Амоос 1
1
1Тэкооһада хони үүсхэбэрилэгшэ Амоосой үгэнүүд гэбэл, энэ. Газарай хүдэлхын хоёр жэлэй урда тээ, Уззияагай Иудын хаан, Ехоһаашай хүбүүн Еробоһаамай Израилиин хаан байха үе сагта Эзэн тэрээндэ Израиль тушаа үзэгдэл харуулһан юм. 2Амоос иигэжэ хэлээ:
Сион хадаһаа Эзэн
арсаландал архирха,
Иерусалимһаа хоолойнь
ханхинан нижаганаха.
Хонидой бэлшээринүүд
хуурай болон гашуудаха,
Кармээл хадын орой
шарлан-харлан хатаха.
Эзэн Дамааскые шүүбэрилэн хэһээнэ
3Эзэн иигэжэ айладхаа:
Дамааскын улад зон гэмээ нэмээһээр.
Шиидхэһэнээ Би болюулхагүйб.
Хурса түмэрөөр Галаадые
хуха жэжэлэн татаһандань,
4Хазаһээлэй ордон руу гал эльгэхэб,
Бэн-Һадаадай хэрэмүүд галда дүрэхэ!
5Дамааск хотын хаалга эбдэхэб,
Аавэн нюруугай уладые хюдахаб,
Бэт-Ээдэнэй удамаршые һалгаахаб!
Араамай арад зон баряанда
сүлэгдэн Киир руу туугдаха.
Эзэн пилиштүүдые шүүбэрилэн хэһээнэ
6Эзэн иигэжэ айладхаа:
Гаазай улад зон гэмээ нэмээһээр.
Шиидхэһэнээ Би болюулхагүйб.
Бүгэдэ улад зониием
баряанда туужа абаашаад,
Эдоомдо богоолшолгодо дамжуулһандань
7Гаазай хана руу гал эльгэхэб,
хэрэмүүдынь галда дүрэхэ!
8Ашдоод, Ашхэлооной удамаршадые
усадхан үгы хэхэб,
Экроон руу гараа далайжа,
даран-сохин һалгаахаб,
Пилиштын үлөөшэ зон хосорхо! –
гэжэ Эзэн Бурхан соносхоо.
Эзэн Тиирые шүүбэрилэн хэһээнэ
9Эзэн иигэжэ айладхаа:
Тиирэй улад зон гэмээ нэмээһээр.
Шиидхэһэнээ Би болюулхагүйб.
Аха дүүнэрэй хэлсээ мартаад,
баряанда байгша бүгэдэ зониие
Эдоомдо богоолшолгодо дамжуулһандань
10Тиирэй хана руу гал эльгэхэб,
хэрэмүүдынь галда дүрэхэ!
Эзэн Эдоомые шүүбэрилэн хэһээнэ
11Эзэн иигэжэ айладхаа:
Эдоомой улад зон гэмээ нэмээһээр.
Шиидхэһэнээ Би болюулхагүйб.
Һэлмэ гартаа далайнхай,
аха дүүгээ намнаһанайнь,
түрэл гэжэ хайрлаагүйнь,
хододоо уур сухалтай
хэрзэгы ааша гаргажа,
хилэнсэглэн байһанайнь түлөө
12Тэмаан руу гал эльгэхэб,
Боцраагай хэрэмүүд галда дүрэхэ!
Эзэн Аммооной уладые шүүбэрилэн хэһээнэ
13Эзэн иигэжэ айладхаа:
Аммоон улад зон гэмээ нэмээһээр.
Шиидхэһэнээ Би болюулхагүйб.
Хилэеэ үргэдхэхын тула
хээлитэй эхэнэрнүүдэй гэдэһые
Галаадта сүйжэ байһандань
14Раббаагай ханада гал табихаб!
Байлдаата үдэр хашхараан дундуур,
шуургата үдэр һалхин дундуур
хэрэмүүдынь галда дүрэхэ!
15Хааниинь сүлэлгэдэ туугдаха.
Түшэмэл ноёдыньшье тэрээнтэй хамта
туугдан баряанда ошохо!
Currently Selected:
Амоос 1: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
