1 Коринфын оліссезлӧ 12
12
1Воннэзӧ, тіянлӧ Вежа Лолыс сетӧ верман-кужан козиннэз. Ны йылісь висьтавтӧг ог коль. 2Тӧдат эд, одзжык тійӧ оліт Енсӧ тӧдтӧммес моз. Тійӧ ветлӧтіт ас керӧм еннэз дынӧ, жыв тіянӧс кинкӧ нуӧтлывліс. Нія еннэс абу ловьяӧсь, озӧ баитӧ. 3Сійӧн висьтала тіянлӧ: мортсӧ баитны ӧзйӧтӧ кӧ Енлӧн Лов, сэк сія оз вермы висьтавны Исусыс вылӧ ёрдан кывсӧ. Мортыс вермас пуктыны Исуссӧ Дӧсвидзисьӧ дзир сэк, ӧзйӧтӧ кӧ сійӧ Вежа Лов.
4Лолыс ӧтік, а верман-кужан козиннэсӧ сетӧ быдкоддезӧ. 5Дӧсвидзисьыс ӧтік, а Сылӧ кысъявны позьӧ быдмоза. 6Еныс ӧтік, и Сія Ассис уджсӧ быд морт пытшкын вермӧ керны быдмоза. 7Еныс быд морт пыр мыччалӧ Ловлісь вынсӧ, медбы быдӧнныслӧ вӧлі бур.
8Ӧтіклӧ Лолыс сетӧ мывкыда кыв, мӧдіклӧ ─ тӧдӧмӧн сёрнитӧм. 9Мукӧдыслӧ Сія жӧ Лолыс сетӧ веритӧм, кинлӧкӧ ─ шогӧттэзісь веськӧтан вын, 10кинлӧкӧ ─ керны адззывлытӧмсӧ, кинлӧкӧ ─ Енсянь юӧртны. Кинлӧкӧ Лолыс сетӧ тӧдмавны, кытшӧм лов морт пытшкын. Мукӧдыслӧ Сія сетӧ мӧдік кыввез вылын баитӧм, а мукӧдыслӧ вежӧртны да вуджӧтны нійӧ кыввесӧ. 11Этӧ быдӧс керӧ ӧтік Лов. Сія быдыслӧ сетӧ, кыдз Аслыс колӧ.
Унаись ӧтік вывтыр
12Видзӧтны кӧ мортлісь вывтырсӧ, сэтӧн уна быдпӧлӧс торыс. Нія унаыс ӧтік вывтырӧ йитӧмӧсь. Сідз позьӧ висьтавны и Кристосыс йылісь. 13Мийӧ: иудейез, греккез, раббез, абу я раббез ─ быдӧнным пыртчим ӧтік Лолӧн, медбы вӧвны Кристоскӧт ӧтік вывтырӧн. Быдӧнным юим ӧтік Ловсянь.
14Вывтыр абу ӧтік торись, сія уна торись. 15Кок кӧ висьталас, ме пӧ абу вывтырсис, ме эд абу ки, сійӧн сія абу разь вывтырсис? 16Пель кӧ висьталас, ме пӧ абу вывтырсис, ме эд абу син, сійӧн сія абу разь вывтырсис? 17Вывтырыс быдсӧн кӧ син, мыйӧн сэк шысӧ кывны? Быдӧс кӧ пель, мыйӧн сэк нюшкыны? 18Вывтырӧ быд торсӧ Еныс пуктіс сідз, кыдз Сылӧ коліс. 19Быдӧс кӧ вӧлі бы ӧтік тор, кытӧн сэк вывтырыс? 20Ӧні торрес уна, а вывтырыс ӧтік.
21Оз вермы син висьтавны килӧ: «Тэ меным он ков». Сідз и юр коккезлӧ: «Тійӧ меным одӧ колӧ». 22Керсьӧ тай мӧдмоза: вывтырас вынтӧмжык торрес тай коланажыкӧсь. 23Кӧднӧ торресӧ вывтырсиным мийӧ огӧ пуктӧ буррезӧ, ны сьӧрын тай буржыка видзӧтам. 24Кӧдна вылӧ нёштӧм видзӧтны, нійӧ буржыка сайӧвтам. Кӧдна вылӧ бур видзӧтны, нійӧ оз ков сайӧвтны. Но Еныс вывтырнымӧс ӧктӧм коста этадз лӧсьӧтіс: Сія бурӧ пуктӧ#12:24 бурӧ пуктыны ─ уважать нійӧ торресӧ, кӧднӧ мийӧ огӧ шуӧ сэтшӧммезнас. 25Еныс сідз керис, медбы вывтыраным эз вӧв етшасьӧмыс. Быд торыс ась ӧтмоза тӧждісьӧ ӧтамӧдныс понда. 26Сідзкӧ, умӧль кӧ ӧтік торлӧ, сыкӧт умӧль быд торлӧ. Ӧтікӧс кӧ ошкӧны, сыкӧт гажӧтчӧны быдӧнныс.
Быд мортлӧн аслас удж
27Сідз и тійӧ, ӧтлаын ─ Кристослӧн вывтыр. Быдныт ─ Кристос вывтырись тор. 28Вичкуас Еныс ӧтіккезӧс сувтӧтіс апостоллэзӧн, мӧдіккезӧс ─ Енсянь юӧртіссезӧн, куимӧттэзӧс ─ велӧтіссезӧн. Мукӧдлӧ сетіс верман-кужан козин керны адззывлытӧммез, мукӧдлӧ ─ веськӧтны шогӧттэзісь, кинлӧкӧ ─ отсасьны, кинлӧкӧ ─ кужны юравны, кинлӧкӧ ─ баитны мӧдік кыввез вылын. 29Быдӧнныт я апостоллэз, быдӧнныт я Енсянь юӧртіссез, быдӧнныт я велӧтіссез, быдӧнныт я адззывлытӧмсӧ кериссез? 30Быдӧннытлӧ я сетӧм вын веськӧтны шогӧттэзісь? Быдӧнныт я баитат мӧдік кыввез вылын? Быдӧнныт я нійӧ вежӧртат, вермат вуджӧтны?
31Корӧ верман-кужан козиннэсӧ медколанаэзӧ. Ӧні ме мыччала тіянлӧ медбур туй.
Радейтӧмлӧн бырлытӧм вын
Currently Selected:
1 Коринфын оліссезлӧ 12: БЮ19
Highlight
Share
Copy
Want to have your highlights saved across all your devices? Sign up or sign in
