Даниил 4
4
1Би, Навуходоносор хаан, гэртээ амар амгалан, ордон соогоо баян бардам ажаһуужа байгааб. 2Теэд нэгэ зүүдэ хаража, һүрдэн сошобоб; унтажа байхадаа хараһан зүйлни намайе айлгаба. 3Зүүдыем тайлбарилхыень Вавилооной бүхы сэсэн мэргэшүүлые урдамни асарха тухай захирбаб. 4Тиихэдэм эльбэ жэльбэтэйшүүл, үзэлшэд, мэргэшүүл халдейшүүд, зурхайшад ерэбэ. Би тэдээндэ зүүдэеэ хөөрэбэб, харин тэдэ зүүдыем тайлбарилжа шадабагүй.
5Тииһээр одоо Даниил (минии бурханай нэрээр тэрэниие үшөө Бэлтэшаццаар гээд нэрлэдэг) ерэбэ. Бурханай нангин һүлдэ тэрээндэ халин оронхой, би тэрээндэ өөрынгөө зүүдэ хөөрэжэ үгэбэб:
6– Үзэлшэдэй ахамад болохо Бэлтэшаццаар! Шамда Бурханай нангин һүлдэ бии, ямаршье нюуса бэлэхэнээр элирүүлдэгши гээд би мэдэнэб. Минии хараһан зүүдэ, удхыень тайлбарилжа үгыш.
7Унтаридаа нойрсон байхадаа би иимэ зүүдэ харааб:
Газар дэлхэйн дунда үндэр гэгшын модоной ургажа байхые харааб.
8Тэрэ урга ургаһаар, томо боло болоһоор
огторгой тулама үндэр болобо.
Газар дэлхэйн алишье хаяаһаа тэрэниие харамаар бэлэй.
9Һаглагар гоё набша намаатай,
бултанай хүртэхөөр олон жэмэс эдеэтэй,
ан арьяатан һүүдэртэнь амардаг, жэгүүртэ шубууд намаа соонь уурхайлдаг,
амитай бүхы юумэн тэрээнһээл эдеэ хоолоо олодог һэн.
10Унтаридаа нойрсожо байхадаа үшөө иимэ юумэ харабаб: огторгойһоо Нангин Харуулшан буужа, 11шангаар айладхаба:
Энэ модо отолон унагаагты,
мүшэр һалаануудынь сабшан һалгаагты,
набша намааень гүбеэд, алим жэмэсыень һэжэрэн унагаагты.
Ан арьяатан дороһоонь тэрьедэн ошог лэ,
шубуу шонхор набша сооһоонь ниидэн дэгдэг лэ.
12Гансал үндэһэниинь түмэр, гуулин гэнжэтэй, газар соо үлэг,
хээрын ногоон соо байг.
Шүүдэр тэрээн дээрэ унажа,
ан гүрөөлтэй хамта газарай ногоон соо байг лэ.
13Ухааниинь балартажа,
хүнэй бэшэ, амитанай ухаатай тэрэ болохо.
Иигэжэ долоон жэл үнгэрхэ.
14Энэ захиралта гэбэл, Харуулшадай шиидхэбэри,
Нангин гэгээнүүдэй айладхал!
Амиды бүхы зон мэдэн байг лэ:
хүн түрэлтэнэй хан түрэнүүдые Дээдэ Бурхан зонхилдог,
Өөрын дураар хэндэшье хан түрэ үгэдэг,
эгээл дорой хүнииешье хан шэрээдэ заларуулжа магад.
15Иимэ зүүдэ би, Навуходоносор хаан, харабалби. Хан түрымни сэсэн мэргэн нэгэшье хүн тэрэниием тайлбарилжа шаданагүй. Харин шамда арюун Бурханай һүлдэ халин оронхой, тиимэһээ, Бэлтэшаццаар, ши зүүдыем тайлбарилжа шадахаш, хэлыш удхыень.
Даниил Навуходоносорто зүүдыень тайлбарилжа үгэнэ
16Даниил, тэрэ мүн лэ Бэлтэшаццаар гэжэ нэрэтэй, нэгэ хэды саг соо зог татан зогсобо, юуб гэхэдэ, айдаһаниинь хүрөө бшуу. Хаан:
– Бэлтэшаццаар! Энэ зүүдэнһээ, тайлбариһаань бү айгыш даа, – гэбэ.
Бэлтэшаццаар:
– Эзэн хаамни! Таниие үзэн ядагшад иимэ зүүдэ үзэһэй, дайсадтатнай иимэ тайлбари тудаһай!
17Танай хараһан модон мантан, гаһар, огторгой тулама үндэр, дэлхэйдэ хаагууршье харагдамаар бэлэй. 18Тэрэ үдхэн набша намаатай, бултанай хоолломоор алим жэмэстэй, доронь ан гүрөөл амидаржа, набша соонь жэгүүртэн уурхайлжа байгаа. 19Тэрэ болбол, үндэр түрэлтэ хаан, та болонот. Та агууехэт, хүсэ шадалтайт. Һүр жабхалантнай огтормой тулама, засаг зонхилолтотнай газар дэлхэйн хаяа хүрэтэр үргэлжэлнэ.
20Нангин Харуулшанай огторгойһоо буужа, «модо отолжо, үгы хэгты, гансал түгсүүл үндэһэтэйнь хамта түмэр, гуулин гэнжэтэй, газарта, хээрэ ногоон соо үлөөгты. Тэрээн дээрэ шүүдэр унажа, ан арьяатантай хамта долоон жэлэй туршада байг» гэжэ айладхаһые та, үндэр түрэлтэ хаан, дуулаһан байнат. 21Энэ хадаа танда ямар үйлэ хуби Дээдэ Бурхан тодорхойлооб гэжэ харуулна гээшэл, минии эзэн хаан. 22Зоной дунда бэшэ, хээрын ан гүрөөлэй дунда амидархат. Малдал адли үбһэ ногоогоор хооллохот, шүүдэр дээрэтнай унан байха. Иигэжэ долоон жэл үнгэржэ, Дээдэ Бурхан лэ хүн түрэлтэнэй хан түрэнүүдые зонхилдог, һанаһан хүндөө тэдэниие үгэдэг гэжэ ойлгохот. 23Түгсүүл үндэһэтэйнь хамта үлөөхэ гэжэ захирһаниинь хадаа Огторгойн засаг зонхилолто ойлгоһонойтнай удаа хан түрэтнай танда бусаагдаха гэһэн удхатай.
24Тиимэһээ, үндэр түрэлтэ хаан, минии зүбшэл заабари шагнажа хайрлыт: нүгэлөө һайн хэрэгүүдээр, гэмтэ ябадалнуудаа үгытэй ядуу зондо энэрэл хайра үзүүлһэнээрээ арюудхыт. Тиибэл, амгалан байдалтнай үргэлжэлжэ магад.
Навуходоносор Бурханда магтаал дуудана
25Навуходоносор хаантай эдэ бүгэдэ үнэхөөрөө тохёолдоо бэлэй.
26Арбан хоёр һарын үнгэрһэнэй удаа тэрэ Вавилоондохи ордон соогуураа алхалжа ябаба.
27– Энэл даа, агууехэ Вавилоон, – гээд хаан үгүүлбэ. – Өөрын хүсэ шадалаар, алдар солын болон нэрэ хүндын тула би энэ хаанта хото байгуулааб.
28Дууһан хэлэжэ үрдеэдүй байтарнь тэнгэриһээ иимэ абяан дуулдаба:
– Навуходоносор хаан, шагныш! Хан түрэшни шинии бэшэ болобо. 29Зоной дунда бэшэ, ан гүрөөлтэй хамта байхаш. Малдал үбһэ ногоогоор хооллохош. Иигэжэ долоон жэлэй үнгэрхэдэ, хүн түрэлтэнэй хан түрые Дээдэ Бурхан зонхилдог, һанаһаараа хэн нэгэндэ үгэдэг гэжэ ойлгохош.
30Эдэ бүгэдэ тэрэ дары Навуходоносор хаантай тохёолдожо, тэрэ зоной дунда байхаяа болибо, малдал адли үбһэ ногоогоор хооллодог, бэень шүүдэртэ угаагдадаг болобо. Бүргэдэй үдэ һодондол адляар үһэниинь ургажа, шубуунай һабартал хюмһаниинь болобо.
31Саг үнгэрбэ. Би, Навуходоносор хаан, огторгой өөдэ харабаб – иигээд ухаамни һөөргөө намда бусаа бэлэй. Дээдэ Бурханиие үреэбэб, Хэтэ мүнхэдөө Оршогшые магтан алдаршуулбаб:
Тэрэнэй засаг зонхилолтонь – хэтэ мүнхэдөө,
хан түрэнь үеһөө үедэ үргэлжэлхэ.
32Газар дэлхэй дээрэ амидарагшад юуншье бэшэ.
Өөрын һанаһаар лэ Тэрэ огторгойн сэрэгтэй,
газарай зонтой юумэ хэхэ.
Хэншье гартань һөөргэдэжэ шадахагүй,
«Яанабта?!» гэжэ хэлэхэгүй.
33Тэрэ дары ухаамни һөөргөө намда бусажа, хаан соломни, нэрэ хүндэмни, һүр жабхалан һэргээ бэлэй. Түшэмэл ноёд, зүбшэгшэдни намайгаа мэдэржэ, дахин би хаан болобоб, хүсэ шадални бүри ехэ болоо. 34Мүнөө хадаа би, Навуходоносор хаан, Хаан Тэнгэридэ алдар соло түүрээнэб, нэрэ хүндынь дээрэ үргэнэб, магтан дууланаб:
Хэһэн хэрэгынь үнэн,
ябадалынь үнэн шударгы.
Бардам зониие Тэрэл номгоруулха шадалтай.
Currently Selected:
Даниил 4: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
