Амоос 2
2
Эзэн Моһаабые шүүбэрилэн хэһээнэ
1Эзэн иигэжэ айладхаа:
Моһаабай улад зон гэмээ нэмээһээр.
Шиидхэһэнээ Би болюулхагүйб.
Эдоомой хаанай яһа шатаажа,
избёосхо болгоһондонь,
2Моһааб руу гал эльгэхэб,
Кэриһоодой хэрэмүүд галда дүрэхэ!
Байлдаанай шаг шууяан дунда,
бүреэгэй дуутай хамта Моһааб хосорхо!
3Энэ орон нютагай удамаршые хюдахаб,
тэрээнтэй хамта бүхы түшэмэлынь усадхахаб!
Эзэн Иудын уладые шүүбэрилэн хэһээнэ
4Эзэн иигэжэ айладхаа:
Иудын улад зон гэмээ нэмээһээр.
Шиидхэһэнээ Би болюулхагүйб.
Һургаалыем буруушаажа,
хуули ёһонуудыем сахяагүйнь түлөө,
эсэгэнэрэйнь дагадаг онгонуудай
замһаань тэдэниие хадууруулһанай түлөө
5Иуда руу гал эльгэхэб,
Иерусалимай хэрэмүүд галда дүрэхэ!
Эзэн Израилиие шүүбэрилэн хэһээнэ
6Эзэн иигэжэ айладхаа:
Израилиин улад зон гэмээ нэмээһээр.
Шиидхэһэнээ Би болюулхагүйб!
Гэмгүй хүниие мүнгөөр, үгырһэн нэгэниие нэгэ паар шаахайгаар
худалдажа байгаал!
7Үгытэй хооһон зониие газарай хумхаа тооһон руу шэдэнэ,
туһагүй ядуу зониие харгы замһаань хадууруулна.
Нангин нэрыем бузарлан,
эсэгэ хүбүүн хоёр нэгэ залуу эхэнэртэй унтана.
8Үри шэриинь түлөө бариса боложо абтаһан
хубсаһан дээрэ үргэлэй шэрээгэй дэргэдэ хэбтэжэ,
бурхадайнгаа гэртэ тэдэ торгуулагдаһан нэгэнэй үзэмэй дараһан архи уужа байнал!
9Харин Би тэдэнэй түлөө эмоор угсаатаниие усадхаа бэлэйб.
Хуша модон мэтэ тэдэнэр үндэршье һаань,
сарса модон мэтэ хүсэтэй байгаашье һаань,
Би тэдэниие оройһоонь эхилээд, үндэһэн хүрэтэрынь усадхааб.
10Египедэй орон нютагһаа таанадые Би гаргаа бэлэйб,
дүшэн жэлэй туршада сүл губяар хүтэлэн ябааб.
Эмоор зоной газар уһые таанадай эзэмшэлгэдэ дамжуулхын тула.
11Таанарай зарим хүбүүдые лүндэншэд,
зарим залуушуулыетнай өөрыгөө Эзэндэ зорюуланхай болгооб.
Тиимэ бэшэ аал, израильшууд?!
Энэ болбол Би, Эзэн, айладхана мүн!
12Харин таанар өөрыгөө Эзэндэ зорюуланхай зондо үзэмэй дараһан архи уулгажа,
«Лүндэн бү табигты» гэжэ
лүндэншэдтэ захиран, амыень таглан байгаат.
13Хараарайт, таряанай боолтоор дүүрэн
ашаатай тэргэ мэтэ болгон,
таанарые дарахаб, хүдэлжэ шадахаяа болихот.
14Эгээл хурдан хүнэй хурдань мөхөжэ,
эгээл хүсэтэй хүнэй хүсэнь буураха,
эрэлхэг зоригтойшье амияа абаржа шадахагүй.
15Һурша ном татаха хүншье
байрадаа тогтожо шадахагүй,
хүл хурданшье тэрьедэжэ үрдихэгүй,
моритой хүншье амияа абаржа шадахагүйл.
16Сэрэгшэдэй дундаһаа эгээл зоригтойньшье
тэрэ үдэр нюсэгэн тэрьедэхэ юм.
Энэ болбол Би, Эзэн, айладхана мүн!
Currently Selected:
Амоос 2: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
