ከሳ 31

ባስልኤላነ ኤልያባ

1ጎዳይ ሙሰኮ ሀይሳዳ ያግስ፤ 2“ታኒ ይሁዳ ሼሻፐ ግድዳ ሁራ ናኣ ናኣ፥ ኡረ ናኣ፥ ባስልኤላ ዶራስ። 3ታኒ እያ ታ አያናን ኩንስ፤ ታኒ ሂላ፥ አኬካነ ኦሶ ኡባ ኦያ ኤራ እያዉ እማስ። 4ሄስካ፥ ሂላን ኦና ኦሶታ ሀልችድ ዎርቃፈ፥ ብራፐነ ናሰ ብራታፐ ዱማ ዱማባ ከስድ ኦናሳ። 5ሄሳዳካ፥ አልኦ ሹቹ ማስድ ጊግሰይሳ፥ ም ማሰይሳነ ሀራ ኦሶ ኡባ ኦና መላ ጭንጫተ እማስ። 6ቃስ እያ ማዳና መላ ዳነ ሼሽ ግድዳ አህሳማካ ናኣ ኤልያባ ዶራስ። ታኒ ነና ኪትዳባ ኡባ ኤንቲ ኦና መላ ኩሸ ሂላ ኤርያ ሀራታ ኡባስ ግታ ኤራተ እማስ። 7ኤንቲ ኦናባት፥ ጌሻ ዱንካንያ፥ ጫቆ ታቦትያ፥ እያ ቦላ ዎያ ናጋራ አቶተ ካማ፥ ዱንካንያ ግዶን ጎኤትያ ሚሸ ኡባ፥ 8ፃርጴዛነ እያ ሚሸታ፥ ዋላህ ባይና ዎርቃፈ ኦሰትዳ ፆምፐ ዎያ ኮጫነ እያ ሚሸ ኡባ፥ እፃነ ጩይስያ ፃርጴዛ፥ 9ፁሳ ያርሾ በስነ እያ ሚሸ ኡባ፥ ሜቻ ከርያነ እያ ቶሁዋ፥ 10አሮንነ እያ ናይት ካህነተን ሀጋዝሸ ማእያ ካህነተ ማኡዋ፥ 11ሹማተ ዛይትያነ ጌሻ በሳስ ሀንያ ሳውያ እፃንያ፥ ታኒ ነና ኪትዳይሳዳ ኤንቲ ኦና” ያግስ።

ሳምባታ

12ጎዳይ ሙሰ ሀይሳዳ ያግድ ኪትስ፤ 13“እስራኤለ አሳ፥ ‘ታ ሳምባታ ናግተ። ሄስ ታኒ፥ ጎዳይ፥ ህንተና ታዉ ጌሻ ደረ ኦዳ ዶርዳይሳ በሲያ ማላ ግድድ፥ ያና የለተ ኡባስ ታፐነ ህንተፈ ግዶን ደኦ። 14ሄ ጋላሳይ ጌሽ ግድያ ግሾ፥ እያ ቦንችተ። ሳምባታ ቦንቾናይነ ሄ ጋላሳን ኦሶ ኦያ ኦንካ ታ አሳ ግዶፈ ዮ ዎይኮ ሀይቆ። 15ህንተ ኦሶ ኦናዉ በሲያ ኡሱፑን ጋላሳት ደኦሶና። ሽን ላፑን ጋላሳይ ጎዳስ ዱማትዳ፥ ሸምፖ ጋላስ። ሳምባታ ጋላሳን ኦሶ ኦያ ኦንካ ሀይቆ። 16እስራኤለ የለተ ኡባይ ሀ ሳምባታ ጋላሳ መርና ጫቆ ማላ ኦድ ቦንቾ። 17ታኒ ኡሱፑን ጋላሳን ሳሉዋነ ሳኣ መዳ ግሾነ ላፑን ጋላሳን ኦሶ አጋዳ ሸምፕዳ ግሾ፥ ታ ግዶንነ እስራኤለታ ግዶን ሄስ መርናዉ ኤቅድ ደእያ ማላ ግዳና’ ያጋ” ያግስ።

18ጎዳይ ሙሰ ሲና ዙማ ቦላ ኦድሰይሳ ኦንግዳ ዎደ፥ እ ባ ብራን ፃፍዳ ታሙ ኪታታ ኦይክዳ ናምኡ ሎቸ ሹቻታ ሙሰስ እሚስ።

Currently Selected:

ከሳ 31: GFBEVF

Highlight

Copy

Compare