Румазухъе кагъат 4

4 бетӀер

Ибрагьимил гӀумруялдаса мисал

1Нилъер зурияталъул эмен Ибрагьимил хӀакъалъулъ щибилан нилъеца абилеб? Щиб гьесие загьирлъараб? 2Ибрагьим жиндирго лъикӀал ишаздалъун ритӀухълъаравани, Аллагьасда цеве гурев, гӀадамазда цеве чӀухӀизе бегьилаан гьев. 3ТӀухьдузда щиб хъван бугеб? «Ибрагьим Аллагьасда божана, гьединлъидал гьес гьевги жиндие ритӀухъав чилъун рикӀкӀана».

4Сайигъат гуро хӀалтӀухъанасе кьолеб мухь – гьесие кколеб харж буго. 5Амма инсанас, жиндирго ишазда гуреб, мунагьазул цӀуралги ритӀухъаллъун гьарулев Аллагьасде лъураб иманалда мугъчӀвалеб бугони, гьесул божи-иман сабаблъун, Аллагьас гьев рикӀкӀуна жиндие ритӀухъав чилъун. 6Ишазухъ балагьичӀого, ритӀухъал чагӀилъун рикӀкӀаразде Аллагьасул баркат рещтӀиналъул бицунаго, гьебго жо абулеб буго Давудицаги:

7«Гьардарал гурищ жидер мунагьги чурарал хӀакъалда тӀасаги лъугьарал чагӀи. 8Гьардарав гурищ жиндир мунагь БетӀергьанас бахчарав чи».

9ГӀицӀго сунат гьабуразейищха гьеб баркат щолеб, сунат гьабичӀезе щоларебищ? Дица бицана Ибрагьимил божи-иман сабаблъун рикӀкӀанин Аллагьас гьев жиндие ритӀухъав чилъун. 10Кида гьеб букӀараб – гьес сунат гьабилелдейищ, гьабун хадубищ? Сунат гьабун хадуб гуреб, сунат гьабилелдего букӀана гьеб. 11Сунат гьабилелдего, божи-иманалъухъ балагьун, гьев ритӀухъ гьавуна Аллагьас. РитӀухъав вукӀиналъул мугьру гӀадинаб гӀаламатлъун лъугьана цинги Ибрагьимил сунат. Иман лъуразда гьоркьоса киналго сунат гьабичӀезулги эменлъун лъугьана Ибрагьим, божи-иманалъухъ балагьун Аллагьас гьел ритӀухълъизаридал. 12Гьединго сунат гьабуразулги эмен вуго Ибрагьим. Сунат гьабурал рукӀин гуребги, гьел Ибрагьимил нухдасан ана, сунат гьабилелдего гьесулъ букӀараб божи-иман гьезулъги букӀиндал.

13Къанун цӀуниялдалъун гуреб, божи-иманалдалъун Ибрагьим ритӀухълъизавидал, гьаб дуниял нужее насиблъизабилин рагӀи кьун букӀана Аллагьас Ибрагьимиеги гьесул наслуялъеги. 14ГӀицӀго Къануналъ малъухъе хьвадулезе гьеб рагӀи кьун букӀарабани, божи-иманалъул щибго пайда букӀинароан, кьураб рагӀиги гӀадада ккелаан, 15Къануналъ Аллагьасул ццин бахъинабулелъул, Къанун гьечӀеб бакӀалда такъсирги букӀунаро.

16Гьединлъидал гьеб рагӀи кьеялъе сабаблъун божи-иман лъугьана ва гьел мустахӀикълъичӀеб сайигъатлъун букӀана. Гьедин кьураб рагӀи хвезабиларилан къотӀиги гьабуна Аллагьас Ибрагьимил наслуялъе: Къануналъ малъухъе хьвадулезе ва Ибрагьимил божи-иманалъул нух ккуразе. Нилъер киназулго эмен вуго гьев. 17ТӀухьдузда хъван бугелъул: «Дица мун гӀемерал халкъазул эменлъун гьавила». Гьес иман лъурав Аллагьасда цеве нилъер эмен вуго Ибрагьим. Хварал чӀаголъизарулев, гьечӀелъуса щибгоги букӀинабулев Аллагьин гьев!

18Хьул къотӀараб мехалъги хьул лъун божана Ибрагьим Аллагьасда. Гьединлъидал гӀемерал халкъазул эменлъун лъугьана гьев: «Дур наслуялъул гӀадамал цӀвабигӀан гӀемер рукӀина», – ян ТӀухьдузда хъварабги ритӀухълъун. 19Нусго соналде вахунев вугев жиндир чорхол чӀаголъи хун букӀиналъул ва лъимер ургьиб хулулареб херлъиялде ян Сарат йикӀиналъул пикру гьабичӀого, божи-иман загӀиплъизе биччачӀо гьес. 20Аллагьас кьураб рагӀи холилан ракӀалдецин ккечӀого, божи-иманалъулъ щулалъана ва Аллагьасе рецц гьабуна. 21Кьураб рагӀи тӀубазабизе къуват Аллагьасул букӀиналда щибго щаклъи гьечӀого божана. 22Гьеле гьединлъидал Аллагьас «гьевги жиндие ритӀухъав чилъун рикӀкӀана».

23ГӀицӀго гьесул хӀакъалъулъ гуро хъван ругел «ритӀухъав чилъун рикӀкӀана» абурал гьел рагӀаби. 24Аллагьас ритӀухъал чагӀилъун рикӀкӀине ругел ва ТӀадегӀанав ГӀиса хваралъуса вахъинавурав Аллагьасда божулел нилъер хӀакъалъулъгийин. 25Нилъер мунагьал чуриялъе гӀоло хвалде ана ГӀиса ва нилъ ритӀухълъизариялъе гӀоло Аллагьас чӀаголъизеги гьавуна.

Currently Selected:

Румазухъе кагъат 4: АварАК

Highlight

Copy