Румазухъе кагъат 8

8 бетӀер

Иман лъурасул гӀумру

1ГӀиса МасихӀиде цолъаразе тамихӀ гьечӀо гьанже. 2ГӀиса МасихӀидалъун чӀаголъизарулеб РухӀалъул къануналъ тархъан гьавуна дун мунагьалъулги хвалилги къануналдаса. 3Нилъер мунагьаб напс загӀипаб бугелъул, Къануналда гьабизе кӀвечӀебги Аллагьас гьабуна. Инсанасул мунагьаб черхалда релълъараб черх бугев жиндирго Вас витӀана гьес мунагьал чуриялъе къурбанлъун. Гьедин тамихӀ гьабуна Аллагьас инсанасулъ бугеб мунагьалъе. 4Гьанже кӀола нилъеда Къануналъул киналго ритӀухъал амруял щвалде щун тӀуразаризе – нилъер мунагьаб напсалъе бокьухъе гуребха, Аллагьасул РухӀалъ малъухъейин.

5Жидерго мунагьаб напсалъе бокьухъе хьвадулел гӀадамазул гӀакълу мутӀигӀлъула гьезул напсалъе бокьулеб жоялъе. Амма Аллагьасул РухӀалъ малъухъе хьвадулезул гӀакълу мутӀигӀлъула РухӀалъе бокьулеб жоялъе. 6Мунагьав чиясул гӀакълуялъ гьев хвалде вачуна, амма РухӀалъул кверщаликь бугеб гӀакълуялъ инсан абадияб гӀумруялде ва сах-саламалъиялде вачуна. 7Мунагьаб гӀакълу Аллагьасда дандечӀола. Гьеб Аллагьасул къануналъе мутӀигӀлъуларо, мутӀигӀлъизеги кӀоларо гьелда. 8Жидерго мунагьаб напсалъе мутӀигӀлъулел гӀадамаздаса Аллагь разилъизе рес гьечӀо.

9Нужелъ Аллагьасул РухӀ бугони, нужеда тӀад кверщел мунагьаб напсалъ гуреб, РухӀалъин гьабулеб. МасихӀил РухӀ жиндилъ гьечӀев инсан МасихӀил умматалъул чи кколаро. 10Дулъ МасихӀ вугони, дур черх мунагьалъе хола, амма Аллагьас мун ритӀухъ гьавидал, дур рухӀ чӀаголъула. 11МасихӀ хваралъуса вахъинавурав Аллагьасул РухӀ нужелъ бугони, МасихӀ хваралъуса вахъинавурав Аллагьас нужелъ бугеб жиндирго РухӀалдалъун чӀаголъи кьела холел-унел нужер чурхдузеги.

12Гьанже, вацал, нилъеда тӀадаб парзги бугебха, амма мунагьаб напсалда нахърилълъине паризаяб гьечӀо. 13Мунагьаб напсалъе бокьухъе хьвадулел ругони, нуж хвела. Амма, РухӀги хӀалае ккун, нужеца хвезаруни нужго мунагьалъукье ккезарулел ишал, нужее абадияб гӀумру насиблъила. 14Аллагьасул РухӀалъ тӀоритӀулел ругел гӀадамал Аллагьасул лъимал ккола. 15Нужеде рещтӀараб гьеб РухӀалъ хӀинкъи кьоларо ва лагълъи гьабизе тӀамуларо. Нужехъе рещтӀана Аллагьасул лъималлъун нуж лъугьинарулеб РухӀ. Гьелъин нуж тӀамулел: «Абба, дир эмен!» – абун ахӀизе. 16Гьеб РухӀалъ, нилъерго рухӀазгун цадахъ, нугӀлъи гьабула нилъ Аллагьасул лъимал рукӀиналъе. 17Нилъ лъимал кколел ругони, ирсилаллъунги ккола. МасихӀидаго цадахъ нилъги рукӀуна ирсилаллъун. Гьес хӀехьараб гӀазаб-гӀакъубаялъул бутӀа щвани, гьесул кӀодолъиялъул бутӀаги щвела нилъее.

Нилъелъ загьирлъизе бугеб къудрат

18Дида ракӀалде ккола, гьанже нилъее бугеб гӀазаб-гӀакъуба данде кквезегицин бегьиларин нилъелъ загьирлъизе бугеб къудраталда. 19Кинабго бижанщинаб гӀащикъго балагьун чӀун буго жиндир лъимал щалали Аллагьас кидадай загьир гьабилаян. 20-21Гьеб бижанщинабги битӀараб нухдаса къосине къадар букӀана, жиндиего бокьун гуребха, – Аллагьасул хӀукму гьединаб бугелъул. Амма гьеб бижанщиналъул хьул букӀана хвалил лагълъиялдаса хвасарлъизе. Хьул букӀана Аллагьасул лъималазе щвараб гӀадинаб къудраталъулги эркенлъиялъулги бутӀа жидееги щвелин.

22Гьеб бижанщинаб гьанжелъагӀангицин, лъимаде хӀара чӀварай чӀужугӀадан гӀадин, угьдилеб бугеблъи лъала нилъеда. 23ЦӀияб гӀумру байбихьиялъул гӀаламатлъун Аллагьасул РухӀ сайигъатлъун щварал нилъгицин угьдилел руго кидадай Аллагьас нилъ жиндирго лъималлъун гьарилаян ва кидадай нилъ тӀубанго эркенлъилаян. 24Хьул лъедалин нилъее хвасарлъи щвараб. Амма бералда бихьулелде лъураб хьул – гьеб хьул гуро. Бихьулеб жоялде хьул кин лъолеб? 25Жеги нилъеда бихьичӀелде хьул лъураб мехалъ, кидадай гьеб щвелаян сабру гьабун рукӀуна нилъ.

26ЗагӀипал ва щиб гьарилебали лъаларел нилъее квер бакъула Аллагьасул РухӀалъ. Амма жибго гьеб РухӀалъгицин угьдилаго гьарула нилъее хӀажатабщинаб, рагӀабаздалъун загьир гьабизе бажарулареб каламги гьабун. 27Аллагьасда лъала нилъер рекӀелъ щиб бугебали, лъала Аллагьасул РухӀалъ кинал пикраби нилъер рекӀелъ рижизарун ругелали. Аллагьас малъун гьеб РухӀалъ, Аллагьасул халкъалъул рахъалъ Аллагьасде гьари-дугӀа гьабулеб буго.

28Жив вокьулел ва, жиндир амруялда рекъон, хъулухъ гьабизе ахӀарал гӀадамазе Аллагьас сундулъго лъикӀлъи гьабулеблъи лъала нилъеда. 29Гьел руго жеги дуниялалде рачӀиналдего Аллагьас тӀаса рищун рукӀарал гӀадамал. ГӀемерал вацазда гьоркьов гьесул Вас тӀоцевесевлъун лъугьинелъун, гьесул Васасда релълъарал лъугьине цогидаздаса ратӀа гьарунги рукӀана гьел гӀадамал. 30Жинца тӀаса рищаралщинал Аллагьас жиндихъего ахӀана, жиндихъего ахӀаралщинал ритӀухълъизеги гьаруна, ритӀухълъизаруралщиназе жиндирго кӀодолъиялъул бутӀа насиблъизабуна.

31Гьанже гьелда тӀаде щиб жубалеб? Аллагь нилъехъан ватани, нилъеда дандечӀарав щивха? 32Щивниги гьечӀо! Аллагь жиндирго Васасдагицин барахщинчӀо, нилъее гӀоло хвезе витӀана гьев. Гьединаб сайигъат гьабурав Аллагьас хутӀарабщинаб кьеларищ нилъее? 33Аллагьас тӀаса рищарал нилъеда гӀайиб чӀвазе кӀолев чи вугищ? ГьечӀо. Аллагьас ритӀухълъизарула гьел! 34Лъида кӀвелеб гьезие тамихӀалъе хӀукму гьабизе? Лъиданиги кӀвеларо! МасихӀ ГӀиса хвана, хваралъуса вахъана ва Аллагьасул кваранаб рахъалда гӀодов чӀун вуго, нилъер рахъккун кӀалъалев.

35Нилъеде МасихӀил бугеб рокьи тӀезабизе сунда кӀвелеб? Балагьалдайищ? ГӀазабалдайищ? ГӀадамаздасан бачӀунеб къварилъиялдайищ? Ракъиялдайищ? ГӀицӀлъиялдайищ? ХӀинкъи букӀиналдайищ? Хвалчадайищ?.. 36ТӀухьдузда хъван буго: «Мун сабаблъун ниж щибаб къоялъ хвалил бадире ралагьун руго. Мун сабаблъун ниж рикӀкӀунел руго хъвезе рачун унел чахъабилъун».

37Сундасаго нилъ тӀубанго бергьуна, нилъ рокьулев нилъее хӀалае вугелъул. 38Дида ракӀчӀун лъала я гӀумруялда, я хвалида, я малаикзабазда, я шайтӀабазда, я гьаб заманаялъул къуваталда, я бачӀунеб заманаялъул къуваталда, я цогидаб къуваталда, 39я тӀасияб дуниялалъул къуваталда, я гъоркьияб дуниялалъул къуваталда, бижанщиналъул сунданиги, лъиданиги тӀезабизе кӀоларо нилъеде бугеб Аллагьасул рокьи – нилъер ТӀадегӀанав МасихӀ ГӀисадалъун гьес нилъее загьирлъизабураб рокьи.

Currently Selected:

Румазухъе кагъат 8: АварАК

Highlight

Copy