ማቶሳ 13

ዘረ ዘርያ ኡራ ሌምሶ

(ማር 4:1-9፤ ሉቃ 8:4-8)

1ሄ ጋላስ የሱሲ ሶፐ ከይድ አባ ጋፃን ኡትስ። 2ዳሮ ደረይ እያ ዩሹዋን ሺቅን አሳ አባ ጋፃን አጋግድ ዎጎሎን ገልድ ኡትስ።#ሉቃ 5:1. 3አሳስ ዳሮባ ሌምሶን ያግድ ኦድስ፦

“እስ ጎሻንቾይ ዘረ ዘራናዉ ከይስ። 4እ ዘርያ ዎደ እስ እስ ዘረት ኦገ ጋፃን ዎዶሶና፤ ኤንታካ ካፎት ይድ ማፅ ምዶሶና። 5እስ እስ ዘረት ጋርሳን ሻሎይ ደእያ ቢታ ቦላ ዎዶሶና። ዳሮ ቢት ባይና ግሾ ኤለስድ ዶልስ። 6ሽን አዋይ ከይን ሹልስ፤ ፃጶይ ባይና ግሾ መልስ። 7እስ እስ ዘረይ አጉን ግዶን ዎስ፤ አጉንይ ድጭድ ሄ ዶላ ጩልስ። 8ሀራት ቃስ አራዳ ቢታ ቦላ ዎስ፤ ዶልድ አይፈ አይፍስ። እሶይ ፄታ፥ እሶይ ኡሱፑን ታማ፥ እሶይ ቃስ ሀስታማ አይፍስ። 9ስእያ ሀይ ደእያ ኡራይ ስኦ” ያግስ።

10የሱሳ ታማረት እያኮ ሺቅድ፥ “አይስ ኔኒ ደርያስ ሌምሶን ኦዳይ?” ያግድ ኦይችዶሶና።

11እ ዛሪድ፥ “ህንተዉ ሳሎ ካዎተ ፁራ ኤራይ እመትስ፥ ሽን ኤንታዉ እመትቤና። 12ደእያ ኡባስ ጉዠታና፥ እያዉ ዳራና፥ ሽን ባይናይሳፈ ሀር አቶሽን እያዉ ደእያራካ ኤከታና።#ማቶ 25:29፤ ማር 4:25፤ ሉቃ 8:18፤ 19:26. 13ሄሳ ግሾ፥ ታኒ ኤንቲ፥ ፄልሸ ደሞና መላ፥ ስእሸ ስኦና መላ ዎይኮ አኬኮና መላ ኤንታዉ ሌምሶን ኦዳይስ።

14“እሳያስ ባ ማፃፋን ኦድዳይስ ኤንታ ቦላ ፖለትስ። እ ኦድሸ፥

“ ‘ህንተ ስስ ስኤታ፥ ሽን አኬከከታ፤

ህንተ ፄለታ፥ ሽን በኤከታ።

15አይስ ጊኮ፥ ሀ አሳ ዎዛናይ ዘልኡምስ፤

ባንታ ሀይ ኤርሸ ቱልስዶሶና፥

ባንታ አይፍያ ጎዝዶሶና።

ሄስ ባይነኮ ኤንቲ ባንታ አይፍያን በእድ፥

ባንታ ሀይን ስእድ፥

ባንታ ዎዛናን አኬክድ፥

ታኮ ስማና፥

ታካ ኤንታ ፓናሽን’ ያግስ።

16“ሽን ህንተ አይፈት በእያ ግሾነ ህንተ ሀይት ስእያ ግሾ ህንተ አንጀትዳይሳታ።#ሉቃ 10:23-24. 17ታ ህንተዉ ቱማ ኦዳይስ፤ ዳሮ ናበትነ ፅሎት ህንተ በኤይሳ በአናዉነ ህንተ ስኤይሳ ስአናዉ አሞትዶሶና፥ ሽን ኤንታዉ ሀንቤና።

18“ህዛ፥ ሀ ዘረ ዘርያ ኡራ ሌምሱዋ ስእተ። 19ኦገ ጋፃን ዎዳ ዘረ ሌምሶይ ሀይሳ፦ ሳሎ ካዎተ ቃላ ስእድ አኬኮና ኡራ ዎዛናፐ ፃላሄይ ይድ እያ ዎዛናን ደእያ ዘረ ማፅ ድጌስ። 20ሻሎይ ጋርሳን ደእያ ቢታ ቦላ ዘረትዳይስ ቃላ ስእድ ኤለስድ ኡፋይሳን ኤከይሳታ። 21ሽን ፃጶ የዳናዉ ዳንዳኦና ግሾ ዳሮ ጋምኦኮና። ቃላ ጋሶን መቶይ ዎይኮ ጎደተ ያ ዎደ ኤለስ በቶሶና። 22አጉን ጋን ዘረትዳይስ ቃላ ስእስ፥ ሽን ሀ አላምያ ዱሳ ህርጋይነ ዱረተ ቆፋይ ቃላ ጩልያ ግሾ አይፈ አይፎና አቴስ። 23ሽን አራዳ ቢታን ዘረትዳ ዘረይ አኬካን ቃላ ስእያ ኡራ። እ አይፈ አይፌስ፤ እሶይ ፄታ፥ እሶይ ኡሱፑን ታማ እሶይ ቃስ ሀስታማ አይፌስ” ያግስ።

ሌሾ ሌምሶ

24የሱሲ ኤንታዉ ሀራ ሌምሶ ኦድስ፥ “ፆሳ ካዎተይ ባ ጎሻን ሎኦ ዘረ ዘርዳ ኡራ ዳኔስ። 25ሽን አስ ኡባይ ስክን እያ ሞርከይ ይድ ግስትያ ግዶን ሌሾ ዘርድ ብስ። 26ግስተይ ድጭድ አይፍያ ዎደ ሌሾይ እያ ግዶን በንትስ።

27“ጋድያ ጎዳ አይለት ጎዳኮ ብድ፥ ‘ጎዳዉ፥ ነ ጎሻን ነ ሎኦ ዘረ ዘራብክሾ? ያትን፥ ሌሾይ አዉፐ ይዴ?’ ያግዶሶና።

28“እ ኤንታኮ፥ ‘ሄሳ ሞርከይ ኦስ’ ያግስ።

“አይለት ጎዳኮ፥ ‘ኑ ብድ ሌሹዋ ሾዳና መላ ኮያይ?’ ያግዶሶና።

29“ሽን እ፥ ‘አቶ ቦቾፍተ፤ ህንተ ሌሹዋ ሾዳይስ ግሽን ግስተይ ሾደታና። 30ቦቾፍተ፤ ጫካ ዎደይ ጋካናዉ እስፈ ድጮ። ሄ ዎደ ጫክያ አሳታ ሌሹዋ ስንትድ ማፅድ ታማን ፁጋናዉ ምርቀን ምርቀን ቃችተ። ሽን ግስትያ ሺሽድ ታ ሻልያን ቆልተ’ ያጋና” ያግስ።

አይፈ ጉ ም ሌምሶ

(ማር 4:30-32፤ ሉቃ 13:18-19)

31ቃስ ሀራ ሌምሶ ያግድ ኦድስ፤ “ሳሎ ካዎተይ እስ አስ ባ ጎሻን ባክዳ ጉ ም አይፈ ዳኔስ። 32ሄ ም አይፈይ ሀራ ም አይፈታፐ ጉ፥ ሽን እያ ዶላ ድጭዳ ሀራ ምታ ኡባፈ አዳ ግታታዉሱ። እ ታሽያን ካፎት ኬፅድ ኡታና ጋካናዉ ዎልቃማ ም ግዳዉሱ” ያግስ።

እርሾ ሌምሶ

(ሉቃ 13:20-21)

33ካልድካ፥ የሱሲ ሀራ ሌምሶ ኦድስ፤ “ሳሎ ካዎተይ እስ ማጫስ ሄ ጋባተ ለ ኤካ ሙኑቃዳ፥ ሙኑቃይ ደንዳና መላ እያን ጉጅዳ እርሾ ዳኔስ” ያግስ።

34የሱሲ ደርያስ ሄ ሌምሱዋ ኡባ ኦድስ። ሌምሶይ ባይና እስባካ ኦድቤና። 35ናበይ ባ ማፃፋን፥

“ታኒ ታ ዶና፥ ሌምሶን ዶያና፤

ሳሎይነ ሳእ መቶሳፐ፥

ጌምዳይሳ ኦዳይስ”

ያግድ ኦድዳይስ ሄሳን ፖለትስ።#ማዝ 78:2.

ሌሾ ሌምሶ ብርሸ

36የሱሲ ደርያ ሞይዝድ ሶ ገልስ። እያ ታማረት እያኮ ሺቅድ፥ “ጎሻን ደእያ ሌሹዋ ብርሸ ኑስ ኦዳ” ያግዶሶና።

37እ ዛሪድ፥ “ሎኦ ዘረ ዘርዳይ አሳ ናአ። 38ጎሻይ ሀ አላምያ። ሎኦ ዘረይ ሳሎ ካዎተ ናይታ። ሌሾይ ፃላሄ ናይታ። 39ሌሹዋ ዘርዳይ ሞርክያ ፃላሄ። ጫካ ዎደይ፥ ዎደ ዉርሰ፤ ጫከይሳት ኪታንቾታ።

40“ሌሾይ ማፀትድ ታማን ፁገተይሳ መላ ዎድያ ዉርሰን ሄሳዳ ሀናና። 41አሳ ናአይ ባ ኪታንቾታ ኪታና። ኤንቲ ናጋራስ ጋሶ ግደይሳታነ ኢታ ኦያ ኡባ ማፅድ እያ ካዎተፈ ከሳና። 42ማፅ ሺሽድ ዬሆይነ አቻ ጋርጨ ደእያ ቶኦና ታማን የጋና። 43ሄ ዎደ ፅሎት ባንታ አዋ ካዎተን አዋዳ ፖአና። ስእያ ሀይ ደኤይ ስኦ!

44“ፆሳ ካዎተይ ጎሻን ሞገትዳ ሚሸ ዳኔስ። እስ አስ ሄ ሚሽያ ደምድ ዛር ሞግስ። ዳሮ ኡፋይትድ ብድ ባዉ ደእያባ ኡባ ባይዝድ ሄ ጎሻ ጋድያ ሻምስ።

45“ሄሳዳካ፥ ቃስ ሳሎ ካዎተይ እንቁ ጌተትያ አልኦ ሹቻታ ኮይያ ዛልአንቾ ዳኔስ። 46ዳሮ አልኦ እንቁዋ ደምድ ብድ ባዉ ደእያባ ኡባ ባይዝድ እያ ሻምስ።

ሞሎ ኦይክያ ግተ ሌምሶ

47“ቃስ ፆሳ ካዎተይ አባን የገትዳ ዱማ ዱማ ቆሞ ሞሎ ኦይክያ ግትያ ዳኔስ። 48ሞሎ ኦይክያ አሳት ሞሎይ ግትያን ኩምን አባፈ ጋፃ ከስዶሶና። ያን ኡትድ ሎኡዋ ቆር ቆር ዳቾን የግዶሶና፥ ሽን ኢታ ሞሎታ ዎራ ሆልዶሶና። 49ዎድያ ዉርሰን ሄሳ ሀናና። ኪታንቾት ይድ ናጋራንቾታ ፅሎታፐ ሻክድ፥ 50ዬሆይነ አቻ ጋርጨ ደእያ ቶኦና ታማን የጋና።

51“ሀ ኡባይ ህንተዉ ገልዴ?” ያግድ ኤንታ ኦይችስ።

ኤንቲ ዛሪድ፥ “ኤ” ያግዶሶና።

52የሱሲ፥ “ህዛ፥ ሳሎ ካዎተ ኤራ ኤክድ ህግያ ታማርስያ ኡባይ፥ ባ ምንጅዳ ሻሉዋፐ ኦራነ ጋልአ ከስያ አሰ ዳኔስ” ያግስ።

የሱሲ ናዝረተን እፀትስ

(ማር 6:1-6፤ ሉቃ 4:16-30)

53የሱሲ ሀ ሌምሱዋ ኦድ ዉርስዳፐ ጉየ ያፐ ደንድድ ብስ። 54ባ የለትዳ ቢታ ብድ አይሁደ ዎሳ ኬን ደርያ ታማርስስ። ኤንቲ ማላለትድ፥ “ሀ ኡራይ ሀ ጭንጫተነ ሀ ማላታታ ኦያ ዎልቃ አዉፐ ኤክዴ? 55ሀይስ አናፅያ ናኣ ግደነዬ? እያ አየ ሱንይ ማይራሞ ግደኔ? እያ እሻት ያይቆባ፥ ዮሰፋ፥ ስሞናነ ይሁዳ ግዶኮናዬ? 56እያ ምቸት ኑራ ደኦሶና ግዶኮና? ያትን፥ ሀ ኡራይ ሀ ኡባ አዉፐ ኤክዴ?” ያግዶሶና። 57ሄሳ ግሾ፥ እ ግያባ ኤኮና እፅዶሶና።#ዮሀ 4:43.

ሽን የሱሲ፥ “ናበይ ባ የለትዳ ቢታንነ ባ ሶ አሳ ማታን ቦንቸተና” ያግስ። 58ኤንቲ አማኖና እፅዳ ግሾ ዳሮ ማላታታ ሄ በሳን ኦቤና።

Currently Selected:

ማቶሳ 13: GFBEVF

Highlight

Copy

Compare