1Gelindo 12
12
Shenlin Ogisan Nenli
1Gaijiula, Shenlin fanmienni shiqinni kieliese bi tande ulie mejieghaku duran uwo. 2Taye mejiene, ta niman kun bikude tai miizhi kielien kielie daku nigiedalai hhende uduruzho. 3Ingiese bi tande mejieghaye. Hudai Ruhher udurusan kunla Ersani kharakuni wo giezhi kiema ulie kieliene. Shenlin ulie uduruse Ersashi Ezhan wo giezhi kiema kielie dane.
4Ogisan nenlila buxian woma, manshi nie Shenlin ogisan wo. 5Ushilaku wiliela buxian woma, manshi nie Ezhande oluzhi giezho. 6Zoinye buxian woma, manshi nie Huda soyuji kunlai tungo giezhi khizheghasan wo. 7Shenlin jien kunlai jiere xienjighakushi dajialade haochu ireghane giezho. 8Niezhan kunlade Shenlinyi tungo giezhi tebieji aghelitu kielienyi ogizho. Niezhan kunlade nie Shenlinyi tungo giezhi tebieji erlin kielieku nenli ogizho. 9Niezhan kunlade nie Shenlinyi tungo giezhi xianxin gieku ogizho. Niezhan kunlade niekozi Shenlinyi tungo giezhi gien goudaghaku nenli ogizho. 10Niezhan kunlade nenlitu shiqin gieku, niezhan kunlade Hudai kielienyi kielieku, niezhan kunlade ruhherlani fenjiku, niezhan kunlade psedu kielien kielieku, niezhan kunlade psedu kielienyi fanyi gieku nenli ogizho. 11Enelashi man hhe niekozi Shenlin giesan wo, hhe goya isighalane buxiantu nenlini jien kunlade fenjizhi ogizho.
Nie Beye Jiere Iyanzi Olon Wo
12Niekozi beye jiere iyanzi olon wine, beyede iyanzi olonliuzhe beyeshi nie wo. Mexihaye niekielien wo. 13Matan bugon Yutai kun, Xila kun, hoji danlasan, ziyutu kunliuzhe hhe niekozi Shenlinse xili jienliezhi nie beye gholudene niekozi Shenlinni xianshou giezho.#12:13 Shenlinni ochighazho 14Beyeshi niekozi iyanzi pusho, olon iyanzi wo. 15Kon kieliezhi bishi kha pusho, ingiese bi beyenughun pusho gieliuzhe beyenughun pusho bikui pusho. 16Chighin kieliezhi bishi nudun pusho, ingiese bi beyenughun pusho gieliuzhe beyenughun pusho bikui pusho. 17Beyede gon nudunshi matugie chenliene? Beyede gon chighinshi matugie funqiene? 18Huda goya isighalane buxiantu iyanzii nienieji beye jiere teiwo. 19Soyujila man niekozi iyanzishi matugie beye sanane? 20Iyanzi olon woma, beye niekozi wo. 21Nudun khade "Bi chii ulie kerene." giezhi kielie dane. Qiorunye konde "Bi chii ulie kerene." giezhi kielie dane. 22Khareidene beye jieredu uzhese zholien wo giesan iyanzila chaizhi genjia ulie olune. 23Matan sumulase beye jieredu zhunyo uwo giesan iyanzilai genjia zhunyoni gholughazhi uzhezhi bixinnilai genjia goude dabalaghazhoma, 24hennilai qingiezhi gieku biyo uwo. Huda genjia fugie mienzii hhezighan bixin iyanzilade ogizhi beyeni nanpei giekushi 25beyei iyanzilai ulie danlinraghazhi nieniei zhaogu gieghane giezho. 26Nie iyanzi ku shouise man hhantu ku shouine. Nie iyanzide famani irese man hhantu bayasune.
27Tashi Mexihani beye wo, jien kunshi beyeni iyanzi wo. 28Huda jiohuide nanpei giesan ji 1 gieshi shitu, ji 2 gieshi xienzhi, ji 3 gieshi loushi wo, pse nenlitu shiqin gieku, gien goudaghaku nenli, banman gieku, gonjiku, yanyanji psedu kielien kielieku wo. 29Manshi shitu onu? Manshi xienzhi onu? Manshi loushi onu? Man nenlitu shiqin gienu? 30Jien kunlade gien goudaghaku nenli winu? Man psedu kielien kielie shidanu? Man psedu kielienyi fanyi gie shidanu? 31Ta genjia fugie nenlii hende onxian gie.
Oreku
Bi zui gou moi tande uzheghaye.
Currently Selected:
1Gelindo 12: sce
Highlight
Copy
Compare
Share
Want to have your highlights saved across all your devices? Sign up or sign in
© 2020-2024 River Street Publishing.
