ከሳ 32

ዎርቃ ማራ ምስለ

1አሳይ፥ ሙሰይ ዙማ ቦላፈ ዎናዉ ጋምእዳይሳ በእዳ ዎደ አሮናኮ ይድ፥ “ኑና ካለሸ ናጋና ፆሳታ ኑስ ኦ። ግብፀ ቢታፈ ኑና ከስዳ ሙሰይ ዋንዳኮ ኤሮኮ” ያግዶሶና። 2አሮን ኤንታኮ፥ “ህንተ ማቸታ፥ ህንተ አደ ናይታነ ህንተ ማጫ ናይታ ሀይን ደእያ ዎርቃ ከስድ፥ ታዉ ሃ ኤክድ ዪተ” ያግስ። 3አሳ ኡባይ ባንታ ሀይ ዎርቃ ከስድ፥ አሮናስ ኤህዶሶና። 4እ ሄሳ ኤንታፈ ኤክድ፥ ታማን ሼሽዳፐ ጉየ፥ ቆፅድ፥ ዎርቃ ማራ ምስለ ኦድ መስ።

ኤንቲ፥ “እስራኤለቶ፥ ኑና ግብፀ ቢታፈ ካለድ ከስዳ ኑ ፆሳት ሀይሳታ” ያግዶሶና። 5አሮን ሄሳ በእዳ ዎደ፥ ሄ ማራ ስንን ያርሾ በሰ ጊግስድ፥ “ዎንቶ ጎዳ ቦንችያ ባኣለ ጋላስ ግዳና” ያግድ ኤርስስ። 6ዎንተ ጋላስ ጉራ አሳይ ደንድድ፥ ፁሳ ያርሾነ እስፈተ ያርሾ ያርሽዶሶና። ያትድ፥ አሳይ ማናዉነ ኡያናዉ ኡትዶሶና። ም ኡይ ስሚድ፥ ዱራናዉነ ፖኮባ ሀናናዉ ደንድዶሶና።

7ጎዳይ ሙሰኮ፥ “ኔኒ ግብፀፈ ከሳዳ፥ ኤህዳ ነ አሳይ ናጋራ ኦድ፥ ባንታና ቱንስዳ ግሾ ኤለሳዳ ዱገ ዎ። 8ታኒ ኤንታ ኪትዳ ኦግያፐ ኤንቲ ኤለስድ ሽረትዶሶና። ዎርቃ ሼሽድ ማራ ምስለ ኦድ፥ ባንታዉ ኤቃ መድ እያ ጎይንዶሶና። እያዉ ያርሽድ፥ ‘ኑና ግብፀ ቢታፈ ከስዳ ኑ ፆሳይ ሀይሳ’ ያግዶሶና። 9ጎዳይ ሙሰኮ፥ ሀ አሳይ አይ መላ ዎዛና ሙመኮ ታ በአስ። 10ሀእ ታ ሀንቆይ ኤንታ ቦላ ኤፅን፥ ታኒ ኤንታ ይሳናዉ ጊገትዳ ግሾ፥ ኔኒ ታና ድጎፋ። ያታዳ፥ ታኒ ነና ግታ ደረ ኦና” ያግስ።

11ሽን ሙሰይ ባ ጎዳ፥ ፆሳ ሀይሳዳ ያግድ ዎስስ፤ “አቤት ጎዳዉ፥ ኔኒ ነ ግታ ዎልቃንነ ነ ምኖ ኩሽያን ግብፀፈ ከሳዳ ኤህዳ ነ አሳ ቦላ ነ ሀንቆይ አይስ ኤፂ?#ታይቦ 14:13-19. 12ነ ሄሳ ኦያባ ግድኮ፥ ግብፀት፥ ‘ጎዳይ ኤንታና ደረታ ቦላ ዎናዉነ ቢታፈ ፕትድ ይሳናዉ ከስስ’ አይስ ጋኔ? ነ ያሽያ ሀንቁዋፈ ስማ። ነ አሳ ይሳናዉ ቆፕዳይሳ አጋ። 13ነ አይለታ አብራሃመ፥ ይሳቃነ ያይቆባ ሀሳያ። ኔኒ ኤንታዉ፥ ‘ታኒ ህንተ ሼሻ ሳሎ ፆልንቶዳ ዳርሳና፤ ታኒ ህንተዉ እማና ግዳ ሀ ቢታ ኡባ ህንተ ሼሻታስ እማና፤ ኤንቲ ሄ ቢታ መርናዉ ላታና’ ጋዳ ነ ሁጰን ነ ጫቅዳ ጫቁዋ ቆፓ” ያግስ። 14ሄሳ ግሾ፥ ጎዳይ ባ ደርያ ቦላ ኢታባ ኤሀናዉ ቆፕዳይሳ አግድ፥ ኤንታ ማርስ።

15ሙሰይ ናምኡ ባጋራ ፃፈትዳ፥ ታሙ ኪታት ደእያ ናምኡ ሎቸ ሹቻታ ባ ኩሸን ኦይክድ፥ ዙማፐ ዱገ ዎስ። 16ሄ ማሰትዳ ሹቻታ ጊግስዳይ ፆሳ፤ ሹቻታ ቦላ ዎጭድ ፃፍዳይካ ፆሳ።

17እያሱይ አሳ ኮሽንቻ ስእዳ ዎደ፥ ሙሰኮ፥ “አሳይ ሲራትዳ በሳን ኦላ ዋሶይ ስኤቴስ” ያግስ።

18ሙሰይ ዛሪድ፥ “ሀይስ ፆንዳ አሳ ጬቆ ዎይኮ ፆነትዳ አሳ ዬሆ ግዶናሽን፥ የ ዋሶ” ያግስ።

19ሙሰይ ጉታኮ ማትዳ ዎደ ማራነ ዱርሳ በእድ ዳሮ ሀንቀትስ። ሄ ዎደ ባ ኩሸን ኦይክድ ይዳ፥ ማሰትዳ ሹቻታ ዙማ ፃጶን ሆልድ መንረስ። 20ኤንቲ መዳ ማራ ኤክድ፥ ታማን ፁግስ። ሄሳፈ ጉየ፥ ሊቃና ጋካናዉ ጋጭድ ሃራ ማድ፥ እስራኤለ አሳይ ኡያናዳ ኦስ።

21ሙሰይ አሮናኮ፥ “ሀ አሳይ ነዉ አይ ኦን፥ ኤንታ ሀይሳ መላ ኢታ ናጋራ ባንታ ቦላ ኦና መላ ኦዲ?” ያግስ።

22አሮን ዛሪድ፥ “ታ ጎዳዉ፥ ታና ሀንቀቶፋ። ሀ አሳይ ኢታባ ኦናዉ አይ መላ ኮያኮ ነ ኤራሳ። 23ኤንቲ፥ ‘ኑና ግብፀፈ ከስድ ኤህዳ፥ ሙሰይ ዋንዳኮ ኑ ኤሮኮ። ሄሳ ግሾ፥ ካለያ ፆሳታ ኑስ ኦ’ ያግዶሶና። 24ታኒ ኤንታኮ፥ ‘ህንተ ሀይን ደእያ ዎርቃ ከስድ፥ ሀምተ’ ያጋስ። ኤንቲ ታዉ እምዳ ዎርቃ ታኒ ታማን የግን፥ ሀ ማራ ምስለይ ከይስ” ያግስ።

25አሮን አሳ ጮ የድ አግን፥ አሳይ ባ ሞርከታ ስንን ካዉይድ፥ ካትዳይሳ ሙሰይ በእስ። 26ሄሳ ግሾ፥ ሙሰይ ጉታ ገልያ ፐንግያን ኤቅድ፥ “ጎዳ ባጋ ግድያ አስ ኦንካ ታኮ ዮ” ያግስ። ሄ ዎደ ሌወት ኡባይ እያኮ ሺቅዶሶና።

27እ፥ ኤንታኮ፥ “ጎዳይ፥ እስራኤለ ፆሳይ፥ ህንተ እሶይ እሶይ ህንተ ማሻ ሾድድ፥ ጉታስ ሀ ፐንገፈ ህን ፐንገ ጋካናዉ ብድ፥ ህንተ እሻታ፥ ህንተ ላገታነ ህንተ ሾሮታ ዎተ” ያግስ። 28ሌወት ሙሰይ ኪትዳይሳዳ ኦድ፥ ሄ ጋላስ ሄ ሙኩሉ ግድያ አሳ ዎዶሶና። 29ሙሰይ ሌወታኮ፥ “ሀች ህንተ፥ ህንተ ናይታነ ህንተ እሻታ ዎናዉ ኪተትድ ህንተና ጎዳስ ዱማይደታ። ጎዳይ ህንተና አንጅስ” ያግስ።

30ዎንተ ጋላስ ሙሰይ አሳኮ፥ “ህንተ ኢታ ናጋራ ኦደታ፤ ሽን ሀእ ታኒ ጎዳኮ ዙማ ቦላ ከያዳ፥ ኦን ኤር ህንተ ናጋራስ አቶተ ደሞና አግከ” ያግስ። 31ያትን ሙሰይ ጎዳኮ ስሚድ ብድ፥ “ሀ አሳይ ኢታ ናጋራ ኦዶሶና፤ ኤንቲ ባንታዉ ዎርቃፈ ፆሰ መዶሶና። 32ሽን ሀያና፥ ሀእ ኤንታ ናጋራ አቶ ያጋ። ሄስ ሀኖናባ ጊኮ፥ ነ አሳ ነ ፃፍዳ ማዝጋብያፐ ታ ሱን ቁቻ” ያግስ።

33ጎዳይ ዛሪድ ሙሰኮ፥ “ታኒ ታ ማዝጋብያፐ ቁቻና አሳ ሱንይ፥ ታ ቦላ ናጋራ ኦዳይሳታ ሱን። 34ሀእ ባዳ፥ ሀ አሳ ታኒ ነዉ ኦድዳ በሳ ካለ። ታ ኪታንቾይካ ነና ካለናይሳ አኬካ፥ ሽን ታኒ ሀ አሳ ኤንታ ናጋራ ግሾ ሴራና ዎደይ ያናይስ አተና” ያግስ።

35አሮን ዎርቃፈ ማራ ምስልያ መናዳ ኦዳይ አሳ ግድያ ግሾ፥ ጎዳይ አሳ ቦላ ዎልቃማ ጋዶ የድስ።

Currently Selected:

ከሳ 32: GFBEVF

Highlight

Copy

Compare