Румазухъе кагъат 3

3 бетӀер

1Гьедин батани, жугьутӀал цогидал халкъазул гӀадамаздаса сундалъунха тӀокӀал ругел? Сунат гьабиялъул пайда бугебищ? 2Бугебха, бугизеги батӀи-батӀияб пайда буго! ТӀоцебесеб – Аллагьас жиндирго рагӀул божилъи жугьутӀазде гьабуна. 3Гьезул цо-цояз гьеб божилъи хвезабуни? Гьезул божуда рекӀкӀ сабаблъун, Аллагьас жиндирго рагӀи хвезабулебищ? 4Киданиги гьабуларо! Аллагьас киданиги хвезабуларо жиндирго рагӀи, хӀатта киналго гӀадамал гьерсихъабилъун лъугьанигицин. ТӀухьдузда хъван буго: «Щиб Дуца абуниги, гьеб хӀакъаб букӀина, Дуде гӀайиб гӀунтӀизабурасдасаги Мун бергьина».

5Нилъер квешал ишаз Аллагьасул ритӀухълъи якъинго загьир гьабулеб бугони, гьелда щибиланха абилеб? Нилъее тамихӀ ритӀухъго гьабулеб гьечӀин Аллагьасиланищ абилеб? (Дица гьеб гьикъулеб буго инсанасулаб гӀакълуялда нахъвилълъун.) 6Гьедин абизе бегьуларо! Гьедин бугони, Аллагьас гӀаламалъего суд кин гьабилеб?

7Дир квешал ишаз Аллагьасул хӀакъикъат жеги цӀикӀкӀун загьир гьабулеб бугони, гьелдалъун Аллагьасе реццги жеги цӀикӀкӀунеб бугони? Гьеб сабаблъун мунагьалъукье кканилан Аллагьас дие тамихӀ гьабизе бегьилищ? 8«Гьедин батани, рачӀаха квешлъи гьабизе, цинги гьеб лъикӀлъиялде сверизе!» – ян абизе бегьилищ? (Цо-цо дун какизе бокьарал гӀадамаз хӀакъикъаталдаги абула дица гьедин гьабизе малъулеб бугилан. Гьезие насиблъила мустахӀикъаб тамихӀ!)

Аллагьасда цере тӀолабго гӀаламалъул мунагьал

9Нижее, жугьутӀазе, тӀокӀлъи гьечӀебищха? ГьечӀо! Дица бичӀчӀизабунагури, жугьутӀалги цогидал халкъалги – киналго мунагьалъул кверщаликь ругилан. 10ТӀухьдузда хъван буго:

«Цониги муъминчи гьечӀо,

цохӀониги гьечӀо.

11Цониги бичӀчӀулев чиги гьечӀо,

лъицаниги Аллагь валагьулев гьечӀо.

12Киназго Аллагьасде мугъ рехун буго,

киналго квешлъун руго.

ЛъикӀлъи гьабулев чиго гьечӀо,

цохӀониги гьечӀо.

13Рагьараб хобалда релълъуна гьезул мукъулукъ,

гьезул мацӀалтӀаги гьереси буго.

Борхьил загьру буго гьезул кӀутӀбузда.

14Ццидалги хьандеялъулги цӀун буго гьезул кӀал.

15Би гӀодобе тӀезе гӀедегӀула гьезул бохдул,

16Гьел щванщиналъуб чӀунтиги чӀунтелалги руго.

17Ракълил нух лъаларо гьезда.

18Аллагьасукьа хӀинкъизе бокьулеб гьечӀо гьезие».

19Кинабго Къануналъ абулеб бугебщинаб Къануналда рекъон хьвадулезе бихьизабураб букӀин лъала нилъеда, – гьединлъидал жинда гӀайиб гьечӀилан лъицаниги кӀал ричӀизе бакӀ гьечӀо, Аллагьасда цебе тӀолабго гӀаламалда гӀайиб чӀвалеб буго гьелъ. 20Къануналъ малъухъе хьвадунилан цониги чи Аллагьас ритӀухъавлъун рикӀкӀунаро. Нилъер мунагь щиб жояли бихьизаби гурони, цоги щибха гьелдаса бугеб?

МасихӀиде божи-иман – хвасарлъиялде нух

21Амма гьанже нилъее рагьана гьеб, Къануналъухъго балагьичӀого, Аллагьасда цере ритӀухълъулеб нух. Къануналъги аварагзабазги цебеккунго бицун букӀараб нухин гьеб. 22ГӀиса МасихӀиде иман лъеялдалъун Аллагьас насиблъизабураб ритӀухълъи ккола гьеб. Щивниги ватӀа гьавичӀого, кинавго иман лъурав чиясе загьирлъана гьеб нух. 23Киналго мунагьалъукье ккун рукӀана, киналго махӀрумлъун рукӀана Аллагьасдасан рещтӀараб Нуралдаса. 24Цинги, Гьесул баркат лъун, чӀобого щвана нилъее Аллагьасда цере ритӀухълъи. МасихӀ ГӀисадалъун рецӀел щведалин гьел ритӀухълъарал. 25Аллагьас гьев къурбанлъун гьавуна, гӀадамазул мунагьал гьесул биялдалъун ва гьесде иман лъеялдалъун чуризе. Цебе, жинца гьел хӀехьон рукӀараб заманалда, гьез гьарурал мунагьазда тӀасаги лъугьун, жиндирго ритӀухълъи загьир гьабуна Аллагьас. 26Живго ритӀухъав вукӀин ва ГӀисаде иман лъурал гӀадамал жинца ритӀухъ гьарулеллъиги бихьизабуна гьес гьанже. Гьеле гьедин загьир гьабуна Аллагьас живго ритӀухъав вукӀин.

27Сундасаха гьанже нилъ чӀухӀизе бегьулел? Сундасаниги чӀухӀизе бегьуларо. ЧӀухӀизе жо щибха нилъер бугеб? ЛъикӀал ишалищ? Гуро, – нилъерго божи-иман! 28Мусал Къанун цӀуниялдалъун ритӀухълъичӀониги, божи-иманалдалъун инсан ритӀухълъулевлъи чӀезабулеб буго нижеца. 29Аллагь гӀицӀго жугьутӀазул Аллагьищ? Цогидал халкъазулги Аллагь гурищ гьев? У, цогидал халкъазулги Аллагь вуго гьев. 30Аллагь цо вуго, сунат гьабуравги божи-иманалдалъун ритӀухълъизавулев, сунат гьабичӀевги – гьединго божи-иманалдалъун ритӀухълъизавулев. 31Божи-иманалъе гӀоло Мусал Къанун нахъчӀвалебищха нилъеца бугеб? ГьечӀо! Къанун гучлъизабулеб буго нилъеца.

Currently Selected:

Румазухъе кагъат 3: АварАК

Highlight

Copy