1 Коринфын оліссезлӧ 13
13
1Ме кӧ баита отир кыв вылын, нельки ангеллэз кыв вылын, но аслам радейтӧмӧ абу кӧ, сэк ме тронган джыннян кодь, сильӧтан орсан кодь. 2Ме верма Енсянь юӧртны, тӧда быдӧс тӧдлытӧмсӧ, быдпӧлӧссӧ вежӧрта. Ме ёна верита, верма нельки вештавны керӧссэз, а радейтӧмӧ кӧ абу, сэк ме абутӧм туйӧ. 3Быдӧс, мый менам эм, сетала, нельки ачымӧс сета сотны, а ог кӧ радейт мӧдіккезӧс, сэтісь меным нем бурыс абу.
4Радейтӧмыслӧн мылаыс#13:4 мыла ─ терпение уна, сія небыт сьӧлӧма, радейтӧмсӧ завидыс оз кут. Радейтӧмыс асьсӧ оз лэбты, оз ошшась. 5Сія оз мыччав умӧль мывкыдсӧ, оз тӧждісь дзир ас пондасис, оз лӧгась, умӧльсӧ оз касьтывлы, 6умӧльыссянь оз гажмы, а гажмӧ быльыссянь. 7Радейтӧмыс быдӧс терпитӧ, оз дугды веритны, пыр видзчисьӧ бурсӧ, сы вылӧ быд сьӧкыт локтӧмсӧ нуӧтӧ.
8Радейтӧмыс некӧр оз чулав. Сідз лоас: Енсянь юӧртны озӧ пондӧ, мӧдік кыввез вылын баитӧмыс оз понды кывны, тӧдӧмыс абутӧм туйӧ лоас. 9Мийӧ эд етша тӧдам, Енсянь юӧртам дзир мымдакӧ. 10Кӧр локтас быдсӧн бурыс#13:10 быдсӧн бур ─ совершенный, совершенство, сэк сія, мый абу быдсӧн бур, оз ло.
11Учӧтнам ме учӧттэс моз баиті, учӧттэс моз юрам пыртлі да и мывкыдӧ вӧлі учӧттэслӧн. Годдэзам пырӧм бӧрын учӧтсясӧ коли. 12Ӧні мийӧ адззам Енсӧ жыв гудыра видзӧтчанісь#13:12 видзӧтчан ─ зеркало. Сэсся асланым синнэзӧн казялам Сылісь чужӧмсӧ. Ӧні ме тӧда дзир мымдакӧ. Менӧ эд Еныс тӧдӧ бура, сідз и ме сэсся понда тӧдны Сійӧ.
13Этна куимыс пыр лоасӧ: веритӧм, надейтчӧм да радейтӧм. Ны коласісь радейтӧмыс медвына.
Енсянь юӧртӧм да мӧдік кыввез вылын баитӧм
Currently Selected:
1 Коринфын оліссезлӧ 13: БЮ19
Highlight
Share
Copy
Want to have your highlights saved across all your devices? Sign up or sign in
