ማቶሳ 12
12
ሳምባታ ቦንቻናዉ በሲ?
(ማር 2:23-28፤ ሉቃ 6:1-5)
1ሄሳፈ ጉየ፥ ሳምባታ ጋላስ፥ የሱሲ ጋደ ግዶራ አስ። የሱሳ ታማረት ኮሻትዳ ግሾ ትያ ባንጋ ሽርክድ ሞሶና።#ዛረ 23:25. 2ሽን ፋርሳወት ሄሳ በእድ የሱሳኮ፥ “ሄኮ፥ ነ ታማረት ሳምባታ ጋላስ ኦናዉ በሶናባ ኦሶና” ያግዶሶና።
3የሱሲ ዛሪድ፥ “ዳዊቲ ኮሻትዳ ዎደ እያራ ደኤይሳታራ አይ ኦዳኮ ናባብበከቲ?#1 ሳሜ 21:1-6. 4ዳዊቲ ፆሳ ኬ ገልድ ካህነታ ፃላላፐ አትሽን፥ እነ እያራ ደኤይሳታስ በሶና ጌሻ ዳቡዋ ምስ።#ሌወ 24:9. 5ዎይኮ ካህነት ሳምባታ ዎጋ ሻርድ ፆሳ ኬን ሳምባታ ጋላስ ኦሶ ኦኮ ኤንታዉ ባላ ግዶናይሳ ሙሰ ህግያን ናባብበከቲ?#ታይቦ 28:9-10. 6ሽን ስእተ! ፆሳ ኬፈ አይ ሀይሳን ደኤስ። 7‘ታኒ ህንተ ያርሹዋ ግዶናሽን ሀራታ ማራና መላ ኮያይስ’ ግያ ቃላይ ወይ ጉሰኮ ህንተ ኤርዳኮ፥ ፅሎ አሳ ቦላ ፕርደከታ።#ማቶ 9:13፤ ሆሰ 6:6. 8አሳ ናአይ ሳምባታ ጎዳ” ያግስ።
9የሱሲ ያፐ ብድ አይሁደ ዎሳ ኬ ገልስ። 10ያን ኩሸይ ጉንድዳ እስ ኡራይ ደኤስ። የሱሳ ሞታናዉ ጋሶ ኮይያ አሳት፥ “ሳምባታ ጋላስ ፓናዉ በሲ በሰኔ?” ያግድ ኦይችዶሶና።
11እ ኤንታኮ፥ “ህንተ ግዶፈ እሱዋስ ዶርስ ሳምባታ ጋላስ አፎን ዉልኮ፥ ጎችድ ከሶናይ ኦኔ?#ሉቃ 14:5. 12ያትን አስ ዶርሳፈ ዋንድ ዳሮ አኔ? ሄሳ ግሾ፥ ሳምባታ ጋላስ ሎኦባ ኦሶይ በሴስ” ያግስ።
13ሄሳፈ ጉየ፥ የሱሲ አድያኮ፥ “ነ ኩሽያ ፕድ ኦ” ያግን፥ ኡራይ ፕድ ኦስ። እያ ኩሸይ ፓፅድ ሀንኮ ኩሽያዳ ሀንስ። 14ሽን ፋርሳወት ያፐ ካረ ከይድ፥ የሱሳ ዋት ዎነኮ ማቀትዶሶና።
ዶረትዳ ፆሳ አይልያ
15የሱሲ ኤንታ ቆፋ ኤርድ ሄ በሳ አግድ ሀራ ሶ ብስ። ዳሮ አሳይ እያ ካልድ ብዶሶና፥ ሀርጋንቾታ ኡባ ፓስ። 16የሱሲ፥ “ታባ ሀራ ኦደስካ ኦዶፕተ” ያግድ ምን ኦድስ። 17ሄስካ ናብያ እሳያስ፥
18“ሄኮ ታ ዶርዳ አይለይ፥
ታ ዶሰይስ፥ ታና ኡፋይሰይስ፥
ታኒ ታ አያና፥ እያ ቦላ ሸምፕሳና፤#እሳ 42:1-4.
እ፥ አይሁደ ግዶና ደርያስ ሱረ ፕርዳባ አዋጃና።
19እ ፓላመና ዎይኮ ካጨና፤
ባ ቃላካ ደንባን ጮ ስሰና።
20ሱረ ፕርዳን ፆኖ ደማና ጋካናዉ፥
ድንጨትዳ ማይረ መንና፥
ጩይያ ሙቃዳ ቶይሰና።
21አይሁደ ግዶና ደረይ ኡባይ እያን ኡፋይስ ዎና”
ያግድ ፃፍዳይስ ፖለታና መላሳ።
የሱሳነ ብኤል-ዘቡላ
(ማር 3:20-30፤ ሉቃ 11:14-23)
22ሄሳፈ ጉየ፥ ቱና አያናን ኦይከትዳ ቆቀነ ሙመ አሰ ደኤይሳ እያኮ ኤህዶሶና። የሱሲ ኡራ ፓን፥ ኡራይ ፄልስ፤ ኦደትስ። 23አሳ ኡባይ ማላለትድ፥ “ሀይስ ዳዊታ ናኣ ግዳንደሻ?” ያግዶሶና።
24ሽን ፋርሳወት ሄሳ ስእድ፥ “ሀ ኡራይ ቱና አያናታ ከሰይ ቱና አያናታ ሀላቃ ብኤል-ዘቡላ ዎልቃና” ያግዶሶና።#ማቶ 9:34፤ 10:25.
25የሱሲ ኤንታ ቆፋ ኤርድ፥ “ዎል ግዶን ሻከትያ ካዎተ ኡባይ ኩንዳና፤ ቃስ ዎል ግዶን ሻከትያ ካታማይ ዎይኮ ኬይ ምንድ ኤቀና። 26ፃላሄይ ፃላሄ ከስያባ ግድኮ ባ ግዶን ሻከትስ ጉሱ። ሄሳ ሀንያባ ግድኮ እያ ካዎተይ ዋንድ ምንድ ኤቃናዉ ዳንዳኢ? 27ታኒ ቱና አያና ከሰይ ብኤል-ዘቡላ ዎልቃን ግድኮ ህንተና ካልያ አሳት ኦደ ዎልቃን ከሳኔ? ሄሳ ግሾ፥ ህንተና ካልያ አሳት ህንተና ፕርዳና። 28ሽን ታኒ ቱና አያናታ ከሰይ ፆሳ አያናን ግድኮ፥ ፆሳ ካዎተይ ህንተኮ ይስ።
29“ዎይኮ እስ አስ ዎልቃማ አሳ ሶ ገልድ እያ ሻሉዋ ቦንቃናዉ ኮይኮ ኮይሮትድ ሄ ኡራ ቃቾና እፅኮ ዋትድ ዳንዳኢ? ያትኮ እያ ሻሉዋ ቦንቃናዉ ዳንዳኤስ።
30“ታራ ግዶናይ ኦንካ ታራ ኤቀቴስ፤ ቃስ ታራ እስፈ ሺሾና ኡባይ ላሌስ።#ማር 9:40. 31ሄሳ ግሾ፥ ስእተ፤ አሳይ ኦያ አይ ናጋርነ ጫሻ ቃል ኡባይ አቶ ጌተታና፥ ሽን ጌሻ አያና ጫይያ ኦደስካ እያ ናጋራይ አቶ ጌተተና።#ሉቃ 12:10. 32ኦንካ አሳ ናአ ቦላ ኢታባ ኦደትኮ እያዉ አቶ ጌተታና፥ ሽን ጌሻ አያና ቦላ ኢታባ ኦደትያ ኦደስካ ሀ ሳአን ግድን ያና አላምያን እያ ናጋራይ አቶ ጌተተና።#ሉቃ 12:10.
33“ሎኦ ምይ ሎኦ አይፈ አይፌስ፤ ቃስ ኢታ ምይ ኢታ አይፌስ። ህዛ፥ ምይ ኤረተይ ባ አይፍያና። 34ህንተኖ፥ ሾሻ ናይቶ፥ ህንተ ኢታ ግድሸ ዋንድ ሎኦባ ኦደታናዉ ዳንዳኤቲ? አስ ባ ዎዛናን ኩምዳባፐ ዶናን ኦደቴስ።#ማቶ 3:7፤ 23:33፤ ሉቃ 3:7፤ ማቶ 15:18፤ ሉቃ 6:45. 35ሎኦ አስ ባ ዎዛናን ዎዳ ሎኦባፐ፥ ሎኦባ ከሴስ፤ ኢታ አስ ባ ዎዛናን ዎዳ ኢታባፐ፥ ኢታባ ከሴስ። 36ሽን ስእተ፥ አሳይ ኦደትያ ጮ ኦዳ ኡባስ ፕርዳ ጋላስ ዛሮ እማና። 37አይስ ጊኮ፥ ነ ኦደትያ ነ ቃላን ፅላና፤ ነ ኦደትያ ነ ቃላይ ነ ቦላ ፕርዳና” ያግስ።
ዮናሳ ማላታ
(ማር 8:11-12፤ ሉቃ 11:29-32)
38ሄሳፈ ጉየ፥ እስ እስ ፋርሳወትነ ህገ አስታማረት የሱሳኮ፥ “አስታማርያዉ፥ ኔኒ ማላታ ኦዳ ኑና በሳ” ያግዶሶና።#ማቶ 16:1፤ ማር 8:11፤ ሉቃ 11:16.
39ሽን የሱሲ ዛሪድ፥ “አማነቶናነ ኢታ የለተይ ማላታ ኮዬስ። ሽን ናብያ ዮናሳ ማላታፐ ሀራ ማላት እያዉ እመተና።#ማቶ 16:4፤ ማር 8:12. 40ዮናስ ግታ ሞሎ ኡሎን ሄ ጋላስነ ሄ ቃማ ጋምእዳይሳ መላ አሳ ናአይ ሄ ጋላስነ ሄ ቃማ ቢታ ጋርሳን ጋምአና።#ዮሀ 1:17. 41ናናወ አሳይ ፕርዳ ጋላስ ደንድድ ሀ የለተ ቦላ ፕርዳና፤ አይስ ጊኮ፥ ኤንቲ ዮናስ ሳባክን፥ ስእድ ባንታ ናጋራፐ ስምዶሶና። ሄኮ፥ ዮናሳፐ አይስ ሀይሳን ደኤስ።#ዮሀ 3:5. 42ፕርዳ ጋላስ ዱገሀ ካውያ ደንዳዳ ሀ የለተ ቦላ ፕርዳና፤ አይስ ጊኮ፥ እያ ሶሎሞነ ጭንጫተ ስአናዉ ቢታ ጋፃፐ ያሱ። ሄኮ፥ ሶሎሞነፐ አይ ሀይሳን ደኤስ።#1 ካዎ 10:1-10፤ 2 ታር 9:1-12.
43“ቱና አያናይ አሳፐ ከይዳፐ ጉየ ባዉ ሸምፕያ በሲ ኮይድ ሃ ባይና መላ በሳን ዳቡሬስ፥ ሽን ባ ኮይያ ሸምፑዋ ደመና። 44ያንን፥ ‘ታ አጋ ከይዳ ኬ ስማዳ ባና’ ያጌስ። እ ስምያ ዎደ ኬይ ካይስ ግደይሳነ ፕተትድ ጊግድ ኡትዳይሳ ደሜስ። 45ህዛ፥ ስም ብድ፥ ባፐ ኢትያ ሀራ ላፑን ኢታ አያናታ ኤክድ ዬስ፤ ኤንትካ ኡራ ግዶ ገልድ ደኦሶና። ሄ ኡራስ ካሰይሳፈ ጉየይስ ዳሮ ኢቴስ። ሀ ኢታ የለተ ቦላ ሄሳ መላ ሀናና” ያግስ።
የሱሳ አይዉነ እያ እሻታ
(ማር 3:31-35፤ ሉቃ 8:19-21)
46የሱሲ ደርያስ ኦዳ ቦላ ደእሽን እያ አያነ እያ እሻት እያ ኦድሳናዉ ኮይድ ካረን ኤቅዶሶና። 47እስ አስ እያኮ፥ “ነ አያነ ነ እሻት ነና ኦድሳናዉ ኮይድ ካረን ኤቅዶሶና” ያግስ።
48የሱሲ ዛሪድ፥ “ታ አይያ ኦኔ? ታ እሻትካ ኦናንቴ?” ያግስ። 49ባ ኩሽያራ ታማረታ ማልሸ፥ “በእተ፥ ታ አያነ ታ እሻት ሀይሳታ። 50ሳሎን ደእያ ታ አዋ ሸንያ ኦያ ኡባይ ታ እሻ፥ ታ ምቾነ ታ አዮ” ያግስ።
Currently Selected:
ማቶሳ 12: GFBEVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
