Румазухъе кагъат 2

2 бетӀер

Аллагьас суд гьабила

1Ле, чияда гӀайиб чӀвалев чи, щив мун ватаниги, дуда тӀаса гӀайиб кибего унаро. Цогидазда гӀайиб чӀвалеб бугони, дудаго гӀайиб чӀвалев чи ккола мун. Цогидазда гӀайиб чӀвалаго, дуцагоги гьабулеб бугелъул гьебго жо. 2Нилъеда лъала гьедин хьвадулел гӀадамазе Аллагьасул тамихӀ ритӀухъаб букӀин. 3Ле, цогидазда гӀайибги чӀван, гьебго жо дуцаго гьабулев чи, дуда ракӀалде кколищ Аллагьасул тамихӀалдаса ворчӀилилан? 4Аллагь цӀоб гӀатӀидав, гурхӀел-рахӀму бугев ва сабруяв вукӀиналъищ дур рекӀелъе хӀинкъи лъугьунеб гьечӀеб? Аллагьасул цӀобалъ мун тавбуялде гьесизавулев вукӀин лъаларищ дуда?

5Амма дур чанкӀкӀиялъги ракӀбицалъиялъги дулъго цӀикӀкӀинабулеб буго Аллагьасул ццин бахъин. Гьеб дуда лъала Аллагьасул ритӀухъаб тамихӀги ццин бахъинги загьирлъулеб къоялъ. 6Щивав чиясул ишазда рекъон гьабила Аллагьас хӀукму. 7ЛъикӀлъи гьабиялда тӀадчӀеялдалъун лъикӀаб цӀарги, шапакъатги, хвелгьечӀолъиги тӀалаб гьабурасе гьес абадияб гӀумру насиб гьабила. 8Жидеего пайдаялъе хӀалтӀулезде ва, хӀакъабщиналъухъ гӀенеккичӀого, квешабщиналъухъ гӀенеккаразде Аллагьасул ццин гьалаглъила. 9ЖугьутӀаздаса байбихьун цогидал халкъазде щвезегӀан гӀадамазда гьоркьоса квешлъи гьабунщинасе – гӀазабги гӀакъубаги! 10ЖугьутӀаздаса байбихьун цогидал халкъазде щвезегӀан гӀадамазда гьоркьоса лъикӀлъи гьабунщинасе – цӀарги, реццги, саламалъиги! 11Аллагьасул цӀадираби ритӀухъал ругелъулха!

12Мусал Къанун лъалелдего мунагь гьабурасе тамихӀ гьабула Къануналде балагьичӀого, Къанун лъан хадуб мунагь гьабурасе тамихӀ гьабула Къануналде балагьун. 13Къанун цӀалулеб рагӀараб гӀоларо, гьелда рекъон хьвадизеги ккола – Аллагьас ритӀухъавлъун рикӀкӀине. 14Къанунго лъаларел гӀадамаз, Къанун лъачӀониги, жидерго гӀакълу нахъгӀунтӀун тӀуразарула Къануналъул амруял. 15Къануналда бугебаб жидер рекӀелъ хъван бугеблъи бихьизабула гьезул намусалъ: гьезулъ рижула цо-цо мехалда жидедаго гӀайиб чӀвалел, цо-цо мехалда жалго ритӀухъ гьарулел пикраби. 16Дица тӀибитӀизабулеб бугеб Рохалил хабаралда рекъон, МасихӀ ГӀисадалъун Аллагьас суд гьабулеб къоялъ къватӀир чӀвазарила киназулго балъгоял къасдал.

Аллагьасда цере жугьутӀазул мунагьал

17Мун жугьутӀав вугилан рикӀкӀуна дуца, Къануналъ мун хвасар гьавилилан ракӀчӀун вукӀуна, Аллагь нижехъан вугилан веццардула, 18дуда лъала гьесул амруял кинал ругелали, Къануналдалъун битӀараб нух тӀаса бищизеги ругьунлъана мун. 19Дур ракӀчӀун буго бецал чагӀи дуца хадур цӀалел ругин, бецӀлъуда ругезе канлъиги кьолеб бугин, 20гӀакълу гьечӀел кантӀизарулелги ругин. Дуда лъикӀго лъалин кинабго гӀелмуги хӀакъабщинабги жиндилъ камиллъараб Къанун. 21Дуца цогидазда малъула – дудаго щайха малъулареб? ЦӀогьодугейилан малъула – мунго щайха цӀогьодулев? 22ХъахӀбалъи гьабугейилан абула – дуцаго щайха хъахӀбалъи гьабулеб? Гьересиаллагьзаби дуда рихарал руго – гьел жанир ругел храмал щайха дуца талавур гьарулел? 23Дуе Къанун рещтӀун бугилан веццарула мун, амма дуца гьеб Къанун хвезабула ва гьелдалъун Аллагь хӀакъир гьавула. 24ТӀухьдузда хъван бугелъул: «Нуж сабаблъун мажусияз Аллагь какулев вуго».

25Сунат гьабиялъул дуе пайда буго, Къануналъ малъухъе мун хьвадулев вугони. Дуца Къанун хвезабулеб бугони, сунатго гьабичӀев гӀадинав чи гурищ мун кколев? 26Цогидал халкъазул чи Къануналъ малъухъе хьвадулев вугони, сунат гьабурав чи гӀадин къабул гьавуларищ Аллагьас гьевги? 27Чорхол лага къотӀун сунат гьабичӀониги, Къануналда рекъон хьвадулел цогидал халкъазул гӀадамаз гӀайиб чӀвала дуда, хъвараб Къанунги рещтӀарав, сунатги гьабурав, амма Къануналда рекъон хьвадуларев чи вугилан. 28Чорхол лага къотӀун сунат гьабуравщинав ва тӀасан вихьизе жугьутӀавилан кколевщинав чи жугьутӀав гуро. 29Унго-унгояв жугьутӀав ккола жаниса жив жугьутӀавлъунги вугев ва жиндир рекӀелъ, Къануналъул хӀарпаздалъун гуреб, Илагьияб РухӀалдалъун сунатги гьабурав чи. Гьединав чиясе рецц, гӀадамаздасан гуреб, Аллагьасдасан букӀуна.

Currently Selected:

Румазухъе кагъат 2: АварАК

Highlight

Copy