Римын оліссезлӧ 3
3
1Мый бурыс лоны иудейӧн? Мый сетӧ вундыштыштӧмыс? 2Сія ─ быд ладорсянь бур. Медодз висьтала: иудейеслӧ вӧлі сетӧм Еныслӧн Кылыс. 3Иудейес коласісь мукӧдыс кӧ эзӧ пондӧ кывзыны Енсӧ, мый сэтісь? Ны ылалӧм кузя Еныс вежас разь Ассис кӧсйӧмсӧ? 4Оз эд. Быд мортыс ─ бӧбӧтчись, но Еныс оз вежлы Ассис висьталӧмсӧ. Вежа Гижӧтас тай висьталӧм:
─ Тэ висьталан веськыта, кыдз эм.
Аслат суд вылын бӧрйисьӧмыт коста тэ верман.
5Миян умӧль керӧмным кӧ мыччалӧ Еныслісь бура керӧмсӧ, мый сэтчӧ шуам? Мукӧдыс баитӧны: «Еныс умӧльӧ керӧ, кӧр миян вылӧ вайӧтӧ Ассис лӧгсӧ». 6Оз эд умӧльсӧ кер! Кыдз нӧ сэк Еныслӧ суд вылас быдӧнныскӧт бӧрйисьны? 7Менам бӧбӧтӧмсянь Еныслӧн быльыс буржыка кӧ тыдалӧ, и сы понда ӧддьӧнжык ошкӧны Енсӧ, сэк мый понда менӧ судитны кыдз умӧль керисьӧс? 8Мукӧдыс умӧльсӧ весись баитӧны миян йылісь. Мийӧ пӧ велӧтамӧ: «Пондам керны умӧльсӧ, медбы петіс бурыс». Сэтшӧма баитіссеслӧ дӧнзяс Енлӧн суд вылын веськыта мыжйӧм.
Некин оз кошшы Енсӧ
9Мый нӧ сэк петӧ? Мийӧ, иудейес, мӧдіккезся буржыкӧсь? Абу эд. Мийӧ эта одзын висьталім тай: иудейес да и мӧдік отирыс быдӧнныс умӧль керӧмыс кипод увтын. 10Вежа Гижӧтсис лыддьӧтам:
─ Ен сьӧрті веськыта олісьыс ӧтік абу.
11Абу вежӧртіссес,
абу Енсӧ кошшиссес.
12Быдӧнныс ылалісӧ туй вывсис,
ӧтікӧдз озӧ туйӧ.
Абу бурсӧ кериссес, ӧтік абу.
13Нылӧн горшныс ─ осьта шойна#3:13 шойна ─ могила.
Кыв выланыс ӧтік бӧбӧтчӧм.
Асланыс кыввезӧн кый#3:13 кый ─ змея моз чушкӧны.
14Ӧмсиныс петӧм ёрдӧмнаныс
да лёк курыт кыввезнаныс дойдӧны.
15Нія ӧддьӧн чожӧсь кисьтны вирсӧ.
16Ны мунӧм бӧрын кольччӧ разьсьӧм да пессьӧм-мырсьӧм#3:16 пессьӧм-мырсьӧм ─ страдание.
17Лӧнь оланӧ вайӧтан туйсӧ нія озӧ тӧдӧ.
18Сьӧлӧманыс нылӧн абу Енісь полӧмыс.
19Мийӧ тӧдам: Туйдӧтас тшӧктӧммес висьталӧмась Туйдӧтыс кипод увтын оліссезлӧ. Отирыс сэтісь тӧдӧны, Еныс пондас бӧрйисьны быдӧнныскӧт. Сысянь быд ӧм пӧднассьӧ. 20Еныс одзын эд Туйдӧт сьӧрті олӧмнас мортыс оз ло Ен сьӧрті веськыта олісьӧн. Туйдӧтас висьталӧм сьӧрті дзир тӧдамӧ умӧль керӧмнымӧс.
Ен сьӧрті веськыта олӧмыс#3:21 Ен сьӧрті веськыта олӧм ─ праведность ─ веритӧмсянь
21Ӧні Еныс отирыслӧ осьтіс: мортыс лоӧ Ен сьӧрті веськыта олісьӧн Туйдӧтыстӧг. Эта йылісь висьталӧны Туйдӧтыс да Енсянь юӧртіссезлӧн гижӧттэс. 22Быд морт, кин бы сія эз вӧв, Кристос Исуслӧ веритӧмыс понда лоас Ен сьӧрті веськыта олісьӧн. 23Быдӧнныс эд умӧльсӧ керисӧ да ӧштісӧ Енлӧн югьялӧмын олӧмсӧ. 24Но Енлӧн бурсетӧмсянь отирыс лоасӧ Ен сьӧрті веськыта оліссезӧн. Нылӧ сы понда оз ков вештісьны. Кристос Исусыс эд быд морт туйӧ вештісис Аслас оланӧн. 25Отиркӧт бурасьӧм понда Еныс сетіс кисьтны Кристослісь вирсӧ. Сылӧн кисьтӧм вирыс мездӧ Сылӧ быд веритісьсӧ. Одззася умӧль керӧммезнымӧс Еныс проститіс. 26Мийӧ нійӧ керим, кӧр Еныс мылаыс быртӧг видзчисис отирсӧ. Ӧні Еныс мыччаліс ─ Сія быдӧс керис веськыта. Сія Ачыс веськыта Олісь и керӧ веськыта олісьӧн Исуслӧ быд веритісьсӧ.
27Кытӧн сія, мыйӧн позьӧ ошшасьны? Сія разьӧм. Мыйӧн? Туйдӧт сьӧрті керӧмнас? Абу, веритӧмӧн эд. 28Мийӧ вежӧртім: мортсӧ Еныс керӧ Сы сьӧрті веськыта олісьӧн Кристослӧ веритӧм понда, Туйдӧт сьӧрті керӧм вылӧ видзӧттӧг. 29Абу я Еныс дзир иудей отирлӧн Ен? Сія абу мӧдік отирлӧн Ен? Сія Ен и мӧдік отирлӧн! 30Еныс эд ӧтік. Сія иудейесӧ да и мӧдік отирсӧ керӧ веськыта оліссезӧн дзир веритӧмныс понда. Еныс оз видзӧт вундыштыштӧм вылӧ. 31Сідзкӧ, огӧ я мийӧ разьӧ Туйдӧтсӧ веритӧмнаным? Огӧ эд. Мийӧ Туйдӧтсӧ вынсьӧтам.
Авраам йылісь
Currently Selected:
Римын оліссезлӧ 3: БЮ19
Highlight
Share
Copy
Want to have your highlights saved across all your devices? Sign up or sign in
