Даниил 3
3
Гурбан хүбүүд алтан хүрэгтэ мүргэхэеэ арсана
1Навуходоносор хаан жаран тохой ута, зургаан тохой арай болохогүй үргэн алтан хүрэг бүтээжэ, Вавилооной Дураа гэдэг нюруу газарта табиха тухай захирал гаргаба. 2Тиигээд өөрынь үүсхэлээр бүтээгдэһэн тэрэ хүрэг арюудхаха ёһололдо бүхы тушаалтадые – түшэмэлнүүд, амбан ноёд, хэрэг эрхилэгшэд, мүн тиихэдэ зүбшэгшэд, мүнгэн һангай ноёд, шүүбэрилэгшэд, бүхы газар уһанай ноёд, тушаалтадай ерэхэ тухай тэрэ захирба.
3Эдэ бүхы тушаалта ноёдой сугларжа, Навуходоносор хаанай байгуулһан хүрэгэй урда зогсон байхада 4хаанай хуули эрхэнүүдые айладхагша шангаар тунхаглаба:
– Бүхы арадууд, обогууд, бүлээлингүүд, шагныта! 5Үхэр бүреэгэй, лимбын, ятагай болон бусад хүгжэм дууламсаараа доошоо һүгэдэн унажа, Навуходоносор хаанай байгуулһан алтан хүрэгтэ мүргэхэ ёһотойт. 6Хэн һүгэдэнгүй, мүргэнгүй байнаб, аһажа байһан пеэшэн руу тэрэ дары хаюулха!
7Үхэр бүреэгэй, лимбын, ятагай болон бусад хүгжэм дууламсаараа бүхы арадууд, обогууд, бүлээлингүүд доошоо һүгэдэн унажа, Навуходоносор хаанай байгуулһан алтан хүрэгтэ мүргэбэ.
8Энэ үедэ халдейшүүдэй зариман иудейнүүдые хоблон муушалха арга гаргаба ха. 9Тэдэ Навуходоносор хаанда:
– Үндэр түрэлтэ хаан, мүнхэ оршохотнай болтогой! 10Хүгжэм дууламсаараа хүн бүхэн һүгэдэн унажа, алтан хүрэгтэ мүргэхэ ёһотой гэһэн захиралта та гаргаа бэлэйт. 11Хэн нэгэн доошоо унан һүгэдэнгүй, мүргэнгүй байбал, аһажа байһан пеэшэн руу хаюулха ёһотой бэлэйл. 12Вавилоон орон нютаг захиран зонхилон байхыень танай табигша иудейнүүд Шадраах, Мэшаах болон Абээд-Нэгоо танай захиралта дууланагүй, бурхадыетнай шүтэнэгүй, байгуулһан алтан хүрэгтэтнай мүргэнэгүй, – гэжэ дуулгаба.
13Навуходоносор хаан ехэ уурлан сухалдажа, Шадраах, Мэшаах болон Абээд-Нэгоое асархыень захирба. Тэдэниие асархадань, 14Навуходоносор:
– Шадраах, Мэшаах, Абээд-Нэгоо, таанадые минии бурхадые шүтэнэгүй, байгуулһан алтан хүрэгтэм мүргэнэгүй гэжэ дуулааб. Энэ үнэн гү? 15Тиимэ һаань, шэлэгты: үхэр бүреэгэй, лимбын, ятагай болон бусад хүгжэмэй абяа дууламсаараа һүгэдэн доошоо унажа, минии байгуулһан хүрэгтэ мүргэгты, мүргөөгүй гээшэ һаа, галаар бушаганажа байгша пеэшэн руу тэрэ дары хаюулхат. Тиихэдэ ямар бурхан таанадые абарха гээд һананат? – гэжэ хэлэбэ.
16Шадраах, Мэшаах болон Абээд-Нэгоо гурбан Навуходоносор хаанда хэлэбэ:
– Үндэр түрэлтэ хаан, энээндэ маанадай харюусахын хэрэг үгы. 17Манай шүтэдэг Бурхан абарха аргатай гээшэ һаа, галаар дүрэлзэһэн пеэшэнһээшье, танай мэдэлһээшье маанадые абархал. 18Харин тиимэ юумэнэй болоошьегүй һаань, та, үндэр түрэлтэ хаан, мэдэжэ байгты: бурхадтатнай шүтэхэгүйбди, байгуулһан алтан хүрэгтэтнай мүргэхэгүйбди, – гэжэ харюусаба.
19Навуходоносор хаан угаа сухалдажа, Шадраах, Мэшаах болон Абээд-Нэгоо гэгшэд руу хүри-улаанаар хараад, урдынхидал орходоо долоо дахин ехээр пеэшэ түлин халаахые захирба. 20Тиигээд сэрэгэйнгээ эгээл хүсэтэй зондо Шадраах, Мэшаах болон Абээд-Нэгоо гэгшэдые хүлижэ, галаар бушаганажа байгша пеэшэн руу хаяхыень захирба. 21Хубсаһатай зандань – үмдэ, самсатайнь, малгайтайнь, юрэдөө, бүхы хубсаһаарнь – тэдэниие хүлижэ, сэрэгшэд гал дүлэн пеэшэн руу хаяба.
22Хаанай хатуу захиралтын ёһоор, пеэшэн угаа ехээр халаагдаһан байжа, Шадраах, Мэшаах, Абээд-Нэгоо гэгшэдые гал руу хаягша зон өөһэдөө шатан хосорбо. 23Шадраах, Мэшаах болон Абээд-Нэгоо хүлеэтэй зандаа галаар бушаганаһан пеэшэн руу унаа бэлэй.
Хүбүүдэй гайхалтай абаралга
24Гэнтэ Навуходоносор угаа гайхан, хүл дээрээ собхорон бодожо, түшэмэлнүүдһээ асууба:
– Гурбан хүниие хүлеэтэй зандань гал руу шэдээ бэшэ аалди?
Тэдэнь:
– Мүн даа, үндэр түрэлтэ хаан! – гэжэ харюусаба.
25– Теэд би дүрбэн хүниие гал дүлэн соо хараналби! Тэдэ ямаршье хүлилгэгүй, бүрин бүтэн зандаа гал соогуур сүлөөтэй ябажа байна. Дүрбэдэхи хүниинь бурхандал адли! – гэжэ Навуходоносор хэлэбэ.
26Тиигээд тэрэ аһажа байгша пеэшэнэй амһартада дүтэлөөд:
– Шадраах! Мэшаах! Абээд-Нэгоо! Дээдэ Бурханай богоолнууд! Гарагты тэндэһээ! – гэбэ.
Тиихэдэнь Шадраах, Мэшаах болон Абээд-Нэгоо гал дүлэн сооһоо гараба. 27Түшэмэлнүүд, амбан ноёд, хэрэг эрхилэгшэд, хаанай бусад тушаалтад сугларжа, гал дүлэн эдэ зониие яагаашьегүй – толгойнь үһэн шатаагүй, хубсаһа хунарынь тэрэл зандаа, утаанайшье үнэргүй байһыень ойлгон хараба.
28Навуходоносор:
– Шадраахай, Мэшаахай, Абээд-Нэгоогой Бурханда магтаал үргэгты! Тэрэ тэнгэриин Эльгээмэлээ эльгээжэ, Өөртэнь этигэдэг богоолнуудаа абараа! Эдэ зон минии захиралта дуулангүй, ами наһаяа хайрлангүй, өөрын Бурханһаа ондоо бурхадта шүтэн мүргэхэеэ арсаал! 29Тиимэһээ ямар нэгэн арадай, обогой, бүлээлингэй хэн нэгэн Шадраахай, Мэшаахай, Абээд-Нэгоогой Бурхан тушаа баһан дуугарбал, хэһэг болгон сабшагдаха, гэр байрань һандаргаагдаха. Энэ Бурхандал адли абарха ондоо бурхан байхагүй, – гэжэ тунхаглаба.
30Тиигээд хаан Шадраах, Мэшаах болон Абээд-Нэгоодо Вавилоон соо үшөө үндэр тушаалнуудые үршөөгөө бэлэй.
Навуходоносорой аймшагтай зүүдэн
31Навуходоносор хаан дэлхэй дээрэ ажаһуудаг бүхы арадуудта, обогуудта болон бүлээлингүүдтэ иигэжэ дуулгана:
– Амгалан тайбаниие, үнэр баян болохыетнай хүсэнэб! 32Дээдэ Бурханай харуулһан дүлгэ тэмдэгүүд, гайхамшагта үзэгдэлнүүд тушаа таанадта хөөрэхэ хүсэлэнтэйб.
33Дүлгэ тэмдэгүүдынь ямар агууехэб!
Гайхамшагта үзэгдэлнүүдынь хэды шангаб!
Бурханай хан түрэ хэтэ мүнхэдөө оршохо,
засаг зонхилолтонь үеһөө үедэ үргэлжэлхэ!
Currently Selected:
Даниил 3: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
