Румазухъе кагъат 9

9 бетӀер

Аллагьги Исраилил халкъги

1Гьале дица нужее битӀахъе бицунеб буго (МасихӀгун цолъарав дица гьереси бицунаро, – дир намус-яхӀалъ тасдикъ гьабула гьеб, Илагьияб РухӀалъ нугӀлъиги гьабула гьелъие): 2дир ракӀ цӀакъ къваридго буго, нахъаса къотӀичӀого бухӀулеб буго гьеб. 3НагӀана кьун, МасихӀидаса дунго тӀезавизе разилъила дун, гьелдалъун дир вацазе, дир ракьцоязе, 4Исраилил халкъалъе пайда кколеб бугони. Аллагьас гьел жиндирго лъималлъун лъугьинаруна, жиндирго кӀодолъиги гьезие загьир гьабуна, гьезулгун къотӀиги гьабуна, Къанунги рещтӀинабуна, Мукъадасаб Рокъоб Аллагьасе хъулухъ гьабизеги гьезие изну кьуна, хвасар гьарилилан рагӀиги кьуна гьезие. 5Гьезда гьоркьоса рахъана цересел аварагзаби, инсан хӀисабалда МасихӀги гьезул наслуялъул вуго. Бищунго тӀадегӀанавлъун вугев Аллагьасе абадияб рецц! Амин.

6Аллагьас жиндирго халкъалъе кьун букӀараб рагӀи тӀубачӀилан абизе бегьуларо. Исраилил наслуялъул киналго гуро Исраилил халкълъун лъугьарал. 7Ибрагьимил зурияталъул киналго гуро Аллагьасул лъималлъунги лъугьарал. Аллагьас Ибрагьимида абуна: «Дур наслу ИсхӀакъидасан лъугьинейин бугеб». 8Аллагьас рагӀи кьун гьарурал лъималаздаса лъугьараб гурони, цогидал лъималаздаса лъугьараб наслу хӀакълъунго наслулъун рикӀкӀунарилан абураб магӀна буго гьел рагӀабазул. 9Гьадинаб рагӀийин кьун букӀараб: «Цо заманалдасан дун тӀадвуссараб мехалъ, Саратил вас вукӀине вуго».

10Гьале цоги мисал. Гьелдаго релълъун ккана Ребекъал ургьиб нилъер наслуялъул эмен ИсхӀакъидасан кӀиго лъимер хулараб мехалдаги. 11-12Жеги гьел лъимал гьарилелдего, гьез я квешлъи, яги лъикӀлъи гьабилелдего, Аллагьас гьелда абуна: «ЦӀикӀкӀаравги вукӀина гьитӀинасул лагълъун». Аллагьас гьедин щай абурабали загьирлъана гьес цояв тӀаса вищидал. Гьезул ишазухъ балагьичӀого, жиндиего бокьарав гьес жиндихъего ахӀана. 13ТӀухьдузда хъван буго: «Якъуб дие вокьана, ГӀис#9:13 ГӀис – Якъуб аварагасул кӀудияв вац. дие рихана», – ян.

Аллагьасул ццинги Аллагьасул цӀобги

14Аллагьасул хӀукму ритӀухъаб гьечӀилан абизе бегьилищ? Бегьиларо! 15Аллагьас Мусада абуна: «Диего бокьарасда цӀобги лъела, диего бокьарасда гурхӀизеги гурхӀила», – ян. 16Гьедин цоял тӀаса рищи бараб гьечӀо инсанасе бокьи-бокьунгутӀиялда ва гьесул хӀаракат-жигаралда, Аллагьасул цӀобалда бараб буго. 17ТӀухьдузда хъван буго Аллагьас пиргӀавнасда гьадин абунилан: «Мунги хвезавун, дирго кӀодолъи бихьизабизеги дир цӀарги тӀолабго ракьалда машгьурлъизегийин дица мун кӀодо гьавурав». 18Гьедин жиндиего бокьарав чиясда цӀобги лъола Аллагьас, жиндиего бокьарав чи гӀасилъизеги гьавула.

19Дие суал кьезе бегьула: «Гьедин батани, Аллагьас лъиданиги гӀайиб чӀвазе бегьилищ? Гьесул къадаралде дандечӀезе кӀолев чи вукӀунищ?» – абун. 20Ле инсан, Аллагьгун гьедин дагӀбадизе мун щив кколев? ЩагӀил хъабаялъ щагӀихъанасда гьикъулебищ: «Дуца дун гьадинаб щай гьабураб?» – абун. 21ЩагӀихъанасул ихтияр гьечӀищ цого хӀатӀалъул гьайбатаб сурахӀиги гӀадатияб хъабаги гьабизе?

22Жиндирго ццин бахъин бихьизабизе ва къудрат загьир гьабизе бокьаниги, халатккун сабруги гьабун, гьел «Аллагьасул ццидал цӀурал хъубилъун» ругел гӀадамал хвезаризе гӀедегӀуларо Аллагь. 23-24Гьесие бокьана жиндирго гьарзаяб баркат нилъеде – «Аллагьасул цӀобалъул цӀурал сурахӀабазде» – рещтӀинабизе. Гьес цебеккунго хӀукму гьабун букӀана нилъее баркат насиблъизабилин. Аллагьас жиндихъего ахӀун руго нилъ – жугьутӀал гурелги, цогидал халкъалги. 25Гьошея аварагасда Аллагьас гьадин абун буго: «Дир гуреб халкъ дир бугилан абила дица, дие хирияллъун гьечӀезда дие хириял ругилан абила». 26Хадубги: «Нуж дир халкъ гурилан гьезда абураб бакӀалда дица абила нуж хӀакъав Аллагьасул лъимал ругилан».

27Ишая аварагасги гьадин абулеб буго Исраилил халкъалъул хӀакъалъулъ: «Исраилил халкъ ралъдал салигӀан гӀемерлъаниги, гьезул хутӀараб гьитӀинабго бутӀа гурони хвасарлъиларо. 28БетӀергьанас ракьалда кьварараб хӀукму хехго тӀубазабизе бугелъулха». 29Гьелдасаги цебе Ишая аварагасул тӀехьалда гьелъул хӀакъалъулъ хъван буго: «ХӀалкӀолев БетӀергьанас нилъее чанго наслу насиблъизабичӀебани, нилъ Содомалъул халкъалда релълъинаан ва Гоморраялъул халкъалда ращалъилаан».

Исраилил халкъги Рохалил хабарги

30Гьанже щиб дица абилеб? ТӀалаб гьабизе лъугьинчӀониги, божи-иманалдалъун щвана мажусияллъун рукӀаразе Аллагьасда цебе ритӀухълъи. 31Къануналдалъун гьеб тӀалаб гьабизе лъугьараб Исраилил халкъалъе ритӀухълъи щвечӀо. 32Щай гьедин ккараб? Щайгурелъул, божи-иманалдалъун гуреб, Къануналъ рихьизарурал ишаздалъун ритӀухълъизе бокьана гьезие. 33ТӀухьдузда хъван буго: «Балагье, дица Цион магӀарда тӀад лъун толеб буго гӀадамазул хӀетӀе тункулеб гьецӀо ва гьел гӀодор ккезе гьарулеб гамачӀ. Гьеб ганчӀида#9:33 Гьаниб «гамачӀ» кьун буго «МасихӀ» абураб магӀнаялда. божарав чиясул ракӀбухӀиларо», – ян.

Currently Selected:

Румазухъе кагъат 9: АварАК

Highlight

Copy